Piv Lus Hais Txog Rooj Tshoob

(Luke 14:15-24)

1 (יהושע)Yahshua hais dua piv lus rau lawv tias,  2 lub nroog Yeluxalees piv ib yam li ib tug vajntxwv uas npaj rooj tshoob rau nws tus tub,  3 mas txib nws cov qhev mus hu cov qhua uas caw tuaj noj tshoob, tiamsis lawv tsis kam tuaj. 4 Nws rov txib dua ib co tub qhe mus hais tias, cia li hais rau cov uas twb caw ntawd tias, Kuv twb npaj nqaij qhauv thiab kuv twb tua tej nyuj thiab tej menyuam nyuj uas hwv tiav tag lawm, txhua yam twb npaj txhij lawm. Nej cia li tuaj noj tshoob lauj!  5 Tiamsis lawv tsis quav ntsej li, ib tug mus ua liaj ua teb, ib tug mus ua lag ua luam,  6 dua li cov tseem ua phem rau nws cov qhev thiab muab tua pov tseg. 7 Vajntxwv npau taws heev nws thiaj tso nws cov tub rog mus ua kom cov uas tua tibneeg ntawd puam tsuaj thiab muab lawv lub moos hlawv pov tseg. 8 Nws hais rau nws cov tub qhe tias, Rooj tshoob npaj txhij lawm, tiamsis cov uas caw ntawd tsis tsim nyog tuaj noj. 9 Vim li no cia li tawm mus tom tej kev tshuam ntsib leejtwg kuj hu tuaj noj tshoob. 10 Cov tub qhe ntawd thiaj tawm mus tom tej kev thiab hu txhua tus uas lawv ntsib tsis hais tus zoo tus phem, thiaj muaj qhua puv nkaus chav tsev ua tshoob.

11 Thaum tus vajntxwv ntawd los xyuas cov qhua, nws pom ib tug tsis hnav tsoos tsho ua tshoob, 12 ces txawm hais rau tus ntawd tias, Kwvluag  es, ua cas koj tuaj ntawm no tsis hnav tsoos tsho ua tshoob? Tus ntawd hais tsis taus ib los li.

13 Vajntxwv hais rau cov tub qhe tias, cia li muab tus no khi tes khi taw laim rau sab nraud uas tsaus ntuj nti, qhov ntawd yuav muaj kev quaj tom hniav qas qawv. 14 Cov uas caw hu muaj coob, tiamsis cov uas xaiv tau muaj tsawg.

​

Them Se Rau Xixas

(Yahchanan Mark 12:13-17;Luke 20:20-26)

15 Thaum ntawd cov Falixais mus sablaj saib yuav nyas (יהושע)Yahshua tej lus li cas.

16 Lawv txawm txib lawv cov thwjtim thiab Helauj cov mus thom (יהושע)Yahshua hais tias, Xibhwb, peb paub tias koj yog ib tug ncaj ncees thiab koj qhia Abba (יחוח)Yahweh txoj kev raws li muaj tseeb thiab tsis ua raws li leejtwg lub siab nyiam rau qhov koj tsis saib leejtwg ntsej muag. 17 Yog li no, thov koj qhia rau peb saib koj xav li cas. Tsim nyog them se rau Xixas los tsis them? 18(יהושע)Yahshua paub qhov uas lawv xav phem, nws thiaj hais tias, cov niag tibneeg ncauj lus zoo siab phem, nej tuaj sim kuv ua abtsi? 19 Cia li muab lub nyiaj them se ntawd rau kuv saib. Lawv thiaj muab ib lub denalias rau nws.

20(יהושע)Yahshua hais rau lawv tias, Lub ntsej muag thiab lub npe uas txaug no yog leejtwg?

21 Lawv teb tias, yog Xixas li. (יהושע)Yahshua txawm hais rau lawv tias, yog li no yam uas yog Xixas li cia li muab rau Xixas, yam uas yog Abba (יחוח)Yahweh li cia li muab rau Abba (יחוח)Yahweh. 22 Thaum lawv hnov tej lus ntawd lawv xav tsis thoob, lawv txawm ncaim (יהושע)Yahshua mus lawm.

