Muaj Tib Qho Chaw Tua Tsiaj Xyeem

1 (יחוח)Yahweh hais rau Mauxes tias,

2 cia li hais rau Aloos thiab nws cov tub thiab cov Ixayees sawvdaws tias, ntawm no yog tej uas (יחוח)Yahweh hais kom nej ua.

3 Yog cov Ixayees leejtwg tua nyuj, tua menyuam yaj, tua tshis rau hauv lub zos lossis tua sab nraum ntug zos, 

4 tsis coj tuaj rau ntawm lub qhov rooj tsev ntaub sib ntsib es muab xyeem rau (יחוח)Yahweh ntawm (יחוח)Yahweh lub tsev ntaub, mas tus ntawd muaj txim, vim nws ua ntshav los.  Nws ua ntshav los mas yuav tau muab nws txiav tawm hauv nws haiv neeg mus.

5 Ua li no kom cov Ixayees thiaj li coj tej tsiaj uas lawv muab tua xyeem tom tej teb tuaj tua xyeem rau (יחוח)Yahweh es muab rau tus pov thawj ntawm lub qhov rooj tsev ntaub sib ntsib thiab muab tua xyeem rau (יחוח)Yahweh ua kevcai sib raug zoo.

6 Mas tus pov thawj yuav muab cov ntshav ntawd nchos rau saum (יחוח)Yahweh lub thaj ntawm lub qhov rooj tsev ntaub sib ntsib thiab muab cov roj hlawv tsw qab kom haum (יחוח)Yahweh lub siab.

7 Mas lawv thiaj tsis tua tsiaj xyeem rau tej dab tshis uas lawv deev ntawd. Qhov no yuav ua kevcai rau lawv txhua tiam mus ib txhis.

8 Thiab koj hais rau lawv tias, cov Ixayees lossis lwm haiv neeg uas nrog lawv nyob, leejtwg muab tsiaj xyeem ua kevcai hlawv xyeem lossis muab tua xyeem, 

9 es nws tsis coj tus tsiaj ntawd tuaj rau ntawm lub qhov rooj tsev ntaub sib ntsib mam li xyeem rau (יחוח)Yahweh, mas muab nws txiav tawm hauv nws haiv neeg mus.  

​

Tsis Txhob Noj Ntshav

10 Cov Ixayees lossis lwm haiv neeg uas nrog lawv nyob leejtwg noj ntshav, kuv yuav tsom ntsoov tawm tsam tus uas noj ntshav ntawd thiab muab nws txiav tawm hauv nws haiv neeg mus.

11 Rau qhov txhua yam uas ciaj sia txojsia yog nyob hauv cov ntshav.  Kuv pub cov ntshav rau nej siv saum lub thaj ua kevcai ntxuav nej tus kheej kev txhaum, rau qhov cov ntshav yog yam uas ntxuav tau kev txhaum vim ntshav yog txojsia.

12 Yog li no kuv thiaj hais rau cov Ixayees tias, tsis kheev nej cov leejtwg noj ntshav kiag li, thiab tsis kheev lwm haiv neeg uas nrog nej nyob leejtwg noj ntshav.

13 Cov Ixayees lossis lwm haiv neeg uas nrog lawv nyob leejtwg mus tua tsiaj qus lossis nas noog uas noj tau mas yuav tau muab cov ntshav nchuav pov tseg thiab muab hmoov av faus.

14 Rau qhov txhua tus tsiaj txojsia puavleej yog nws cov ntshav. Vim li no kuv thiaj hais rau cov Ixayees tias, nej tsis txhob noj yam tsiaj twg tej ntshav kiag li, rau qhov txhua tus tsiaj txojsia yog nyob hauv cov ntshav. Leejtwg noj yuav raug muab txiav tawm mus.

15 Txhua tus uas yug hauv lub tebchaws lossis lwm haiv neeg uas noj tej tsiaj tuag lossis tej tsiaj uas lwm tus tsiaj tom tuag, mas nws yuav tau ntxhua nws cev ris tsho, thiab da dej, thiab yuav qias tsis huv mus txog tsaus ntuj mam li huv.

16 Yog nws tsis ntxhua nws cev ris tsho, thiab da dej, mas nws yuav ris nws lub txim.