Tej Kevcai Uas Teem Tseg

(Xwm Txheej Taug Kev 28:16-31,29:1-40)

1 (יחוח)Yahweh hais rau Mauxes tias,

2 cia li hais rau cov Ixayees tias, (יחוח)Yahweh tej kevcai uas teem tseg uas nej yuav tau tshaj tawm tias yog lub sijhawm uas tuaj txoos ua ke ua kevcai dawb huv, yog tej kevcai uas kuv teem tseg mas yog li no.

3 Nej yuav tau ua haujlwm rau hnub, mas hnub xya yog hnub Sabbath uas caiv so tiag tiag li, yog hnub uas tuaj txoos ua ke ua kevcai dawb huv. Tsis txhob ua hauj lwm kiag li, yog hnub Sabbath uas so rau (יחוח)Yahweh rau hauv txhua lub chaw uas nej nyob.

4 Tej no yog tej kevcai uas (יחוח)Yahweh teem tseg, yog tej lub sijhawm uas tuaj txoos ua ke ua kevcai dawb huv. Nej yuav tau tshaj tawm raws tej sijhawm uas teem cia.

5 Hnub xiab kaum plaub, lub ib hlis, thaum yuav tsaus ntuj, yuav ua (יחוח)Yahweh li kevcai Hla Dhau.

6 Hnub xiab kaum tsib, lub hli ntawd, yuav ua kevcai noj ncuav tsis xyaw keeb rau (יחוח)Yahweh. Nej yuav noj ncuav tsis xyaw keeb xya hnub.

7 Thawj hnub nej yuav tuaj txoos ua ke ua kevcai dawb huv. Nej tsis txhob ua ib yam haujlwm nyhav kiag li.

8 Nej yuav muab tsiaj hlawv xyeem rau (יחוח)Yahweh xya hnub.  Hnub uas xya, yog hnub uas tuaj txoos ua ke ua kevcai dawb huv, nej

tsis txhob ua ib yam haujlwm nyhav kiag li.

9 (יחוח)Yahweh hais rau Mauxes tias, 

10 Cia li hais rau cov Ixayees tias, thaum nej mus txog lub tebchaws uas kuv pub rau nej thiab nej sau tej qoob hauv lub tebchaws ntawd, nej yuav tau coj ib teg qoob uas nej hlais thawj phaum tuaj rau tus pov thawj.

11 Tus pov thawj yuav muab tes qoob ntawd cev xyeem rau (יחוח)Yahweh kom (יחוח)Yahweh thiaj li txais yuav nej.  Nws yuav muab cev xyeem rau hnub tom qab hnub Sabbath.

12 Hnub uas nej ua kevcai cev xyeem tes qoob ntawd, nej yuav tau coj ib tug menyuam txiv yaj hnub nyoog ib xyoos uas tsis muaj chaw thuam li tuaj ua kevcai hlawv xyeem rau (יחוח)Yahweh.

13 Tej uas muab ua kevcai xyeem qoob loo ua ke, yog muab ob feem kaum hauv ib efas hmoov mog zoo zoo, ntse roj hlawv xyeem rau (יחוח)Yahweh ua kom muaj pa ncho tsw qab, thiab ib feem plaub hauv ib hees cawv txiv hmab ua kevcai hliv xyeem.

14 Nej tsis txhob noj cov qoob tshiab, tsis hais muab ua ncuav lossis muab kib los noj nyoos, tos txog thaum uas coj tuaj ua kevcai li no xyeem rau nej Tus Tswv tag tso.  No yog txoj kevcai rau nej txhua tiam mus ib txhis rau hauv txhua lub chaw uas nej nyob.

15 Nej yuav tau suav txij hnub tom qab hnub Sabbath uas yog hnub nej coj thawj teg qoob tuaj cev xyeem kom puv xya lub chib so.