​

Qhov Uas Ciaj Sawv Rov Los

(Yahchanan Mark 12:18-27;Luke 20:27-40)

23 Tib hnub ntawd cov Xadukais uas qhia hais tias tsis muaj qhov uas sawv hauv qhov tuag los txawm tuaj cuag (יהושע)Yahshua. Lawv thiaj thom (יהושע)Yahshua 24 hais tias, Xibhwb, Mauxes twb hais tias, yog leejtwg tuag lawm tsis tau muaj menyuam, mas nws ib tug kwvtij yuav tsum yuav tus poj ntsuam ntawd thiaj tuav tau tus uas tuag li keeb kwm cia. 25 Peb cov muaj xya tus kwvtij. Tus hlob muaj pojniam lawm li tuag tsis tau muaj menyuam, tseg tus pojniam rau tus kwv yuav ua pojniam. 26 Mas tus ob tus peb mus txog tus xya kuj tuag tag ib yam nkaus.

27 Thaum kawg tus pojniam ntawd kuj tuag lawm. 28 Vim li no hnub uas ciaj sawv rov los, tus pojniam ntawd yuav ua xya leej ntawd tus twg li pojniam, rau qhov nws twb ua xya leej ntawd li pojniam lawm?  

29(יהושע)Yahshua teb lawv tias, nej yuam kev lawm, nej tsis paub Abba (יחוח)Yahweh txojlus thiab tsis paub Abba (יחוח)Yahweh lub hwjchim. 30 Thaum tibneeg ciaj sawv rov los ntawd, tsis muaj kev sib yuav ua txij ua nkawm lawm, yuav zoo ib yam li cov tubtxib saum ntuj xwb. 31 Hais txog qhov uas sawv hauv qhov tuag rov los, nej tsis tau nyeem tej uas Abba (יחוח)Yahweh hais rau nej lov? Nws hais tias,  32 Kuv yog Abraham Tus Tswv, yog Isaac Tus Tswv, thiab yog Yaaqob Tus Tswv. Abba (יחוח)Yahweh tsis yog cov tibneeg tuag Tus Tswv, nws yog cov tibneeg ciaj Tus Tswv. 33 Thaum cov tibneeg ntawd hnov, lawv kuj phimhwj rau (יהושע)Yahshua tej lus qhuab qhia.

​

Nqe Kevcai Uas Tseem Ceeb Dua Ntais

(Yahchanan Mark 12:28-34;Luke 10:25-28)

34 Thaum cov Falixais hnov tias (יהושע)Yahshua ua rau cov Xadukais tws kev tsis muaj lus hais lawm, lawv txawm sau zog ua ke,  35 mas ib tug xib hwb uas paub cai txawm sim nug (יהושע)Yahshua hais tias, 36 Xibhwb, txoj kevcai nqe twg tseem ceeb dua ntais? 37(יהושע)Yahshua hais rau nws tias, Koj yuav tsum hlub Abba (יחוח)Yahweh uas yog koj Tus Tswv kawg siab kawg ntsws, thiab kawg koj lub tswvyim. 38 Nqe no yog thawj nqes thiab yog nqe uas tseem ceeb dua ntais.

39 Nqe uas ob kuj ib yam nkaus hais tias, Koj yuav tsum hlub kwvtij zej zog ib yam li koj hlub koj tus kheej. 40 Mauxes txoj kevcai thiab cov xibhwb cev lus tej lus qhia huvsi nyob tag nrho rau hauv ob nqes no.

​

Tus Messiah Yog Leejtwg

(Yahchanan Mark 12:35-37;Luke 20:41-44)

41 Thaum cov Falixais tseem nyob ua ke ntawd, (יהושע)Yahshua txawm nug lawv 42 hais tias, nej xav li cas txog tus Messiah? Nws yog leejtwg li tub? Lawv hais rau nws tias, yog Daviv li tub.

43(יהושע)Yahshua thiaj nug lawv tias, yog li ntawd ua cas Tus Ntsuj Plig kom Daviv hu tus Messiah tias Tus Tswv thiab hais tias, 44 Tus Tswv hais rau kuv Tus Tswv tias, cia li zaum ntawm kuv sab xis, mus txog thaum kuv muab koj cov yeeb ncuab tiag koj xib taw? 45 Yog Daviv twb hu tus Messiah tias Tus Tswv, nws yuav ua li cas ua tau Daviv li tub?  46 Tsis muaj ib tug twg teb tau (יהושע)Yahshua ib los li. Txij hnub ntawd los tsis muaj leejtwg muaj cuabkav nug (יהושע)Yahshua dua li lawm.