Kevcai Tsa Aloos Thiab Nws Cov Tub Ua Pov Thawj

(Khiavdim 29:1-37)

1 (יחוח)Yahweh hais rau Mauxes tias,

2 Coj Aloos thiab nws cov tub tuaj, thiab tej tsoos meej mom, thiab cov roj uas siv ua kevcai tsa, thiab tus txiv nyuj uas ua kevcai xyeem daws txim, thiab ob tug txiv yaj, thiab lub tawb ncuav uas tsis xyaw keeb, 

3 thiab hu tag nrho ib tsoom pejxeem tuaj ua ke rau ntawm lub qhov rooj tsev ntaub sib ntsib.

4 Mauxes kuj ua raws li (יחוח)Yahweh hais rau nws, ib tsoom pejxeem thiaj tuaj ua ke ntawm lub qhov rooj tsev ntaub sib ntsib.

5 Mauxes hais rau cov pejxeem tias, no yog tej uas (יחוח)Yahweh hais tias yuav tau ua.

6 Mauxes txawm coj Aloos thiab nws cov tub tuaj, mas muab dej ntxuav lawv.

7 Nws muab lub tsho rau Aloos hnav, muab siv rau sia, thiab muab lub tsho ntev rau hnav, thiab muab lub tsho efauj rau hnav. Nws muab txoj siv sia uas ntos zoo zoo sia lub tsho efauj rau ntawm duav, thiaj khi tau lub tsho efauj.

8 Mauxes muab lub awv rau Aloos coj thiab muab Ulis thiab Thumis tso rau hauv lub awv.

9 Thiab nws muab phuam rau Aloos ntoo thiab muab pluaj kub uas dawb huv los sia txoj phuam ntawm hauv pliaj, raws li (יחוח)Yahweh hais rau Mauxes lawd.

10 Mauxes muab cov roj uas siv ua kevcai tsa los hliv ywg (יחוח)Yahweh lub tsev ntaub sib ntsib thiab txhua yam uas nyob hauv lub tsev thiaj ua tau kevcai tu kom dawb huv rau (יחוח)Yahweh.

11 Thiab nws muab cov roj ib qho nchos rau saum lub thaj xya zaus, muab hliv ywg lub thaj thiab tej twj uas siv ntawm lub thaj huvsi, thiab lub phaj, thiab lub chaw uas txawb lub phaj, thiaj ua tau kevcai tu kom dawb huv rau (יחוח)Yahweh.

12 Nws muab cov roj uas siv ua kevcai tsa ib qho hliv ywg rau saum Aloos taubhau ua kevcai tsa tau nws thiab tu kom nws dawb huv rau (יחוח)Yahweh.

13 Mauxes txawm coj Aloos cov tub los mas muab tej tsho rau lawv hnav, muab txoj siv rau lawv sia thiab muab phuam rau lawv ntoo, raws li (יחוח)Yahweh hais rau Mauxes lawd.

14 Mauxes txawm coj tus txiv nyuj uas ua kevcai xyeem daws txim tuaj, mas Aloos thiab nws cov tub muab tes npuab rau saum tus nyuj uas ua kevcai xyeem daws txim taubhau.

15 Mauxes muab tus nyuj ntawd tua kiag thiab muab ntiv tes raus hauv cov ntshav ib qho los pleev cov kub thaj ua kevcai ntxuav lub thaj kom dawb huv thiab hliv cov ntshav uas tshuav rau lub taw thaj, mas thiaj tu kom dawb huv rau (יחוח)Yahweh thiab ua kevcai ntxuav lub thaj kev txhaum.

16 Nws kuj muab cov hlab hluas roj uas lo plab nyhuv huvsi, thiab cov hlab hluas roj uas lo cov siab, thiab cov hlab hluas roj uas lo ob lub raum, thiab ob lub raum huvsi los mas Mauxes muab hlawv rau saum lub thaj.

17 Tiamsis tus nyuj thiab daim tawv, thiab cov nqaij, thiab tej quav, nws muab hlawv huvsi rau sab nraum ntug zos, raws li (יחוח)Yahweh hais rau Mauxes lawd.

18 Mauxes txawm coj tus txiv yaj uas ua kevcai hlawv huvsi xyeem tuaj, mas Aloos thiab nws cov tub muab tes npuab rau saum tus yaj ntawd taubhau.

19 Mauxes kuj muab tus yaj ntawd tua kiag, muab cov ntshav nchos lo puag ncig lub thaj.

20 Nws muab tus txiv yaj ntawd txiav ua tej ywb yav thiab nws muab lub taubhau, thiab tej ywb yav, thiab cov hlab hluas roj hlawv huvsi.

