Tej Uas Muab Xyeem Rau (Yahweh Dawb Huv

1 (יחוח)Yahweh hais rau Mauxes tias,

2 cia li hais rau Aloos thiab nws cov tub kom txav deb ntawm tej qhov txhia chaw dawb huv uas cov Ixayees muab pub kiag rau kuv ua kuv tug, kom lawv thiaj tsis ua puas tsuas kuv lub npe uas dawb huv poob koob. Kuv yog (יחוח)Yahweh.

3 Cia li hais rau lawv tias, yog nej caj ces ib tiam dhau ib tiam mus li, leejtwg mus ze tej qhov txhia chaw dawb huv uas cov Ixayees muab pub kiag rau kuv ua kuv tug rau thaum uas nws tseem qias tsis huv, mas nws yuav raug muab tshem tawm mus kom dhau kuv lub xubntiag. Kuv yog (יחוח)Yahweh.

4 Yog Aloos caj ces ib tug twg uas mob lig mob ruas lossis muaj kua ntws los mas nws noj tsis nyog tej uas xyeem dawb huv ntawd, cia nws zoo huv tso.  Yog leejtwg kov raug tej yam qias tsis huv vim tej ntawd twb nphav tej cev tuag lawm, lossis nws muaj kua chaw xis ntws los, 

5 lossis nws kov raug tej tsiaj me me uas nkag hauv pem teb, uas ua rau nws qias tsis huv, lossis nws kov raug tej tibneeg uas puas tsuas nws qias tsis huv, txawm yog yam uas qias tsis huv twg, 

6 los tus uas kov raug tej ntawd nws kuj yuav qias tsis huv mus txog tsaus ntuj.  Nws noj tsis nyog tej uas xyeem dawb huv, nws yuav tau da dej tso.

7 Thaum hnub poob qho lawd, nws thiaj li huv ces nws mam li noj tau tej uas xyeem dawb huv ntawd, rau qhov tej ntawd yog nws li zaub mov.

8 Tej tsiaj uas nws tuag nws lossis raug ib tug tsiaj qus tom tuag mas nws tsis txhob noj li.  Tej no yuav puas tsuas nws qias tsis huv.  Kuv yog (יחוח)Yahweh.

9 Vim li no cov pov thawj yuav tau ua raws li uas kuv hais, tsam ces thaum lawv ua tej no, lawv yuav raug txim thiab lawv yuav tuag, vim lawv saib tsis taus kuv tej lus. Kuv yog (יחוח)Yahweh uas cais lawv ua cov uas dawb huv.

10 Tsuas yog cov pov thawj tsev neeg thiaj noj nyog tej uas xyeem dawb huv.  Cov uas tuaj ua qhua rau hauv tus pov thawj tsev thiab tus pov thawj tej tub zog los noj tsis nyog tej uas dawb huv ntawd.

11 Tiamsis yog tus pov thawj muab nyiaj yuav ib tug ua nws tus qhev mas tus qhev ntawd noj tau thiab cov qhev uas yug rau hauv tus pov thawj tsev kuj noj tau tej zaub mov ntawd.

12 Yog pov thawj tej ntxhais mus yuav txiv rau cov uas tsis ua pov thawj mas nws kuj noj tsis nyog tej uas xyeem dawb huv ntawd.

13 Tiamsis yog pov thawj tug ntxhais ntawd ua poj ntsuam lossis ua poj nrauj lawm thiab tsis muaj menyuam es rov los nyob hauv leej txiv tsev ib yam nkaus li thaum hluas nkauj, mas nws kuj noj tau leej txiv tej zaub mov ntawd.  Tiamsis cov uas nyob sab nraud noj tsis nyog.

14 Yog leejtwg tsis paub es nws tau noj tej uas xyeem dawb huv ntawd lawm, mas nws yuav tau pauj tej ntawd rov rau tus pov thawj thiab ntxiv ib feem hauv tsib rau nws.

15 Cov pov thawj tsis txhob muab tej qhov txhia chaw dawb huv uas cov Ixayees muab xyeem rau (יחוח)Yahweh ntawd ua puas tsuas qias tsis huv, 

16 tsam ces ua rau cov Ixayees raug txim, rau qhov uas cia lawv noj txhaum tej qhov txhia chaw uas xyeem dawb huv, rau qhov kuv yog (יחוח)Yahweh uas cais cov pov thawj ua cov uas dawb huv.

