Kevcai Uas Yeem Pub Rau (יחוח)Yahweh

1 (יחוח)Yahweh hais rau Mauxes tias,

2 cia li hais rau cov Ixayees tias, thaum leejtwg yeem lus tseem ceeb tias nws yuav pub kiag tibneeg rau (יחוח)Yahweh ua (יחוח)Yahweh tug, mas yuav xam nqi txhiv li no.

3 Tus txivneej uas hnub nyoog muaj nees nkaum txog rau caum xyoo, mas ntaus nqi tsib caug sekhees nyiaj, raws li sekhees uas siv hauv lub chaw pe hawm (יחוח)Yahweh.

4 Yog ib tug pojniam mas ntaus nqi peb caug sekhees nyiaj.

5 Yog tus ntawd hnub nyoog muaj tsib xyoos txog nees nkaum xyoo, mas ntaus nqi rau tus tub nees nkaum sekhees nyiaj, thiab tus ntxhais kaum sekhees.

6 Yog tus ntawd hnub nyoog muaj ib hlis txog tsib xyoo mas ntaus nqi rau tus tub tsib sekhees nyiaj thiab ntaus nqi rau tus ntxhais peb sekhees.

7 Yog tus ntawd hnub nyoog muaj rau caum xyoo rov saud yuav ntaus nqi rau tus txivneej kaum tsib sekhees nyiaj thiab rau tus pojniam kaum sekhees.

8 Yog leejtwg pluag pluag them tsis taus raws li nej ntaus nqi lawm, mas yuav coj tus tibneeg uas muab pub rau (יחוח)Yahweh ntawd, tuaj cuag tus pov thawj mas tus pov thawj yuav ntaus nqi rau nws raws li tus uas yeem lus them taus.

9 Yog nws cog lus tseg hais tias nws yuav pub ib tug tsiaj uas tsis muaj chaw thuam li xyeem rau (יחוח)Yahweh, mas txhua yam uas nws muab pub rau (יחוח)Yahweh ntawd dawb huv lawm.

10 Nws tsis txhob coj abtsi tuaj pauv tuaj txauv, muab yam uas zoo pauv yam uas tsis zoo lossis muab yam uas tsis zoo pauv yam uas zoo. Yog nws muab tsiaj txauv li ntawd mas tus uas txauv thiab tus uas raug muab txauv kuj dawb huv ib yam nkaus.

11 Yog nws pub ib tug tsiaj qias tsis huv uas yeej tsis yog yam tsiaj uas pub xyeem rau (יחוח)Yahweh, mas yuav coj tus tsiaj ntawd mus cuag tus pov thawj.

12 Mas tus pov thawj yuav ntaus nqi raws li tus tsiaj zoo lossis tsiaj tsis zoo. Tus pov thawj ntaus nqi npaum li cas kuj cia yuav npaum li ntawd.

13 Yog tus tswv xav txhiv tus tsiaj ntawd rov qab, nws yuav tau ntxiv ib feem hauv tsib rau tus nqi uas ntaus lawd.

14 Thaum leejtwg cais pub kiag nws lub tsev ua yam uas dawb huv rau (יחוח)Yahweh, mas tus pov thawj yuav ntaus nqi raws li lub tsev zoo lossis tsis zoo. Tus pov  thawj ntaus nqi npaum li cas, kuj cia yuav raws li ntawd.

15 Yog tus uas pub kiag lub tsev ntawd xav txhiv lub tsev rov qab, kuj cia nws ntxiv ib feem hauv tsib rau tus nqi uas ntaus lawd, mas lub tsev thiaj rov ua nws tug.

16 Yog leejtwg muab nws ib thaj teb uas yog nws niam nws txiv qub txeeg qub teg cais pub rau (יחוח)Yahweh, mas yuav ntaus nqi rau daim teb ntawd raws li ntim taus noob qoob ntau los tsawg. Yog daim teb ntim tag ib haumaws cov noob qoob mas ntaus nqi tsib caug sekhees nyiaj.

17 Yog nws pub daim teb rau xyoo Zoo Siab uas thim txhua yam rov qab, kuj ntaus nqi txwm nkaus li nej hais.

18 Yog nws pub daim teb tom qab xyoo Zoo Siab ntawd, kuj cia tus pov thawj xam nqi raws li cov niaj xyoo uas tseem tshuav mus txog xyoo Zoo Siab tom ntej, mas yuav nqis nqi tsis yuav txwm li nej xub hais.