21 Thaum nws muab dej ntxuav tej plab nyhuv thiab tej ceg, Mauxes kuj muab tus txiv yaj hlawv huvsi rau saum lub thaj ua kevcai hlawv huvsi xyeem ua kom muaj pa ncho tsw qab, yog yam uas muab hlawv kub nyhiab xyeem rau (יחוח)Yahweh, raws li (יחוח)Yahweh hais rau Mauxes lawd.

22 Mauxes coj dua ib tug txiv yaj los yog tus yaj uas siv ua kevcai tsa pov thawj, mas Aloos thiab nws cov tub muab tes npuab rau saum tus txiv yaj ntawd taubhau.

23 Mauxes muab tus yaj ntawd tua kiag, mas muab cov ntshav ib qho los pleev Aloos sab taub ntsej xis thiab tus taub teg xis thiab tus taub taw xis.

24 Mauxes kuj coj Aloos cov tub los mas, nws muab cov ntshav ib qho los pleev lawv sab taub ntsej xis thiab tus taub teg xis thiab tus taub taw xis thiab nws muab cov ntshav nchos kom lo puag ncig lub thaj.

25 Nws muab cov hlab hluas roj thiab tus kotw uas rog rog thiab cov hlab hluas roj uas lo plab nyhuv huvsi, thiab cov hlab hluas roj uas lo cov siab, thiab cov hlab hluas roj uas lo ob lub raum, thiab ob lub raum, thiab sab ceg xis.

26 Nws txawm rho ib lub ncuav uas tsis xyaw keeb, thiab ib lub ncuav ntse roj, thiab ib lub ncuav nyias nyias, hauv lub tawb uas muaj cov ncuav tsis xyaw keeb uas nyob ntawm (יחוח)Yahweh xub ntiag, tso rau saum cov hlab hluas roj thiab tso rau saum sab ceg xis.

27 Nws muab cov no huvsi tso rau hauv Aloos thiab Aloos cov tub txhais tes nqa mus cev ua kevcai cev xyeem rau ntawm (יחוח)Yahweh xubntiag.

28 Mauxes ho txais tej ntawm Aloos lawv txhais tes muab hlawv rau saum lub thaj ua ke nrog tus yaj uas hlawv huvsi xyeem lawd, ua kevcai tsa ua pov thawj, ua kom muaj pa ncho tsw qab, yog yam uas muab hlawv kub nyhiab xyeem rau (יחוח)Yahweh.

29 Mauxes muab lub hauv nrob ua kevcai cev xyeem rau ntawm (יחוח)Yahweh xubntiag. Lub hauv nrob no yog Mauxes li feem, rho ntawm tus yaj uas ua kevcai tsa pov thawj los, raws li (יחוח)Yahweh hais rau Mauxes lawd.

30 Mauxes coj cov roj uas siv ua kevcai tsa ib qho thiab cov ntshav saum lub thaj ib qho los nchos rau Aloos thiab Aloos cev tsoos meej mom thiab nchos rau Aloos cov tub thiab lawv tej tsoos meej mom. Mauxes ua li no thiaj tu tau Aloos thiab nws cev tsoos meej mom thiab Aloos cov tub thiab lawv tej tsoos meej mom kom dawb huv rau (יחוח)Yahweh.

31 Mauxes hais rau Aloos thiab Aloos cov tub tias, muab cov nqaij ntawd hau ntawm lub qhov rooj tsev ntaub sib ntsib thiab noj qhov ntawd ntxuag cov ncuav hauv lub tawb uas xyeem ua kevcai tsa ua pov thawj, raws li kuv hais rau nej lawd, tias Aloos thiab nws cov tub yuav tau noj.

32 Tej nqaij thiab tej ncuav uas noj tsis tag mas nej muab hlawv huvsi pov tseg.

33 Xya hnub, nej tsis txhob tawm ntawm lub qhov rooj tsev ntaub sib ntsib mus qhov twg li, mus txog hnub uas ua kevcai tsa nej ua pov thawj tiav tso. Txoj kevcai tsa nej ua pov thawj yuav ua xya hnub.

34 Tej uas ua hnub no yog (יחוח)Yahweh hais kom ua los ntxuav nej li kev txhaum txim.

35 Nej yuav tau nyob ntawm lub qhov rooj tsev ntaub sib ntsib xya hnub, nruab hnub, hmo ntuj, thiab ua tej uas (יחוח)Yahweh hais cia lawd, tsam ces nej ho tuag, vim tej no yog (יחוח)Yahweh hais rau kuv ntag.

36 Aloos thiab nws cov tub kuj ua raws li (יחוח)Yahweh hais rau Mauxes lawd txhua yam huvsi.