Kevcai Xyeem Sib Raug Zoo

1 Yog leejtwg muab ib tug nyuj ua kevcai xyeem sib raug zoo, mas txawm yog muab txiv nyuj, los maum nyuj, nws yuav tau muab tus tsiaj uas tsis muaj chaw thuam li xyeem rau ntawm (יחוח)Yahweh xubntiag.

2 Nws yuav tau muab tes npuab saum tus tsiaj uas yuav muab xyeem ntawd taubhau, thiab muab tua kiag rau ntawm lub qhov rooj tsev ntaub sib ntsib.  Mas Aloos cov tub uas ua pov thawj yuav muab cov ntshav nchos lo puag ncig lub thaj.

3 Tus tsiaj uas tua xyeem ua kevcai xyeem sib raug zoo ntawd, mas tej uas nws yuav muab hlawv kub nyhiab xyeem rau (יחוח)Yahweh yog tej no, yog cov hlab hluas roj hauv nrog cev, thiab cov hlab hluas roj uas lo plab nyhuv huvsi, 

4 thiab ob lub raum, thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los.

5 Aloos cov tub yuav muab tej no hlawv saum lub thaj nrog tus tsiaj uas muab hlawv huvsi xyeem ua ke uas nyob saum cub tawg, yog yam uas muab hlawv kub nyhiab xyeem ua kom muaj pa ncho tsw qab haum (יחוח)Yahweh lub siab.

6 Yog nws muab yaj lossis tshis tua xyeem rau (יחוח)Yahweh ua kevcai xyeem sib raug zoo, mas txawm yog txiv los maum, los nws yuav tau muab tus uas tsis muaj chaw thuam li.

7 Yog nws muab ib tug menyuam yaj xyeem mas nws yuav coj tuaj xyeem rau ntawm (יחוח)Yahweh xub ntiag.

8 Nws yuav tau muab tes npuab saum tus tsiaj uas yuav muab xyeem ntawd taubhau, thiab muab tua kiag rau ntawm lub tsev ntaub sib ntsib.  Mas Aloos cov tub yuav muab cov ntshav nchos lo puag ncig lub thaj.

9 Tus tsiaj uas tua xyeem ua kevcai xyeem sib raug zoo ntawd, mas tej uas nws yuav muab hlawv kub nyhiab xyeem rau (יחוח)Yahweh yog tej no, yog cov hlab hluas roj, thiab tus kotw rog rog uas muab txiav ti nkaus txha nrob qaum, thiab cov hlab hluas roj hauv nrog cev, thiab cov hlab hluas roj uas lo plab nyhuv huvsi, 

10 thiab ob lub raum, thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los.

11 Mas tus pov thawj yuav muab tej no hlawv rau saum lub thaj, yog tej zaub mov uas muab hlawv kub nyhiab xyeem rau (יחוח)Yahweh.

12 Yog nws muab ib tug tshis xyeem mas nws yuav tau muab xyeem rau ntawm

(יחוח)Yahweh xubntiag, 

13 thiab nws yuav muab tes npuab saum tus tshis ntawd taubhau, thiab muab tua kiag rau ntawm lub tsev ntaub sib ntsib.  Mas Aloos cov tub yuav muab cov ntshav nchos lo puag ncig lub thaj.

14 Tus tsiaj uas xyeem ntawd tej uas nws yuav muab hlawv kub nyhiab xyeem rau (יחוח)Yahweh yog tej no, cov hlab hluas roj hauv nrog cev, thiab cov hlab hluas roj uas lo plab nyhuv huvsi, 

15 thiab ob lub raum, thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los.

16 Tus pov thawj yuav muab tej no hlawv rau saum lub thaj, yog tej zaub mov uas muab hlawv kub nyhiab xyeem, ua kom muaj pa tsw qab. Tej hlab hluas roj huvsi yog (יחוח)Yahweh li feem.

17 Nej yuav tau coj tej kevcai no ib tiam dhau ib tiam mus ib txhiab ib txhis li rau txhua lub chaw uas nej mus nyob, nej tsis txhob noj tej hlab hluas roj thiab cov ntshav.