Tus Tsis Mloog Lus Lub Txim

1 (יחוח)Yahweh hais rau Mauxes tias,

2 cia li hais rau cov Ixayees tias, cov Ixayees thiab lwm haiv neeg uas nrog cov Ixayees nyob leejtwg muab nws tus menyuam ib tug twg cob rau dab Maulej, mas tus ntawd yuav raug muab tua pov tseg. Cov pejxeem yuav tau xuas pob zeb ntaus nws kom tuag.

3 Kuv yuav tsom ntsoov tawm tsam tus ntawd thiab yuav muab nws txiav tawm hauv nws haiv neeg mus, rau qhov nws tau muab nws ib tug menyuam cob rau dab Maulej, ua rau qhov chaw uas pe hawm kuv qias tsis huv thiab ua qias puas tsuas kuv lub npe uas dawb huv.

4 Yog cov pejxeem tsis quav ntsej tus uas muab nws tus menyuam cob rau dab Maulej ntawd es tsis muab nws tua pov tseg, 

5 mas kuv yuav tsom ntsoov tawm tsam tus ntawd thiab nws tsev neeg thiab muab lawv txiav tawm hauv lawv haiv neeg mus, tsis hais nws thiab txhua tus uas raws nws qab mus deev dab Maulej.

6 Yog leejtwg tig mus nrhiav txiv neeb txiv yaig thiab ua poj muag cev rau lawv, kuv yuav tsom ntsoov tawm tsam tus ntawd thiab muab nws txiav tawm hauv nws haiv neeg.

7 Vim li no nej yuav tau tu nej tus kheej kom dawb huv rau (יחוח)Yahweh thiab ua tibneeg dawb huv, rau qhov kuv yog (יחוח)Yahweh yog nej Tus Tswv.

8 Nej yuav tau tuav rawv kuv tej kab ke thiab ua raws nraim.  Kuv yog (יחוח)Yahweh uas muab nej cais kom dawb huv.

9 Txhua tus uas cem foom nws niam nws txiv, yuav raug muab tua pov tseg.  Nws tau cem foom nws niam nws txiv, mas qhov uas nws tuag ntawd nws ris nws ib leeg.

10 Yog leejtwg deev luag tej pojniam, mas ob tug uas sib deev ntawd yuav raug muab tua pov tseg.

11 Tus uas nrog nws txiv tus pojniam pw, kuj yog nws thws nws txiv qhov chaw txaj muag. Ob tug ntawd yuav raug muab tua pov tseg, mas qhov uas nkawv tuag ntawd nkawv ris nkawv.

12 Yog leejtwg nrog nws tus nyab pw, mas ob tug ntawd yuav raug muab tua pov tseg. Nkawv ua dev mas qhov uas nkawv tuag ntawd nkawv ris nkawv.

13 Yog ib tug txivneej deev ib tug txivneej yam li deev pojniam, mas nkawv tau ua qias vuab tsuab.  Nkawv yuav raug muab tua pov tseg, mas qhov uas nkawv tuag ntawd nkawv ris nkawv.

14 Yog leejtwg yuav tus ntxhais ua pojniam thiab tseem yuav leej niam ua pojniam, mas yog qhov phem.  Mas lawv peb leeg yuav raug muab hlawv pov tseg, kom thiaj tsis muaj kev phem nyob hauv nej.

15 Yog tus txivneej twg deev tsiaj txhu tus ntawd yuav raug muab tua pov tseg thiab nej yuav muab tus tsiaj ntawd tua pov tseg.

16 Yog tus pojniam twg txav ze ib tug tsiaj txhu thiab deev tus tsiaj ntawd, nej yuav muab tus pojniam thiab tus tsiaj ntawd tua pov tseg. Qhov uas nkawv tuag ntawd nkawv ris nkawv.

17 Yog leejtwg coj nws tus muam uas yog nws txiv li ntxhais lossis yog nws niam li ntxhais mus thws qhov chaw txaj muag saib thiab tus ntxhais pom nws qhov chaw txaj muag, kuj yog ua txaj muag heev. Nkawv yuav raug muab txiav tawm tab meeg nkawv haiv neeg.  Nws tau thws nws tus muam qhov chaw txaj muag, nws yuav ris nws lub txim.

18 Yog leejtwg nrog tus pojniam uas tseem ua pojniam pw thiab thws nws qhov chaw txaj muag, yog nkawv thws qhov chaw los ntshav. Nkawv yuav raug muab txiav tawm hauv nkawv haiv neeg.

19 Nej tsis txhob thws nej niam tus niam laus lossis niam hluas lossis nej txiv li muam qhov chaw txaj muag, vim yog thws tus uas txheeb nej qhov chaw txaj muag.  Lawv yuav ris lawv lub txim.

20 Yog leejtwg nrog nws tus yawg laus li pojniam pw, kuj yog nws thws yawg laus qhov chaw txaj muag.  Nkawv yuav ris nkawv lub txim, nkawv yuav tuag tsis muaj menyuam.

21 Yog leejtwg yuav nws tus tijlaug lossis tus kwv pojniam, kuj yog kev qias tsis huv. Nws tau thws nws kwvtij qhov chaw txaj muag, nkawv yuav tsis muaj menyuam.

22 Nej yuav tau tuav rawv kuv tej kab ke huvsi thiab kuv tej kevcai huvsi thiab ua raws nraim, kom lub tebchaws uas kuv coj nej los nyob hauv thiaj tsis muab nej ntuav tawm.

23 Nej tsis txhob ua raws li cov tibneeg uas kuv muab ntiab khiav tawm ntawm nej hauv ntej lawd tej kevcai. Vim tias lawv ua tej uas hais tag no, kuv thiaj ntxub lawv kawg li.

24 Tiamsis kuv twb hais rau nej lawm tias, Nej yuav tau lawv lub tebchaws ua qub txeeg qub teg, thiab kuv yuav muab ua nej teej nej tug, yog lub tebchaws uas muaj kua mis thiab zib ntab ntws nto.  Kuv yog (יחוח)Yahweh yog nej Tus Tswv uas tau muab nej cais tawm hauv ib tsoom tibneeg los.

25 Vim li no, nej yuav tau cais tej tsiaj uas huv thiab tej tsiaj uas tsis huv, thiab cais tej noog uas tsis huv thiab tej noog uas huv. Nej tsis txhob ua rau nej qias vuab tsuab, vim yog tim tej tsiaj twg lossis tej noog twg lossis ib yam abtsi uas nkag hauv av uas kuv tau muab qhia cais rau nej lawm tias yog yam uas qias tsis huv.

26 Nej yuav tau dawb huv rau kuv, rau qhov kuv uas yog (יחוח)Yahweh yog tus dawb huv, thiab kuv tau muab nej cais tawm hauv ib tsoom tibneeg los kom nej thiaj li yog kuv tug.

27 Tus txivneej twg lossis tus poj- niam twg uas ua txiv neeb txiv yaig mas yuav raug muab tua pov tseg.  Yuav xuas pob zeb ntaus kom tuag, mas qhov uas lawv tuag ntawd lawv ris lawv.