Kevcai Hlawv Huvsi Xyeem

1 (יחוח)Yahweh hu Mauxes thiab hais rau nws ntawm lub tsev ntaub sib ntsib tias, 

2 cia li hais rau cov Ixayees tias, thaum nej cov leejtwg yuav coj qhov txhia chaw tuaj ua kevcai xyeem rau (יחוח)Yahweh, mas nej yuav coj nyuj, lossis tshis, lossis yaj, tuaj xyeem.

3 Yog nws yuav muab nyuj ua kevcai hlawv huvsi xyeem mas nws yuav tau muab ib tug txiv nyuj uas tsis muaj chaw thuam li, mas nws yuav coj tuaj xyeem rau ntawm lub qhov rooj tsev ntaub sib ntsib, kom (יחוח)Yahweh thiaj li txais yuav.

4 Nws yuav tau muab tes npuab rau saum tus tsiaj uas yuav muab hlawv huvsi xyeem ntawd lub taubhau, mas (יחוח)Yahweh thiaj txais yuav tus tsiaj ntawd ua qhov uas ntxuav nws kev txhaum txim. 

5 Nws yuav muab tus txiv nyuj ntawd tua rau ntawm (יחוח)Yahweh xubntiag, mas Aloos cov tub uas ua pov thawj yuav muab cov ntshav xyeem thiab muab nchos lo puag ncig lub thaj uas nyob ncaj ntawm lub qhov rooj tsev ntaub sib ntsib. 

6 Nws yuav muab tus tsiaj uas yuav hlawv huvsi xyeem ntawd daim tawv laws es muab cov nqaij txiav ua tej ywb yav.

7 Mas Aloos cov tub uas ua pov thawj yuav rauv taws rau saum lub thaj thiab muab taws los tib rau saud.

8 Aloos cov tub uas ua pov thawj yuav muab tej ywb yav nqaij ntawd thiab lub taubhau thiab cov roj tso tib zoo raws li kevcai rau saum cub tawg saum lub thaj.

9 Tus tswv tsiaj yuav tau muab dej ntxuav tej plab nyhuv thiab tej ceg huvsi, mas tus pov thawj yuav muab tej ntawd hlawv huvsi rau saum lub thaj. Qhov no yog ua kevcai hlawv huvsi xyeem, yog yam uas muab hlawv kub nyhiab xyeem ua kom muaj pa ncho tsw qab haum (יחוח)Yahweh lub siab.

10 Yog nws yuav muab yaj los tshis ua kevcai hlawv huvsi xyeem, mas nws yuav tau muab tus txiv uas tsis muaj chaw thuam li.

11 Nws yuav tau muab tus tsiaj ntawd tua rau ntawm lub thaj sab ped rau ntawm (יחוח)Yahweh xubntiag, mas Aloos cov tub uas ua pov thawj yuav muab cov ntshav ntawd nchos lo puag ncig lub thaj.

12 Nws yuav tau muab tus tsiaj ntawd txiav ua tej ywb yav, mas tus pov thawj yuav muab tej ywb yav nqaij, thiab lub taub hau, thiab cov roj tso tib zoo raws li kevcai rau saum cub tawg saum lub thaj.

13 Tus tswv tsiaj yuav tau muab dej ntxuav tej plab nyhuv thiab tej ceg huvsi, mas tus pov thawj yuav coj tej ntawd los hlawv huvsi rau saum lub thaj. Qhov no yog ua kevcai hlawv huvsi xyeem, yog yam uas muab hlawv kub nyhiab xyeem ua kom muaj pa ncho tsw qab haum (יחוח)Yahweh lub siab.

14 Yog nws yuav muab noog ua kevcai hlawv huvsi xyeem rau (יחוח)Yahweh, mas nws yuav tau coj nquab taug lossis rhaws nquab nyeg tuaj xyeem.

15 Tus pov thawj yuav coj tus noog ntawd los rau ntawm lub thaj, muab lub taubhau ntswj kom tu nrho, es coj kiag lub taubhau hlawv rau saum lub thaj, mas cia cov ntshav nrog rau ntawm lub thaj ib sab, 

16 thiab nws yuav dua lub txia thiab dob cov plaub tseg rau ntawm lub thaj sab hnub tuaj uas nchuav pawg tshauv.

17 Nws yuav muab ob sab kooj tis dua kom lub cev ntuag, tiamsis tsis txhob muab rub tu.  Mas tus pov thawj yuav muab tus noog ntawd hlawv rau saum cub tawg saum lub thaj. Qhov no yog ua kevcai hlawv huvsi xyeem, yog yam uas muab hlawv kub nyhiab xyeem ua kom muaj pa ncho tsw qab haum

(יחוח)Yahweh lub siab.