16 Nej yuav suav tsib caug hnub mus txog hnub tom qab hnub Sabbath uas xya, li muab tej mog tshiab tuaj ua kevcai xyeem qoob loo rau (יחוח)Yahweh.

17 Nej yuav coj ob lub ncuav uas muab ob feem kaum hauv ib efas hmoov mog zoo zoo uas xyaw keeb, ua tawm hauv nej lub chaw nyob tuaj cev xyeem ua thawj phaum qoob xyeem rau (יחוח)Yahweh.

18 Nej yuav coj xya tus menyuam yaj uas hnub nyoog ib xyoos uas tsis muaj chaw thuam li, thiab ib tug thav txiv nyuj, thiab ob tug txiv yaj tuaj nrog cov ncuav xyeem ua ke. Tej no yog tej uas ua kevcai hlawv xyeem rau (יחוח)Yahweh, thiab tej uas ua kevcai xyeem qoob loo, thiab ua kevcai hliv xyeem, yog yam uas hlawv kub nyhiab xyeem ua kom muaj pa ncho tsw qab haum (יחוח)Yahweh lub siab.

19 Nej yuav tau xyeem ib tug txiv tshis ua kevcai daws txim, thiab xyeem ob tug menyuam txiv yaj hnub nyoog ib xyoos ua kevcai sib raug zoo.

20 Tus pov thawj yuav muab ob tug menyuam yaj nrog cov ncuav uas yog thawj phaum qoob cev xyeem ua ke ua kevcai cev xyeem rau (יחוח)Yahweh.  Tej no yog tej uas dawb huv rau (יחוח)Yahweh muab ua pov thawj li feem.

21 Tib hnub ntawd, nej yuav tshaj tawm.  Nej yuav tuaj txoos ua ke ua kevcai dawb huv, nej tsis txhob ua haujlwm nyhav kiag li. No yog tej kab ke rau nej txhua tiam mus ib txhis rau hauv txhua lub chaw uas nej nyob.

22 Thaum nej hlais tej qoob hauv teb, nej tsis txhob hlais kom tag tej uas nyob ntawm ntug teb, thiab thaum sau tag, tsis txhob xawb tej uas tshuav. Yuav tseg cia rau cov tibneeg pluag thiab lwm haiv neeg uas nrog nej nyob.  Kuv yog (יחוח)Yahweh yog nej Tus Tswv.

23 (יחוח)Yahweh hais rau Mauxes tias, 

24 cia li hais rau cov Ixayees tias, hnub xiab ib, lub xya hli, nej yuav tau nco ntsoov caiv so tiag tiag li, yog hnub uas tshuab raj kub yaj tshaj tawm, yog hnub uas tuaj txoos ua ke ua kevcai dawb huv.

25 Nej tsis txhob ua haujlwm nyhav, thiab nej yuav tau coj tej uas hlawv xyeem tuaj xyeem rau (יחוח)Yahweh.

26 (יחוח)Yahweh hais rau Mauxes tias,

27 Hnub xiab kaum, lub xya hli no yog hnub uas ua kevcai ntxuav kev txhaum. Yuav ua hnub uas nej tuaj txoos ua ke ua kevcai dawb huv, thiab nej yuav tswj nej lub siab thiab coj tej uas hlawv xyeem tuaj xyeem rau (יחוח)Yahweh.

28 Hnub ntawd nej tsis txhob ua haujlwm abtsi li, rau qhov yog hnub ntxuav kev txhaum, kom thiaj ntxuav tau nej tej kev txhaum rau ntawm nej Tus Tswv (יחוח)Yahweh xub ntiag.

29 Hnub ntawd yog leejtwg tsis tswj nws lub siab, tus ntawd yuav raug muab txiav tawm hauv nws haiv neeg.

30 Thiab hnub ntawd yog leejtwg ua ib yam haujlwm abtsi, kuv yuav muab tus ntawd ua kom puam tsuaj hauv nws haiv neeg mus.

