(יהושע)Yahshua Ciaj Sawv Rov Los

(Yahchanan Mark 16:1-10; Luke 24:1-12;Yahchanan 20:1-10)

Thaum dhau hnub Sabbath lawm, hnub ib  thaum kaj ntug txoog Miriam Magdalene thiab dua ib tug Miriam txawm mus saib lub qhov ntxa. 2 Ua ciav ntuj txawm qeeg ntseeg nkaws heev. Tus Tswv ib tug tubtxib saum ntuj nqes los muab daim lag zeb dov tawm, ces txawm zaum saum daim lag zeb ntawd. 3 Saib tug tubtxib ntawd mas zoo li xob laim thiab nws cev tsoos tsho dawb paug li daus xib daus npu. 4 Cov tub rog uas zov ntxa ntshai tus tubtxib saum ntuj ntawd tshee hnyo thiab zoo yam li tibneeg tuag. 5 Tus tubtxib saum ntuj thiaj hais rau cov pojniam tias, tsis txhob ntshai, kuv paub tias neb tuaj nrhiav (יהושע)Yahshua uas raug muab teem rau saum tus ntoo ntsia tes. 6 Nws tsis nyob ntawm no, nws twb ciaj sawv los lawm raws li nws twb hais tseg lawd. Cia li los saib lub chaw uas nws pw. 7 Thiab maj nroos mus hais rau nws cov thwjtim tias, nws twb ciaj sawv hauv qhov tuag rov los lawm, nws yuav ua nej ntej mus rau pem Kalilais. Nej yuav pom nws qhov ntawd. No yog kuv hais rau neb ntag.

8 Nkawv txawm tawm hauv lub qhov ntxa sai sai ntshai thiab zoo siab thiab dhia mus qhia rau (יהושע)Yahshua cov thwjtim. 9 Ua ciav (יהושע)Yahshua txawm ntsib nkawv thiab hais tias, nyob zoo lov? Nkawv txawm los ze tuav nkaus (יהושע)Yahshua kotaw pe hawm nws. 10(יהושע)Yahshua hais rau nkawv tias, tsis txhob ntshai, cia li mus hais rau kuv cov kwvtij kom mus rau Kalilais, lawv yuav ntsib kuv qhov ntawd. 11 Thaum cov pojniam ntawd tabtom mus cov tub rog uas zov lub ntxa qee leej kuj mus rau hauv nroog thiab qhia txhua yam xwm uas tshwm los rau cov pov thawj hlob. 12 Thaum cov pov thawj hlob thiab cov kev txwj laus tuaj ua ke sablaj ua ke tag lawd lawv txawm muab nyiaj ntau ntsaws rau cov tub rog  13 thiab hais tias, nej cia li hais tias, thaum tsaus ntuj uas peb tsaug zog lawm (יהושע)Yahshua cov thwjtim tuaj nyiag nws lub cev tuag coj mus lawm. 14 Yog Tus Tswv xeev hnov txog tej no, peb mam li nrog nws hais, tsis pub nej raug teeb meem. 15 Cov tub rog txawm txais cov nyiaj ntawd thiab ua raws li lawv qhia. Mas zaj no ncha mus rau hauv cov Yudai txog niaj hnub nimno.

(יהושע)Yahshua Qhia Kom Ua Nws Tej Haujlwm

(Yahchanan Mark 16:14-18;Luke 24:36-49;Yahchanan 20:19-23;Ttx. 1:6-8)

16 Kaum ib tug thwjtim txawm mus rau pem Kalilais mus txog lub roob uas (יהושע)Yahshua hais rau lawv.

17 Thaum lawv pom (יהושע)Yahshua lawv pe hawm nws, tiamsis muaj qee leej tseem ua xyem xyav. 18(יהושע)Yahshua txawm txav los ze thiab hais rau lawv tias, Hwjchim tag nrho saum ntuj thiab hauv ntiajteb twb muab cob rau kuv lawm. 19 Yog li no nej cia li mus coj txhua haiv neeg los ua kuv li thwjtim, thiab muab lawv ua kevcai raus dej hauv leej Txiv, leej tub thiab Tus Ntsuj Plig dawb huv lub npe,  20 thiab qhia kom lawv tuav rawv txhua yam uas kuv tau qhia rau nej lawd. Thiab kuv niaj hnub yuav nrog nraim nej mus txog lub sijhawm kawg.