19 Yog tus uas pub daim teb ntawd xav txhiv daim teb rov qab, nws yuav tau ntxiv ib feem hauv tsib rau tus nqi uas ntaus lawd, daim teb thiaj rov ua nws li.

20 Yog nws tsis tau txhiv daim teb lossis yog nws muab daim teb muag rau lwm tus lawm, mas tsis pub nws txhiv li lawm.

21 Daim teb ntawd mas thaum yuav muab tso dawb tseg rau xyoo Zoo Siab uas thim txhua yam rov qab, yuav muab ua daim teb uas dawb huv rau (יחוח)Yahweh, zoo li ib daig teb uas muab cais rau (יחוח)Yahweh lawm, tus pov thawj yuav ua tswv teb mus li.

22 Yog nws muab daim teb uas nws yuav los cais pub rau (יחוח)Yahweh, tsis yog daim uas nws txiv qub txeeg qub teg, 

23 tus pov thawj yuav xam daim teb ntawd li nqi mus txog xyoo Zoo Siab, mas hnub ntawd tus tswv teb yuav tau them nyiaj npaum li uas ntaus nqi cia

ua yam uas dawb huv rau (יחוח)Yahweh.

24 Thaum txog xyoo Zoo Siab, daim teb ntawd poob rov rau tus qub tswv uas muag rau nws, vim daim teb ntawd yog tus qub tswv li qub txeeg qub teg.

25 Yuav tau ntaus nqi rau txhua yam raws li nyiaj sekhees uas siv hauv lub chaw pe hawm (יחוח)Yahweh. Nees nkaum kelas muaj ib sekhees.

26 Thawj tug menyuam tsiaj txhu mas tsis txhob kheev leejtwg muab cais pub kiag rau (יחוח)Yahweh, rau qhov thawj tug menyuam tsiaj yeej yog (יחוח)Yahweh li lawm, tsis hais nyuj los yaj los yeej yog (יחוח)Yahweh li.

27 Yog nws pub ib tug tsiaj qias tsis huv, ces kom nws them nyiaj yuav rov qab raws li tus nqi uas koj ntaus thiab ntxiv ib feem hauv tsib rau saud. Yog nws tsis txhiv mas muab tus tsiaj ntawd muag raws li tus nqi uas koj ntaus cia lawd.

28 Tiamsis yam twg uas yog nws li es nws muab pub kiag rau (יחוח)Yahweh lawm, tsis hais tibneeg lossis tsiaj txhu, lossis teb uas yog nws niam nws txiv qub txeeg qub teg, mas muag tsis tau thiab txhiv tsis tau li. Rau qhov txhua yam uas muab pub kiag ntawd, yog yam uas dawb huv kawg nkaus rau (יחוח)Yahweh.

29 Cov tibneeg uas raug muab cais pub rau (יחוח)Yahweh ua kom puam tsuaj tag, mas txhiv tsis tau kiag li, yuav tau muab cov ntawd tua pov tseg.

30 Ib feem hauv kaum tag nrho uas tau hauv lub tebchaws, yog tej qoob loo thiab tej txiv hmab txiv ntoo puavleej yog (יחוח)Yahweh li, yog tej uas dawb huv rau (יחוח)Yahweh.

31 Yog leejtwg xav txhiv ib feem kaum ntawd ib qho rov rau nws, nws yuav tau ntxiv ib feem hauv tsib rov saud.

32 Ib feem kaum uas tau hauv tej nyuj, tej tshis, tej yaj, uas yog ib tug hauv kaum tus uas chaws tus qhev yug tus pas nrig, mas yog tej tsiaj uas dawb huv rau (יחוח)Yahweh.

33 Nws tsis txhob xaiv saib yog tus zoo los tsis zoo thiab tsis txhob muab txauv.  Yog nws muab txauv mas tus uas coj tuaj txauv thiab tus uas raug muab txauv puavleej dawb huv huvsi lawm txhiv tsis tau.

34 Tej no yog tej lus cob qhia uas (יחוח)Yahweh cob rau Mauxes saum lub roob Xinais kom coj los rau cov Ixayees.