Cov Pov Thawj Yuav Ua Tus Dawb Huv

1 (יחוח)Yahweh hais rau Mauxes tias, cia li hais rau cov pov thawj uas yog Aloos tej tub tias, tsis txhob cia nej cov pov thawj ib tug twg ua puas tsuas nws, rau qhov uas mus pam tus tuag hauv nws cov kwvtij, 

2 tsuas yog tej uas txheeb txheeb nws xwb, yog nws niam, nws txiv, nws tub, nws ntxhais, nws tij, nws kwv, 

3 lossis nws tus nkauj muam uas nrog nws nyob, vim tsis muaj txiv mas tus pov thawj yeem cia nws qias tsis huv.

4 Nws tsis txhob pam nws tej neej tsa es ua rau nws qias tsis huv, thiab ua puas tsuas nws poob koob.

5 Cov pov thawj tsis txhob chais ib nyuag qhov plaubhau thiab tsis txhob txiav cov hwj txwv, thiab tsis txhob muab riam suam lub cev.

6 Cov pov thawj yuav tau ua tibneeg dawb huv rau lawv Tus Tswv, tsis txhob ua puas tsuas lawv Tus Tswv lub npe poob koob, vim yog lawv muab qhov txhia chaw hlawv kub nyhiab xyeem rau (יחוח)Yahweh, yog tej zaub mov xyeem rau lawv Tus Tswv.  Vim li no, lawv yuav tau ua dawb huv.

7 Cov pov thawj tsis txhob yuav tej poj muag cev, lossis tej pojniam uas qias tsis huv, lossis tej pojniam uas nrauj txiv, rau qhov cov pov thawj yeej yog dawb huv rau lawv Tus Tswv.

8 Koj yuav tau tu kom lawv dawb huv rau kuv, vim lawv xyeem tej zaub mov rau koj Tus Tswv. Koj yuav tau pom tias lawv dawb huv, rau qhov kuv uas yog (יחוח)Yahweh kuj dawb huv, kuv yog tus uas tu kom nej dawb huv.

9 Tus pov thawj twg tus nthxais mus ua poj muag cev, ua rau nws qias tsis huv mas kuj yog ua puas tsuas leej txiv poob koob.  Nws yuav raug muab hlawv pov tseg.

10 Tus pov thawj hlob uas raug muab roj hliv ywg saum nws taubhau tsa ua pov thawj hlob thiab yog tus uas raug muab tu kom dawb huv es hnav tau cev tsoos meej mom mas tsis txhob tseg plaubhau ntxhov ntxhov thiab tsis txhob dua nws lub tsho.

11 Nws tsis txhob mus ze tus tuag, tsis txhob ua puas tsuas nws qias tsis huv, txawm yog nws txiv, nws niam tuag los xij. 

12 Nws tsis txhob tawm hauv lub chaw pe hawm (יחוח)Yahweh mus thiab tsis txhob ua qias puas tsuas lub chaw pe hawm nws Tus Tswv poob koob, rau qhov cov roj uas hliv tsa nws ua tus dawb huv rau nws Tus Tswv tseem nyob ntawm nws. Kuv yog (יחוח)Yahweh.

13 Nws yuav tau yuav tus pojniam uas tsis tau deev dua hluas nraug.

14 Nws tsis txhob yuav tej poj ntsuam, tej poj nrauj, tej pojniam uas qias tsis huv lossis tej poj muag cev. Nws yuav tau yuav tus pojniam uas tsis tau deev dua hluas nraug hauv nws haiv neeg los ua pojniam, 

15 kom nws thiaj tsis ua qias puas tsuas nws tej menyuam poob koob rau hauv nws haiv neeg, rau qhov kuv yog (יחוח)Yahweh uas cais nws ua tus dawb huv.

16 (יחוח)Yahweh hais rau Mauxes tias,

17 cia li hais rau Aloos tias, koj caj ces mus ib tiam dhau ib tiam tsis txhob kheev ib tug uas lub cev muaj ib qho phem qhovtwg tuaj ze xyeem tej zaub mov rau nws Tus Tswv, 

18 rau qhov tias tus uas muaj ib qho phem qhovtwg nkag tsis nyog mus ze lub thaj, tsis hais tus dig muag, lossis ceg tawv, lossis tus uas caws ntsej, caws ntswg, lossis tes taw ntev tsis sib txig, 

19 lossis caws tes caws taw, 

20 lossis khoov duav khoov pu, lossis tus uas cob pob, lossis pom kev tsis zoo, lossis mob lig mob ruas los kua paug, lossis noob thoob tshaj.

21 Tus pov thawj Aloos caj ces yog leejtwg uas lub cev phem ib qho qhovtwg tsis txhob kheev nws tuaj ze muab luag tej qhov txhia chaw hlawv xyeem rau (יחוח)Yahweh.  Vim nws lub cev muaj ib qho phem, tsis txhob kheev nws tuaj ze xyeem tej zaub mov rau nws Tus Tswv.

22 Nws noj tau nws Tus Tswv zaub mov tsis hais tej uas dawb huv kawg nkaus thiab tej uas dawb huv.

23 Tiamsis nws tsis txhob tuaj ze daim ntaub uas thaiv thiab ze lub thaj, rau qhov nws lub cev muaj ib qho phem, kom nws thiaj tsis ua puas tsuas qhov chaw uas pe hawm kuv poob koob. Kuv yog (יחוח)Yahweh uas muab lub chaw ntawd cais kom dawb huv.

24 Mauxes thiaj hais tej no rau Aloos thiab nws cov tub thiab cov Ixayees sawvdaws.