Txwv Tsis Txhob Ua Dev

1 (יחוח)Yahweh hais rau Mauxes tias,

2 cia li hais rau cov Ixayees tias, kuv yog (יחוח)Yahweh uas yog nej Tus Tswv.

3 Nej tsis txhob ua raws li uas luag ua hauv Iziv tebchaws uas nej tau nyob.  Thiab nej tsis txhob ua raws li uas luag ua hauv Khana‑as tebchaws uas kuv tab tom coj nej mus nyob. Tsis txhob xyaum raws li lawv tej kab ke.

4 Nej yuav tau ua raws li kuv tej kevcai thiab tuav rawv kuv tej kab ke thiab ua raws nraim.  Kuv yog (יחוח)Yahweh, yog nej Tus Tswv.

5 Vim li no, nej yuav tau tuav rawv kuv tej kab ke thiab kuv tej kevcai, yog ua raws nraim li ntawd, tibneeg thiaj li muaj txojsia nyob tau.  Kuv yog (יחוח)Yahweh.

6 Tsis txhob kheev leejtwg mus ze tej uas txheeb txheeb nws es thws nws qhov chaw txaj muag.  Kuv yog (יחוח)Yahweh.

7 Koj tsis txhob thws koj niam qhov chaw txaj muag vim yog thws koj txiv chaw txaj muag.  Nws yog koj niam, koj tsis txhob thws nws qhov chaw txaj muag.

8 Koj tsis txhob thws koj txiv tus pojniam qhov chaw txaj muag, vim yog thws koj txiv chaw txaj muag.

9 Koj tsis txhob thws koj tus muam qhov chaw txaj muag uas yog koj txiv li ntxhais lossis yog koj niam li ntxhais, tsis hais tus uas yug hauv tsev lossis coj sab nraud los.

10 Koj tsis txhob thws koj tus tub li ntxhais qhov chaw txaj muag lossis thws koj tus ntxhais li ntxhais qhov chaw txaj muag, vim lawv qhov chaw txaj muag kuj yog koj chaw txaj muag ntag.

11 Koj tsis txhob thws koj niam tshiab li ntxhais qhov chaw txaj muag uas twb yog koj txiv yug, vim nws kuj yog koj li muam.

12 Koj tsis txhob thws koj tus phauj qhov chaw txaj muag, vim nws twb yog txheeb ze koj txiv.

13 Koj tsis txhob thws koj niam tus niam hluas lossis tus niam laus qhov chaw txaj muag, vim nws twb yog txheeb ze koj niam.

14 Koj tsis txhob thws koj tus txiv hlob lossis koj tus txiv ntxawm qhov chaw txaj muag es mus ze lawv pojniam, vim twb yog koj niam hlob lossis koj niam ntxawm.

15 Koj tsis txhob thws koj tus nyab qhov chaw txaj muag, vim nws twb yog koj tus tub pojniam, tsis txhob thws nws qhov chaw txaj muag kiag li.

16 Koj tsis txhob thws koj tus niam tij lossis koj tus niam ntxawm qhov chaw txaj muag, vim twb yog koj kw koj tig qhov chaw txaj muag.

17 Koj tsis txhob thws ib tug pojniam qhov chaw txaj muag thiab thws nws tus ntxhais qhov chaw txaj muag, thiab tsis txhob thws nws tus tub li ntxhais qhov chaw txaj muag lossis thws nws tus ntxhais li ntxhais qhov chaw txaj muag, vim lawv yog ib co txheeb ze, yog ua li ntawd mas phem kawg li.

18 Koj tsis txhob thws koj pojniam tus niam laus lossis tus niam hluas qhov chaw txaj muag coj los sib tw rau thaum koj pojniam tseem muaj txojsia nyob.

19 Thaum tus pojniam twg tabtom ua pojniam uas nws qias tsis huv mas koj tsis txhob mus ze nws, thws nws qhov chaw txaj muag.

20 Koj tsis txhob mus nrog kwvtij zej zog tej pojniam pw, thiaj ua rau koj qias tsis huv.

21 Koj tsis txhob muab koj tej menyuam hlawv xyeem rau dab Maulej es ua puas tsuas koj Tus Tswv lub npe poob koob. Kuv yog ()Yahweh.

22 Koj tsis txhob nrog tej txivneej pw ua niam txiv yam li tej pojniam, yog yam uas qias vuab tsuab kawg li.

23 Koj tsis txhob nrog tej tsiaj txhu pw ua niam txiv ua rau koj qias tsis huv, thiab tej pojniam tsis txhob nrog tsiaj txhu pw ua niam txiv. Ua li no yog kev txhaum kev qias kawg li.

24 Nej tsis txhob ua tej kev phem kev qias no puas tsuas nej qias tsis huv, vim yog tej haiv neeg uas kuv tab tom ntiab khiav ntawm nej hauv ntej mus ua tej kev phem kev qias no puas tsuas lawv qias tsis huv.

25 Mas lub tebchaws thiaj li qias tsis huv, kuv thiaj li rau txim rau lub tebchaws ntawd tej kev txhaum, lub tebchaws thiaj li muab cov tibneeg ntuav pov tseg.

26 Mas nej yuav tau tuav rawv kuv tej kab ke thiab kuv tej kevcai thiab tsis txhob ua tej kev qias vuab tsuab ntawd, tsis hais nej haiv neeg lossis lwm haiv neeg uas nrog nej nyob, 

27 rau qhov cov tibneeg hauv lub tebchaws no uas xub nyob ua nej ntej, ua tej kev qias vuab tsuab no mas puas tsuas lub tebchaws qias tsis huv.

28 Ntshai tsam nej ua puas tsuas lub tebchaws qias tsis huv es lub tebchaws yuav muab nej ntuav pov tseg ib yam li lub tebchaws twb muab haiv neeg uas xub nyob ua nej ntej ntuav pov tseg.

29 Yog leejtwg ua tej kev qias vuab tsuab ntawd mas tus ntawd yuav raug muab txiav tawm hauv nws haiv neeg mus.

30 Vim li no, nej yuav tau ua raws nraim li kuv hais, tsis txhob ua raws li tej kev li kev cai uas qias vuab tsuab no uas cov xub nyob ua nej ntej lawd ua, thiab tsis txhob ua tej yam no puas tsuas nej qias tsis huv. Kuv yog

(יחוח)Yahweh yog nej Tus Tswv.