Kevcai Ntxuav Kev Txaug  Kev Txhaum

1 No yog tej kab ke uas ua kevcai ntxuav kev txaug kev txhaum, yog yam uas dawb huv kawg nkaus.

2 Yuav tau muab tus tsiaj uas ua kevcai ntxuav kev txaug kev txhaum tua ntawm tib lub chaw uas tua tsiaj ua kevcai hlawv huvsi xyeem, thiab muab cov ntshav nchos rau saum lub thaj puag ncig lub thaj.

3 Yuav muab cov hlab hluas roj huvsi xyeem, thiab muab tus kotw rog rog, thiab cov hlab hluas roj uas lo plab nyhuv, 

4 thiab ob lub raum, thiab cov hlab hluas roj ntawm lub duav, thiab cov hlab hluas roj uas lo cov siab uas yuav muab kaus kiag nrog lub raum los.

5 Tus pov thawj yuav muab tej no hlawv saum lub thaj, yog yam uas muab hlawv kub nyhiab xyeem rau (יחוח)Yahweh. Qhov no yog ua kevcai ntxuav kev txaug kev txhaum.

6 Txhua tus txivneej uas ua pov thawj noj tau cov nqaij ntawd, tiamsis yuav tau noj ntawm lub chaw uas dawb huv, yog yam uas dawb huv kawg nkaus.

7 Tej kab ke uas ua kevcai ntxuav kev txaug kev txhaum thiab ua kevcai xyeem daws txim, kuj ua zoo ib yam nkaus. Tus pov thawj uas ua kevcai ntxuav kev txhaum txim ntawd, yuav tau cov nqaij ntawd.

8 Tus pov thawj twg uas muab leejtwg tus tsiaj ua kevcai hlawv huvsi xyeem, mas nws yeej tau tus tsiaj uas hlawv huvsi xyeem ntawd, daim tawv ua nws tug.

9 Txhua yam uas muab los ua kevcai xyeem qoob loo, tsis hais ncuav cub, ncuav kib, ncuav ci saum ntxaij hlau los puavleej yog tus pov thawj uas ua kevcai xyeem ntawd li feem.

10 Txhua yam uas muab los ua kevcai xyeem qoob loo uas muab ntse roj thiab tsis ntse los puavleej yog Aloos cov tub sawvdaws li feem sib npaug zos.  

​

Kevcai Xyeem Sib Raug Zoo

11 No yog tej kab ke uas yuav ua rau thaum leejtwg tua tsiaj xyeem rau (יחוח)Yahweh ua kevcai xyeem sib raug zoo.

12 Yog nws muab tej no ua kevcai ua (יחוח)Yahweh tsaug, nws yuav tau coj cov ncuav tsis xyaw keeb uas ntse roj, thiab cov ncuav nyias nyias tsis xyaw keeb uas pleev roj, thiab cov ncuav uas muab cov hmoov mog uas zoo zoo ntse roj tov ua, nrog tus tsiaj uas ua kevcai xyeem ua tsaug ua ke tuaj.

13 Nws yuav tau coj cov ncuav uas xyaw keeb nrog tus tsiaj uas tua ua kevcai xyeem sib raug zoo thiab xyeem ua (יחוח)Yahweh tsaug ua ke tuaj xyeem.

14 Nws yuav muab tej ncuav ib yam ib lub xyeem pub rau (יחוח)Yahweh. Mas tej no yog tus pov thawj li feem, yog tus pov thawj uas muab cov ntshav uas ua kevcai xyeem sib raug zoo nchos rau lub thaj.

15 Tus tsiaj uas tua ua kevcai xyeem sib raug zoo thiab xyeem ua

(יחוח)Yahweh tsaug, cov nqaij mas yuav tau noj kom tag rau hnub uas muab xyeem ntawd, tsis txhob tseg ib qho txog kaj ntug.

16 Yog nws muab ib tug tsiaj xyeem ua kevcai pauj tej uas nws fiv cia lawd, lossis nws cia li zoo siab muab xyeem pub xwb, mas noj tau rau hnub uas muab xyeem ntawd, thiab hnub tom qab lawv tseem noj tau tej nqaij uas tshuav thiab.

17 Tus tsiaj uas muab tua xyeem ntawd mas cov nqaij uas tseem tshuav txog hnub peb mas cia li muab hlawv huvsi tseg.

18 Yog leej twg noj tej nqaij uas tua ua kevcai xyeem sib raug zoo rau hnub peb, mas (יחוח)Yahweh tsis txais yuav tus uas xyeem ntawd lawm, thiab tej uas nws ua kevcai xyeem ntawd, tsis muaj qabhau rau tus tswv tsiaj lawm, tej ntawd kuj qias vuab tsuab lawm thiab. Tus uas noj tej nqaij ntawd yuav ris nws lub txim.

