Quaj Ntsuag Xamalis Thiab Yeluxalees

1 No yog tej lus uas (יחוח)Yahweh  hais tuaj rau Micahyah uas yog tibneeg hauv lub moos Mauleses rau thaum Yauthas, Ahas thiab Hexekhiyas ua vajntxwv kav Yahdah tebchaws, yog tej lus uas Micahyah pom txog Xamalis thiab Yeluxalees.

2 Ib tsoom tibneeg txhua tus es, cia li tig ntsej mloog, lub qab ntuj es thiab txhua yam uas nyob hauv cia li mloog. Cia (יחוח)Yahweh  ua timkhawv tshum nej, yog Tus Tswv uas hais hauv nws lub tuam tsev dawb huv tuaj.

3 Saib nawj, (יחוח)Yahweh  tawm hauv nws lub chaw los, nws yuav nqes los tsuj saum tej chaw siab hauv lub ntiajteb.

4 Tej roob yuav yaj tag rau hauv nws qab thiab tej hav yuav tawg pes rhe, yam nkaus li ciab ntab yaj ntawm hluavtaws thiab yam li tej dej uas ntws ntawm tej toj ntxhab los.

5 Tej xwm txheej no huvsi yog tim Yakhauj tej kev fav xeeb thiab tim Ixayees caj ces tej kev txhaum txim. Yakhauj tej kev fav xeeb yog abtsi? Tsis yog lub nroog Xamalis lov? Yahdah caj ces lub chaw siab teev dab yog abtsi? Tsis yog lub nroog Yeluxalees lov?

6 Vim li no kuv yuav ua rau Xamalis pob ua tej niag pawg ciaj hav nroj, yuav ua chaw cog vaj txiv hmab. Kuv yuav muab tej pob zeb uas tsim lub nroog ntawd nchuav rau hauv tej kwj ha, mas yuav pom tej taw uas tiag lub nroog.

7 Tej dab mlom huvsi hauv lub nroog ntawd yuav raug muab tsoo ua tej dwb daim. Tej uas muab xyeem rau hauv tej tsev dab yuav raug muab hlawv pov tseg, thiab kuv yuav muab tej dab mlom ua kom piam tag huvsi. Tej dab mlom ntawd yog Xamalis muab cov nqe ua poj muag cev sau zog yuav los, mas yuav rov mus ua nqe ntiav poj muag cev.

8 Vim li no kuv yuav quaj ntsuag thiab quaj nyiav, kuv yuav mus mus los los liab qab tsuas tsis rau khau. Kuv yuav quaj ntsuag yam li hma nqov ntuj, thiab kuv yuav quaj lwj siab ntsuav yam li noog ntxhuav.

9 Xamalis tej kiav txhab kho tsis tau li thiab kis tuaj txog Yahdah lawm, twb los txog ntawm kuv haiv neeg lub rooj loog, uas yog Yeluxalees ntag.

10 Tsis txhob piav zaj no rau hauv lub moos Kas, tsis txhob quaj kiag li. Cia li da luj luam rau hauv tej hmoov av ntawm lub moos Npes Le-alas.

11 Cov tibneeg hauv lub moos Safis cia li taug nej txojkev liab qab tsuas thiab txaj muag. Cov tibneeg hauv lub moos Xanas tsis tawm los. Lub moos Npe-exees quaj nyiav, nej thiaj tsis tau chaw cawm siav rau qhov ntawd lawm.

12 Cov tibneeg hauv lub moos Malaus tos qhov zoo qhuav siab qhawv, vim yog (יחוח)Yahweh  tso tej xwm txheej phem los txog ntawm rooj loog Yeluxalees lawm.

13 Cov tibneeg hauv lub moos Lakhis es, cia li muab nees nruab rau tej tsheb ua rog. Nej xub ua txhaum thiaj coj kev txhaum los rau hauv Xi‑oo tus ntxhais, rau qhov Ixayees tej kev fav xeeb muaj nyob hauv nej nruab nrab.

14 Vim li no nej yuav muab tshav ntuj xa lub moos Maulesekas mus, thiab lub moos Axij tej vaj tse yuav tsis ua chaw vam khom rau Ixayees tej vajntxwv.

15 Cov tibneeg hauv lub moos Malesas es, kuv yuav coj tus uas kov yeej los ntaus nej. Tus uas yog Ixayees lub koob meej yuav los rau hauv lub moos Adulas.

16 Cia li chais nej cov plaubhau kom do cuas quaj ntsuag nej tej menyuam uas nej nyiam kawg. Cia li ua rau nej do hau ib yam li dav noj twm, rau qhov lawv yuav ncaim nej mus poob tebchaws.