31 Nej tsis txhob ua haujlwm kiag li.  No yog tej kab ke rau nej txhua tiam mus ib txhis rau hauv txhua lub chaw uas nej nyob.

32 Hnub ntawd yuav ua hnub Sabbath uas caiv so tiag tiag, thiab nej yuav tswj nej lub siab. Thaum tsaus ntuj, hnub xiab cuaj, lub hlis ntawd nej yuav tuav rawv hnub Sabbath mus txog hnub tom qab tsaus ntuj.

33 (יחוח)Yahweh hais rau Mauxes tias, 

34 cia li hais rau cov Ixayees tias, hnub xiab kaum tsib lub xya hli no, yog kevcai nyob tsev pheeb suab rau (יחוח)Yahweh kom puv xya hnub.

35 Thawj hnub yuav ua hnub uas tuaj txoos ua ke ua kevcai dawb huv. Nej tsis txhob ua haujlwm nyhav.

36 Nej yuav coj tej uas hlawv xyeem tuaj xyeem rau (יחוח)Yahweh kom puv xya hnub. Hnub uas yim, nej yuav tuaj txoos ua ke ua kevcai dawb huv thiab coj tej uas hlawv xyeem tuaj xyeem rau (יחוח)Yahweh. Yog tuaj txoos ua ke caiv so.  Nej tsis txhob ua haujlwm nyhav kiag li.

37 Tej no yog (יחוח)Yahweh tej kevcai uas teem tseg uas nej yuav tau tshaj tawm tias yog lub sijhawm uas tuaj txoos ua ke ua kevcai dawb huv, thiab yuav coj tej uas xyeem tuaj hlawv xyeem rau (יחוח)Yahweh, yog tej uas yuav ua kevcai hlawv huvsi xyeem, thiab ua kevcai xyeem qoob loo, thiab tej tsiaj uas tua xyeem, thiab tej uas muab hliv xyeem, txhua yam yuav tau ua raws li sijhawm.

38 Tej no yog ua tshaj tej uas ua rau (יחוח)Yahweh hnub Sabbath, thiab tshaj tej uas nej muab xyeem, thiab tshaj txhua yam uas nej fiv cia lawd, thiab tshaj tej uas nej zoo siab muab xyeem pub huvsi, uas nej pub xyeem rau (יחוח)Yahweh.

39 Thaum nej sau tej qoob loo hauv lub tebchaws tag lawm, mas hnub xiab kaum tsib lub xya hli, nej yuav ua qhov kevcai no rau (יחוח)Yahweh xya hnub.  Thawj hnub yuav ua hnub uas caiv so tiag tiag, thiab hnub uas yim kuj yuav ua hnub uas caiv so tiag tiag thiab.

40 Thawj hnub nej yuav de tej txiv ntoo zoo zoo, thiab tej nplooj toov laj, thiab tej rev nplooj ntoo, thiab tej ceg ntoo lwg zoo tuaj.  Nej yuav zoo siab xyiv fab xya hnub rau ntawm (יחוח)Yahweh uas yog nej Tus Tswv xubntiag.

41 Nej yuav tau nco ntsoov ua qhov kevcai no ib xyoos xya hnub rau (יחוח)Yahweh. No yog tej kab ke rau nej txhua tiam mus ib txhis.  Nej yuav tau ua qhov kevcai no rau lub xya hli.

42 Nej yuav nyob hauv tsev pheeb suab xya hnub.  Txhua tus uas yog tibneeg Ixayees yuav tau nyob hauv tsev pheeb suab, 

43 xwv nej txhua tiam thiaj paub tias thaum kuv coj cov Ixayees tawm hauv Iziv tebchaws los, kuv ua rau lawv nyob hauv tsev pheeb suab. Kuv yog (יחוח)Yahweh yog nej Tus Tswv.

44 Ua li no Mauxes thiaj qhia rau cov Ixayees paub txog (יחוח)Yahweh tej kevcai uas teem tseg.