19 Cov nqaij uas nphav tej yam qias tsis huv, mas tsis txhob noj, cia li muab hlawv huvsi tseg. Cov nqaij uas tseem huv mas txhua tus uas huv noj tau.

20 Tiamsis yog leejtwg uas tseem qias tsis huv noj tej nqaij uas muab tua xyeem rau (יחוח)Yahweh, ua kevcai sib raug zoo, mas nws yuav raug muab txiav tawm hauv nws haiv neeg mus.

21 Yog leejtwg mus kov raug tej yam uas qias tsis huv, tsis hais yog tibneeg li, los yog tsiaj txhu li, lossis ib yam abtsi uas qias vuab tsuab, nws tseem los noj tej nqaij uas muab tua xyeem rau (יחוח)Yahweh ua kevcai sib raug zoo, mas tus ntawd yuav raug muab txiav tawm hauv nws haiv neeg mus.

22 (יחוח)Yahweh hais rau Mauxes tias,

23 koj cia li hais rau cov Ixayees tias, nej tsis txhob noj nyuj, thiab yaj, thiab tshis tej hlab hluas roj.

24 Tej tsiaj uas cia li tuag thiab tej tsiaj uas tsiaj qus muab tom tuag tej hlab hluas roj mas coj mus siv ua lwm yam kuj tau, tiamsis nej tsis txhob noj kiag li.

25 Yog leejtwg noj tej tsiaj uas yuav muab hlawv kub nyhiab xyeem rau (יחוח)Yahweh tej hlab hluas roj, mas nws yuav raug muab txiav tawm hauv nws haiv neeg mus.

26 Thiab tsis txhob noj ntshav, tsis hais ntshav noog, ntshav tsiaj txhu abtsi, nej txawm mus nyob qhovtwg los tsis txhob noj li.

27 Yog leejtwg noj ntshav mas nws yuav raug muab txiav tawm hauv nws haiv neeg mus.

28 (יחוח)Yahweh hais rau Mauxes tias,

29 cia li hais rau cov Ixayees tias, yog leejtwg yuav muab tsiaj tua xyeem rau (יחוח)Yahweh ua kevcai xyeem sib raug zoo mas tus ntawd yuav tau muab ib qho rho ntawm tus tsiaj uas tua ua kevcai xyeem sib raug zoo ntawd pub xyeem rau (יחוח)Yahweh.

30 Mas nws yuav tau coj ntawm nws txhais tes ib qho uas yuav muab hlawv kub nyhiab xyeem rau (יחוח)Yahweh. Nws yuav coj lub hauv nrob thiab cov hlab hluas roj ntawm lub hauv nrob tuaj pub ua kevcai cev xyeem rau (יחוח)Yahweh.

31 Mas tus pov thawj yuav muab cov hlab hluas roj hlawv saum lub thaj, tiamsis lub hauv nrob yuav ua Aloos thiab nws cov tub li feem.

32 Tus tsiaj uas tua ua kevcai xyeem sib raug zoo ntawd mas sab ceg xis yuav rho rau tus pov thawj ua nws li feem.

33 Aloos tus tub uas muab tus tsiaj uas ua kevcai xyeem sib raug zoo cov ntshav thiab cov hlab hluas roj xyeem ntawd, mas nws yuav tau sab ceg xis ua nws li feem.

34 Rau qhov lub hauv nrob uas cev xyeem thiab sab ceg xis uas pub xyeem, kuv twb muab rho ntawm cov Ixayees, yog rho ntawm tej uas lawv muab ua kevcai xyeem sib raug zoo lawd, mas kuv muab pub rau Aloos thiab nws cov tub. Lawv yuav tau tej no ntawm cov Ixayees mus ib txhis li.

35 Tej no yog Aloos thiab nws cov tub li feem uas rho ntawm tej uas muab hlawv kub nyhiab xyeem rau (יחוח)Yahweh, yog muab pub rau lawv ua lawv tug rau hnub uas lawv raug tsa ua pov thawj ua (יחוח)Yahweh tes haujlwm.

36 Hnub uas Aloos lawv raug hliv roj tsa ua pov thawj mas, (יחוח)Yahweh kom cov Ixayees muab tej no rau Aloos lawv ua lawv li feem ib tiam dhau ib tiam mus ib txhis li.

37 Tej no huvsi yog tej kab ke uas ua kevcai hlawv huvsi xyeem, thiab ua kevcai xyeem qoob loo, thiab ua kevcai xyeem daws txim, thiab ua kevcai ntxuav kev txaug kev txhaum, thiab ua kevcai tsa ua pov thawj, thiab ua kevcai xyeem sib raug zoo.

38 Tej no yog (יחוח)Yahweh hais rau Mauxes saum lub roob Xinais rau hnub uas (יחוח)Yahweh hais kom cov Ixayees coj qhov txhia chaw tuaj xyeem rau (יחוח)Yahweh hauv tebchaws moj sab qhua Xinais.