Tu Thiab Saib Lub Teeb

(Khiavdim 27:20-21)

1 (יחוח)Yahweh hais rau Mauxes tias,

2 koj cia li hais rau cov Ixayees kom coj cov tseem roj uas tsuam ntawm txiv aulib tuaj rau koj sam lub teeb, xwv lub teeb thiaj cig mus li.

3 Aloos yuav tau tu lub teeb uas nyob hauv lub tsev ntaub sib ntsib ntawm daim ntaub thaiv lub phij xab uas muaj (יחוח)Yahweh tej lus sab nraum no, txij thaum tsaus ntuj mus txog kaj ntug, tsis tu ncua li rau ntawm (יחוח)Yahweh xubntiag.  No yog txoj kab ke rau nej txhua tiam mus ib txhis.

4 Aloos yuav tu tej teeb uas nyob saum tus kav teeb uas tseem kub rau ntawm (יחוח)Yahweh xubntiag tsis tu ncua li. Tej Ncuav ntawm (יחוח)Yahweh xubntiag,

5 koj yuav muab cov hmoov mog zoo zoo ua kaum ob lub ncuav.  Ib lub ncuav siv ob feem kaum hauv ib efas hmoov mog.

6 Koj yuav txawb cov ncuav no rau saum lub rooj uas tseem kub ua ob leej, ib leej rau lub.

7 Koj yuav muab cov roj ntoos tsw qab uas zoo zoo rau rau ob leej huvsi, kom thiaj nrog cov ncuav ua chaw rau (יחוח)Yahweh nco ntsoov thiab muab ua yam uas hlawv xyeem rau (יחוח)Yahweh.

8 Txhua hnub Sabbath, Aloos yuav tau muab txawb tsis tu ncua raws li kevcai ua cov Ixayees tug rau ntawm (יחוח)Yahweh xubntiag, ua lo lus cog tseg mus ib txhis.

9 Cov ncuav no yuav poob ua Aloos thiab nws cov tub li feem, mas lawv yuav noj rau hauv ib lub chaw uas dawb huv, rau qhov yog yam uas dawb huv kawg nkaus rho ntawm tej uas muab hlawv kub nyhiab xyeem rau (יחוח)Yahweh los, yog lawv li feem mus ib txhis li.  

​

Rau Txim Rau Tus Uas Tuam Mom ()Yahweh Lub Npe

10 Muaj ib tug yawg, nws niam yog tibneeg Ixayees, nws txiv yog tibneeg Iziv, txawm mus tsham cov Ixayees, mas nws nrog ib tug yawg Ixayees sib cav sib ceg hauv lub zos.

11 Tus yawg uas nws niam yog tibneeg Ixayees ntawd hais lus tuam mom cem foom (יחוח)Yahweh lub npe. Lawv thiaj coj nws tuaj rau Mauxes. Nws niam npe hu ua Selaumis uas yog Dinplis, yog xeem Daj tus ntxhais.

12 Lawv thiaj muab tus yawg ntawd kaw cia tos txog thaum (יחוח)Yahweh qhia tej uas (יחוח)Yahweh lub siab xav rau lawv paub.

13 Mas (יחוח)Yahweh hais rau Mauxes tias,

14 cia li coj tus cem foom ntawd rau sab nraum ntug zos, mas kom cov uas hnov nws cem foom sawvdaws muab tes npuab rau saum nws taubhau, mas ib tsoom pejxeem xuas pob zeb ntaus kom nws tuag.

15 Koj cia li hais rau cov Ixayees tias, leejtwg cem foom nws Tus Tswv, nws yuav ris nws lub txim.

16 Tus uas tuam mom (יחוח)Yahweh lub npe, yuav raug muab tua pov tseg.  Ib tsoom pejxeem yuav xuas pob zeb ntaus nws kom tuag.  Lwm haiv neeg uas nrog nej nyob lossis cov Ixayees thaum tus twg tuam mom (יחוח)Yahweh lub npe, nws yuav raug muab tua pov tseg.

17 Tus uas tua tibneeg, kuj yuav raug muab tua pov tseg.

18 Tus uas tua lwm tus li tsiaj txhu, yuav tau them siav pauj siav.

19 Yog leejtwg ua rau nws kwvtij zej zog raug mob, kuj yuav ua rau nws ib yam nkaus li nws tau ua rau luag lawm, 

20 pob txha lov pauj pob txha lov, qhov muag pauj qhov muag, hniav pauj hniav. Nws ua rau luag raug mob li cas, nws yuav raug mob ib yam li ntawd.

21 Tus uas tua lwm tus li tsiaj txhu, yuav tau them pauj.  Tus uas tua tibneeg, nws yuav tau raug muab tua pov tseg.

22 Nej yuav tau siv tib txoj kevcai rau lwm haiv neeg uas nrog nej nyob thiab rau cov Ixayees, rau qhov kuv yog (יחוח)Yahweh yog nej Tus Tswv.

23 Mauxes thiaj hais li ntawd rau cov Ixayees, mas lawv thiaj coj tus uas cem foom ntawd tawm mus rau sab nraum ntug zos thiab xuas pob zeb ntaus nws kom tuag.  Ua li no, cov Ixayees thiaj ua raws li (יחוח)Yahweh hais rau Mauxes.