17 (יחוח)Yahweh hais rau Mauxes tias, 

18 cia li hais rau Aloos thiab nws cov tub thiab cov Ixayees sawvdaws tias, thaum cov Ixayees lossis lwm haiv neeg uas nrog cov Ixayees nyob, leejtwg muab qhov txhia chaw xyeem, txawm yog nws pauj tej uas nws fiv cia lawd lossis nws zoo siab muab xyeem pub xwb ua kevcai hlawv huvsi xyeem rau (יחוח)Yahweh,

19 yog yuav ua kom (יחוח)Yahweh txais yuav mas nej yuav tau muab ib tug txiv tsiaj uas tsis muaj chaw thuam li xyeem, uas yog ib tug txiv nyuj lossis txiv yaj lossis txiv tshis.

20 Nej tsis txhob muab tej uas muaj chaw thuam xyeem, vim (יחוח)Yahweh tsis txais yuav.

21 Thaum leejtwg muab ib tug nyuj lossis yaj xyeem rau (יחוח)Yahweh ua kevcai xyeem sib raug zoo, yog nws pauj tej uas nws fiv cia lawd lossis nws zoo siab muab xyeem pub xwb, mas tus tsiaj ntawd yuav tau yog ib tug zoo kawg thiab yuav tau tsis txhob muaj chaw thuam kiag li, (יחוח)Yahweh thiaj li txais yuav.

22 Tej tsiaj uas dig muag, lossis ceg tawv, lossis muab txiav, muab hlais, lossis muaj kiav txhab ua kua paug, lossis liam txwv, lossis mob cos, nej tsis txhob muab xyeem rau (יחוח)Yahweh lossis muab hlawv kub nyhiab xyeem rau (יחוח)Yahweh saum lub thaj.

23 Tej txiv nyuj lossis tej menyuam yaj uas lub cev hlob tsis sib luag, ib ceg ntev ib ceg luv, mas nej muab xyeem tau li uas nej zoo siab muab pub xyeem, tiamsis yog muab xyeem pauj tej uas nej fiv cia lawd, mas

(יחוח)Yahweh tsis txais yuav.

24 Tej tsiaj uas noob qes ntsoog, lossis muab tsoo, lossis muab dua, lossis muab txiav, nej tsis txhob muab xyeem rau (יחוח)Yahweh lossis tua xyeem rau hauv nej lub tebchaws.

25 Tsis txhob muab tej tsiaj zoo li no uas nej tau ntawm lwm haiv neeg los xyeem ua zaub mov rau nej Tus Tswv.  Tej tsiaj ntawd muaj chaw thuam, vim raug muab txiav muab hlais, ces (יחוח)Yahweh tsis txais yuav.

26 (יחוח)Yahweh hais rau Mauxes tias,

27 thaum nyuj thiab yaj thiab tshis yug menyuam, mas cia tus menyuam nrog niam nyob xya hnub.  Txij hnub uas yim mus, mas yuav muab hlawv xyeem rau (יחוח)Yahweh los kuj tau lawm, (יחוח)Yahweh txais yuav.

28 Tus niam tsiaj ntawd, tsis hais yog nyuj los yaj nej tsis txhob muab tua nrog tus menyuam ua ib hnub.

29 Thaum nej tua tsiaj xyeem ua (יחוח)Yahweh tsaug, nej yuav tau tua xyeem raws li kevcai (יחוח)Yahweh thiaj txais yuav nej.

30 Nej yuav tau noj tej nqaij ntawd kom tag rau tib hnub ntawd, tsis txhob tseg ib yam cia txog kaj ntug.  Kuv yog (יחוח)Yahweh.

31 Nej yuav tau tuav rawv kuv tej lus cob qhia thiab ua raws nraim.  Kuv yog (יחוח)Yahweh. 

32 Nej tsis txhob ua puas tsuas kuv lub npe uas dawb huv poob koob. Kuv xav kom cov Ixayees sawvdaws hwm tias kuv dawb huv. Kuv yog (יחוח)Yahweh uas cais kom nej dawb huv.

33 Kuv yog tus uas coj nej tawm hauv Iziv tebchaws los, kuv thiaj tau ua nej Tus Tswv.  Kuv yog (יחוח)Yahweh.