Nadas Thiab Anpihus Ua Txhaum

1 Aloos ob tug tub Nadas thiab Anpihus nyias taus nyias nqa lub yias rau ncaig taws thiab yawm ncaig taws rau hauv thiab muab hmoov tshuaj tsw qab rau hauv, thiab nkawv muab tej hluavtaws ntawd, uas tsis dawb huv siv hlawv xyeem rau ntawm (יחוח)Yahweh xubntiag, (יחוח)Yahweh tsis tau kom nkawv ua li ntawd.

2 Nplaim taws txawm tawm plaws ntawm (יחוח)Yahweh xubntiag los kub kiag nkawv ces nkawv txawm tuag kiag rau ntawm (יחוח)Yahweh xub ntiag.

3 Mauxes txawm hais rau Aloos tias, qhov no (יחוח)Yahweh twb hais tseg lawm tias, kuv yuav ua rau tibneeg uas nyob ze kuv, paub tias kuv yog tus uas dawb huv, kuv yuav tau koob meej tab meeg ib tsoom tibneeg sawvdaws. Aloos cia li nyob twj ywm.

4 Mauxes hu Misa‑ees thiab Eexafas, uas yog Aloos tus txiv ntxawm Uxi‑ees ob tug tub tuaj, mas hais rau nkawv tias, cia li los muab neb kwv neb tij, kwv ntawm lub chaw pe (יחוח)Yahweh no mus rau sab nraum ntug zos.

5 Nkawv txawm los muab ob tug tuag uas tseem hnav cev tsoos meej mom, kwv kiag tawm mus rau sab nraum ntug zos, raws li Mauxes hais.

6 Mauxes txawm hais rau Aloos thiab Ele‑axas thiab Ithamas lawv peb txiv tub tias, tsis txhob cia nej plaubhau ntxhov hnyo thiab tsis txhob muab nej tej tsho dua, tsam ces nej ho tuag thiab (יחוח)Yahweh txojkev npau taws ho tshwm rau ib tsoom pejxeem sawvdaws. Tiamsis nej cov kwvtij uas yog cov Ixayees sawvdaws yuav quaj ntsuag ob tug uas (יחוח)Yahweh tso hluav taws kub nyhiab tuag, kuj tau.

7 Nej tsis txhob tawm ntawm lub qhov rooj tsev ntaub sib ntsib mus qhov twg li, tsam ces nej ho tuag, vim (יחוח)Yahweh cov roj uas hliv tsa nej tseem nyob ntawm nej.  Mas lawv kuj ua raws li Mauxes hais.  

​

Pov Thawj Li Hauj lwm Thiab Pov Thawj Li Feem

8 (יחוח)Yahweh hais rau Aloos tias, 

9 Thaum koj lossis koj cov tub yuav mus rau hauv lub tsev ntaub sib ntsib mas tsis txhob haus cawv txiv hmab thiab haus cawv ntxwg kiag li, tsam ces nej ho tuag.  Tej no yog tej kevcai uas nej yuav tau coj ib tiam dhau ib tiam, ib txhiab ib txhis mus li.

10 Koj yuav tau muab tej qhov txhia chaw uas dawb huv cais tawm ntawm tej uas yog tibneeg li, thiab muab tej uas qias tsis huv cais tawm ntawm tej uas huv.

11 Koj yuav tau qhia cov Ixayees paub txog tej kevcai huvsi uas (יחוח)Yahweh kom Mauxes hais rau lawv lawd.

12 Mauxes hais rau Aloos thiab Ele‑axas thiab Ithamas lawv peb txiv tub uas tseem nyob tias, muab tej qhov txhia chaw uas thaum ua kevcai xyeem qoob loo es tsis muab hlawv xyeem rau (יחוח)Yahweh los ua ncuav tsis xyaw keeb noj ntawm lub thaj ib sab, vim yog yam uas dawb huv kawg nkaus.

13 Nej cia li noj rau ntawm lub chaw uas dawb huv, rau qhov yog koj thiab koj cov tub li feem uas rho ntawm tej uas muab hlawv kub nyhiab xyeem rau (יחוח)Yahweh los, vim yog (יחוח)Yahweh hais li no rau kuv.

14 Tiamsis lub hauv nrob uas muab cev xyeem thiab sab ceg uas muab pub xyeem lawd, nej muab noj ntawm tej chaw uas tu kom huv huv qhov twg kuj tau, koj thiab koj tej tub tej ntxhais puavleej noj tau. Koj thiab koj tej tub ki yuav tau tej no ua nej li feem, yog rho ntawm tej uas cov Ixayees muab ua kevcai xyeem sib raug zoo los rau nej.

15 Txhais ceg uas muab pub xyeem thiab lub hauv nrob uas muab cev xyeem mas yuav coj los xyeem ua ke nrog cov hlab hluas roj uas yuav muab hlawv kub nyhiab xyeem, thiab yuav muab cev rau ntawm (יחוח)Yahweh xubntiag ua kevcai cev xyeem.  Tej no yog koj thiab koj cov tub ki li feem mus ib txhis li, raws li (יחוח)Yahweh hais lawd.

16 Mauxes ua tib zoo nug txog tus tshis uas muab ua kevcai xyeem daws txim, mas nws paub tias twb muab tus tshis ntawd hlawv tag lawm, mas nws chim heev rau Ele‑axas thiab Ithamas uas yog Aloos ob tug tub uas tseem tshuav nyob.  Mauxes cem tias,

17 ua cas neb tsis muab tus tsiaj uas muab ua kevcai xyeem daws txim ntawd noj ntawm thaj chaw pe (יחוח)Yahweh.  Twb yog yam uas dawb huv kawg nkaus thiab yog yam uas twb muab rau neb kom thiaj coj tau cov pejxeem lub txim mus pov tseg, thiab thiaj ntxuav tau lawv tej kev txhaum txim rau ntawm (יחוח)Yahweh xubntiag.

18 Cov ntshav tsiaj ntawd, tsis tau coj mus rau hauv lub tsev ntaub chav dawb huv, thiaj tsim nyog neb yuav tau noj rau ntawm thaj chaw pe (יחוח)Yahweh, raws li kuv hais lawd.

19 Aloos txawm hais rau Mauxes tias, saib maj, hnub no lawv muab tsiaj ua kevcai xyeem daws txim thiab ua kevcai hlawv huvsi xyeem rau ntawm (יחוח)Yahweh xubntiag, tiamsis kuv twb raug tej xwm zoo li no lawm.  Yog hnub no kuv tau noj tej uas ua kevcai xyeem daws txim ces yuav haum (יחוח)Yahweh lub siab lov?

20 Thaum Mauxes hnov li no, nws kuj txaus siab.