(יחוח)Yahweh  Lub Roob

1 Yav tom hauv ntej yuav muaj li no, lub roob uas muaj (יחוח)Yahweh  lub tuam tsev, yuav raug muab tsa ua lub roob uas siab tshaj tej roob huvsi, thiab yuav raug txhawb nqa siab dua tej pov roob, mas ib tsoom tibneeg yuav ntws lug rau qhov ntawd.

2 Ntau haiv neeg yuav tuaj hais tias, cia li los, cia peb nce mus rau saum (יחוח)Yahweh  lub roob, mus rau hauv Yakhauj Tus Tswv lub tuam tsev, mas nws yuav qhia nws txojkev rau peb, kom peb thiaj taug tau nws txojkev. Rau qhov txoj kevcai yuav tawm hauv Xi‑oo los thiab (יחוח)Yahweh  txojlus yuav tawm hauv Yelu-xalees los.

3 Nws yuav phua cai rau ntau haiv neeg, thiab nws yuav tu plaub rau tej teb chaws muaj zog uas nyob deb, lawv yuav muab lawv tej ntaj riam ntaus ua khais laij teb, thiab muab lawv tej hmuv ntaus ua liag. Ib lub tebchaws yuav tsis rho ntaj ua tsov ua rog rau ib lub tebchaws, lawv yuav tsis kawm txujci ua tsov ua rog dua li lawm.

4 Nyias yuav zaum hauv nyias tsob qab txiv hmab thiab hauv nyias tsob qab txiv cev, thiab tsis muaj leejtwg yuav ua rau lawv ntshai, vim (יחוח)Yahweh  uas muaj hwjchim loj kawg nkaus lub qhov ncauj hais cia li no lawm.

5 Ib tsoom tibneeg sawvdaws nyias tuav nyias tus timtswv lub npe ua neej, tiamsis peb yuav tuav (יחוח)Yahweh  uas yog peb Tus Tswv lub npe ua neej mus ib txhis tsis kawg.

Cov Ixayees Yuav Rov Los

6 (יחוח)Yahweh  hais tias, hnub ntawd kuv yuav sau zog cov tibneeg ceg tawv, thiab qaws cov uas raug muab ntiab tawm mus thiab cov uas kuv ua rau raug kev txom nyem nyuaj siab rov los ua ke.

7 Cov uas ceg tawv kuv yuav xaiv tseg cia nyob, cov uas raug muab tso tseg lawd kuv yuav muab ua lub tebchaws uas muaj zog. Thiab (יחוח)Yahweh  yuav kav lawv rau saum lub roob Xi‑oo, txij nimno mus ib txhiab ib txhis.

8 Lub chaw tsom faj uas zov pab yaj es, lub pov roob Xi‑oo tus ntxhais es, koj yuav rov tau hwjchim kav tebchaws li qub, yog lub tebchaws uas Yeluxalees tus ntxhais txeev kav.

9 Nimno ua cas koj yuav quaj nrov heev? Tsis muaj vajntxwv nyob hauv koj lov? Tus uas ua koj lub chaw sablaj puam tsuaj lawm lov, es koj mob heev yam li tus pojniam mob plab lov?

10 Xi‑oo tus ntxhais es, cia li ntswj ib ce ntsaj laws, ib yam li tus pojniam mob plab heev yuav yug menyuam, rau qhov nimno koj yuav tsum tawm hauv lub nroog mus nyob tom teb. Koj yuav tau mus rau Npanpiloos thiab yuav tau kev cawm dim qhov ntawd. (יחוח)Yahweh  yuav txhiv koj dim hauv koj cov yeeb ncuab txhais tes.

11 Nimno muaj ntau lub tebchaws sau zog tawm tsam koj, hais tias, cia ua puas tsuas nws, cia peb lub qhov muag mus saib Xi‑oo.

12 Tiamsis lawv tsis paub txog tej uas (יחוח)Yahweh  xav tseg lawd, lawv tsis nkag siab tej uas nws npaj cia. Twb yog nws sau zog lawv los ua ke ib yam li sau tej teg qoob los rau ntawm lub tshav ntaus.

13 Xi‑oo tus ntxhais es, cia li sawv tsees ntaus tej qoob ntawd, rau qhov kuv yuav pub koj muaj txwm kub hlau thiab muaj rau taw tooj liab, mas koj yuav ntaus ntau haiv neeg tawg ua tej dwb daim, thiab koj yuav muab tej uas lawv txeeb tau los cais kiag pub rau (יחוח)Yahweh , yog muab lawv tej nyiaj txiag pub rau Tus Tswv  uas kav tag nrho lub qab ntuj.