Cov Uas Quab Yuam Tej Pluag Yuav Raug Txom Nyem

1 Cov uas pw saum lawv lub txaj npaj yuav ua limhiam thiab ntaus tswvyim phem yuav raug txom nyem lauj! Thaum kaj ntug lawv kuj mus ua tej ntawd, rau qhov lawv txhais tes muaj peevxwm ua tau.

2 Lawv ntshaw luag tej teb ces txawm mus txeeb kiag, lawv ntshaw luag vaj tse ces txawm mus txhav kiag, lawv quab yuam tus tswv tsev thiab nws lub tsev, lawv ntswj nws thiab nws qub txeeg qub teg.

3 Vim li no (יחוח)Yahweh  thiaj hais li no tias, saib nawj, kuv tabtom npaj xwm txheej phem los raug cov tibneeg ntawd, mas nej yuav rho nej tej caj dab kom dim tsis tau li. Nej yuav mus kev ua khav theeb ntsuav tsis tau, rau qhov yog lub sijhawm raug xwm txheej phem.

4 Lub sijhawm ntawd luag yuav hu nkauj thuam nej, thiab yuav quaj ntsuag lwj siab kawg nkaus hais tias, peb puam tsuaj tu noob nrho lawm lauj! (יחוח)Yahweh  muab kuv haiv neeg li feem hloov rau luag lawm, nws muab rho kiag ntawm kuv lawm lauj! Nws muab peb tej teb faib rau cov uas ntes peb.

5 Vim li no nej yuav tsis muaj leejtwg rho ntawv faib teb rau nej rau hauv (יחוח)Yahweh  cov tibneeg.

6 Lawv qhuab qhia hais tias, tsis txhob qhuab qhia, tsis txhob kheev leejtwg qhuab qhia txog zaj no. Kev poob ntsej muag yuav caum tsis cuag peb li.

7 Yakhauj caj ces es, tsim nyog yuav hais li no lov? (יחוח)Yahweh  Tus Ntsuj Plig Dawbhuv tsis muaj lub siab thev lawm lov? Tej no yog (יחוח)Yahweh  ua lov? Kuv tej lus tsis ua zoo rau tus uas ua lub neej ncaj lov?

8 Tiamsis nej tawm tsam kuv haiv neeg ib yam li yog yeeb ncuab, nej lws kiag tus uas nyob haum xeeb lub tsho ntev, yog lws cov uas taug kev tso siab plhuav tsis xav hais tias tseem muaj kev ua rog lawm.

9 Nej ntiab kuv haiv neeg tej pojniam khiav tawm hauv lawv tej tsev zoo zoo mus, nej lws kuv tej koob hmoov ntawm lawv tej menyuam yaus mus ib txhis.

10 Cia li sawv tsees mus, rau qhov ntawm no tsis yog lub chaw so, vim yog qhov chaw qias tsis huv uas ua kom puam tsuaj liamsim tag txom nyem kawg.

11 Yog leejtwg mus ncig hais lus foob lus cua thiab lus dag hais tias, kuv yuav qhuab qhia rau nej mloog txog cawv txiv hmab thiab cawv ntxwg, ces nws yuav ua tau ib tug xibhwb qhuab qhia rau haiv neeg no ntag lauj!

12 Yakhauj es, kuv yuav sau zog nej sawvdaws los ua ke tiag tiag li, kuv yuav qaws cov Ixayees uas tseem tshuav nyob los ua ke, kuv yuav sau lawv los ua ke yam li tej yaj nyob hauv lub nkuaj, thiab yam li pab yaj nyob hauv tshav zaub, ua ib pab tibneeg coob coob qw zom zaws.

13 Tus uas qheb tau qhov tawm mus nws yuav mus ua lawv ntej, lawv yuav txeem tawm mus thiab yuav tawm ntawm lub rooj loog mus. Lawv tus vajntxwv yuav mus ua lawv ntej, yog (יחוח)Yahweh  coj lawv kev.