Aloos Thiab Nws Cov Tub Pib Ua Haujlwm

1 Hnub yim, Mauxes hu Aloos thiab nws cov tub thiab cov Ixayees tej kev txwj laug tuaj, 

2 mas nws hais rau Aloos tias, coj ib tug thav txiv nyuj tuaj ua kevcai xyeem daws txim thiab ib tug txiv yaj ua kevcai hlawv huvsi xyeem, coj ob tug uas tsis muaj chaw thuam li tuaj xyeem rau ntawm (יחוח)Yahweh xubntiag.

3 Thiab hais rau cov Ixayees tias, coj ib tug txiv tshis tuaj ua kevcai xyeem daws txim thiab coj ib tug menyuam nyuj thiab ib tug menyuam yaj uas hnub nyoog muaj ib xyoos thiab tsis muaj chaw thuam li tuaj ua kevcai hlawv huvsi xyeem, 

4 thiab coj ib tug txiv nyuj thiab ib tug txiv yaj tuaj tua xyeem ua kevcai xyeem sib raug zoo rau ntawm (יחוח)Yahweh xubntiag, thiab coj cov ncuav ntse roj ua kevcai xyeem qoob loo tuaj xyeem, vim hnub no (יחוח)Yahweh yuav tshwm rau nej pom.

5 Lawv thiaj coj tej uas Mauxes hais ntawd tuaj rau ntawm lub tsev ntaub sib ntsib sab qhov rooj, ib tsoom pejxeem kuj txav los ze sawv ntsug rau ntawm (יחוח)Yahweh xubntiag.

6 Mauxes txawm hais tias, tej no yog tej uas (יחוח)Yahweh hais kom nej ua, mas (יחוח)Yahweh lub hwjchim ci ntsa iab yuav tshwm los rau nej pom.

7 Ces Mauxes txawm hais rau Aloos tias, cia li txav mus ze ze lub thaj, muab tus tsiaj tua ua kevcai xyeem daws txim thiab ua kevcai hlawv huvsi xyeem ua koj li feem, thiab ua kevcai ntxuav koj thiab tej pejxeem kev txhaum txim, thiab coj cov pejxeem tus tsiaj los tua ua kevcai ntxuav lawv kev txhaum txim, raws li (יחוח)Yahweh hais lawd.

8 Aloos txawm txav mus ze lub thaj thiab tua tus menyuam nyuj uas ua kevcai xyeem daws nws li txim.

9 Aloos cov tub nqa cov ntshav los cev rau Aloos, ces Aloos muab ntiv tes raus cov ntshav mus pleev cov kub ntawm lub thaj, thiab muab cov ntshav uas tshuav hliv rau ntawm taw thaj.

10 Mas cov hlab hluas roj thiab ob lub raum thiab cov hlab hluas roj uas lo cov siab ntawm tus tsiaj uas ua kevcai xyeem daws txim ntawd, nws muab hlawv saum lub thaj, raws li (יחוח)Yahweh hais rau Mauxes lawd.

11 Cov nqaij thiab daim tawv, nws muab hlawv rau sab nraum ntug zos.

12 Nws tua tus txiv yaj uas ua kevcai hlawv huvsi xyeem.  Aloos cov tub nqa cov ntshav los rau Aloos mas nws muab cov ntshav nchos lo puag ncig lub thaj.

13 Lawv kuj muab tus txiv yaj uas ua kevcai hlawv huvsi xyeem ntawd, ib yav zuj zus cev rau Aloos thiab cev lub taubhau, mas Aloos muab tej no hlawv rau saum lub thaj.

14 Nws ntxuav tej plab nyhuv thiab tej ceg mas muab hlawv rau saum cov nqaij uas ua kevcai hlawv huvsi xyeem ntawd, saum lub thaj.

15 Aloos txawm coj cov pejxeem tus tsiaj los xyeem.  Nws coj tus tshis uas ua kevcai xyeem daws cov pejxeem li txim, mas nws muab tua xyeem ua kevcai xyeem daws txim ib yam li thawj tug uas nws ua kevcai xyeem daws txim ntawd.

16 Aloos coj tus tsiaj uas ua kevcai hlawv huvsi xyeem tuaj xyeem raws li txoj kevcai.

17 Nws kuj coj tej hmoov uas ua kevcai xyeem qoob loo tuaj xyeem thiab tsuab ib taus tes hlawv rau saum lub thaj, yog ntxiv rau tej uas niaj tagkis ua kevcai hlawv huvsi xyeem.

18 Aloos kuj tua tus txiv nyuj thiab tus txiv yaj, rau cov pejxeem ua kevcai xyeem sib raug zoo. Aloos cov tub nqa cov ntshav los cev rau Aloos mas nws muab cov ntshav nchos lo puag ncig lub thaj.

19 Cov hlab hluas roj nyuj, thiab cov hlab hluas roj yaj, thiab tus kotw uas rog rog, thiab cov hlab hluas roj uas lo plab nyhuv, thiab ob lub raum, thiab cov hlab hluas roj uas lo cov siab, 

20 mas tej hlab hluas roj no lawv muab tso rau saum tej hauv nrob, mas Aloos muab cov hlab hluas roj ntawd hlawv rau saum lub thaj, 

21 tiamsis lub hauv nrob thiab sab ceg xis, Aloos muab cev ua kevcai cev xyeem rau ntawm (יחוח)Yahweh xubntiag, raws li Mauxes hais cia lawd.

22 Aloos txawm tsa tes kiag foom koob hmoov rau cov pejxeem, ces nws txawm nqis saum lub chaw uas nws ua kevcai xyeem daws txim thiab ua kevcai hlawv huvsi xyeem thiab ua kevcai xyeem sib raug zoo los.

23 Ces Aloos thiab Mauxes txawm mus rau hauv lub tsev ntaub sib ntsib.  Thaum nkawv tawm los, nkawv foom koob hmoov rau cov pejxeem, mas (יחוח)Yahweh lub hwjchim ci ntsa iab txawm tshwm los rau cov pejxeem sawvdaws pom.

24 Nplaim taws txawm tawm ntawm (יחוח)Yahweh xubntiag los kub kiag tej tsiaj uas muab ua kevcai hlawv huvsi xyeem thiab cov hlab hluas roj saum lub thaj. Thaum cov pejxeem pom li no, sawvdaws qw thiab khwb pes nkaus rau hauv pem teb.