1 Cov tub rog hauv lub nroog es, cia li npaj nej cov tub rog. Yeeb ncuab twb tuaj vij peb lawm, lawv xuas pas ntoo ntaus cov Ixayees tus thawj sab plhu.

​

Muaj Ib Tug Thawj Tshwm Hauv Npelehees Tuaj

2 Au Npelehees Efathas es, koj yog ib tug me me hauv Yahdah tej cum, yuav muaj ib tug tshwm hauv koj los rau kuv, yog tus uas yuav ua tus thawj kav cov Ixayees. Nws lub hauv paus yeej muaj thaum chiv keeb thaum ub los.

3 Vim li no (יחוח)Yahweh  yuav muab lawv tso tseg mus txog lub sijhawm uas tus pojniam mob plab yug menyuam lawm, mas nws cov kwvtij uas tseem tshuav nyob yuav rov los rau hauv cov Ixayees.

4 Tus ntawd yuav sawv ruaj khov thiab muaj (יחוח)Yahweh  lub zog thiab nws muaj (יחוח)Yahweh  lub koob meej uas ci ntsa iab yug nws pab yaj. Lawv yuav nyob tso siab plhuav rau qhov tus ntawd yuav ua loj mus thoob qab ntuj kawg,

5 thiab nws yuav ua lawv lub chaw nyob kaj siab lug. Thaum cov Axilias tuaj txeem rau hauv peb lub tebchaws thiab tsuj peb tej chaw ruaj khov, peb yuav tsa xya tus yug yaj thiab tsa yim tus thawj tawm tsam lawv.

6 Lawv yuav xuas ntaj kav Axilias tebchaws, thiab rho ntaj kav Nilauj tebchaws. Thaum cov Axilias tuaj txeem rau hauv peb lub tebchaws thiab tsuj hauv peb ciam teb, tus ntawd yuav tso peb dim.

7 Yakhauj caj ces uas tseem tshuav nyob yuav nyob rau hauv nruab nrab ntau haiv neeg zoo yam li dej lwg ntawm (יחוח)Yahweh  thiab zoo li pluav nag uas los rau saum tej nroj tsuag thiab tsis nyob ntawm tibneeg lossis tos tibneeg tej tub.

8 Yakhauj caj ces uas tseem tshuav yuav nyob hauv nruab nrab ib tsoom tebchaws thiab hauv nruab nrab ntau haiv neeg yam li tus tsov ntxhuav nyob hauv nruab nrab tej tsiaj qus hauv hav zoov, lossis yam li tus thav tsov ntxhuav uas nyob hauv nruab nrab tej yaj, thaum nws hla mus nws tsuj pes ntiag thiab muab dua tseg, tsis muaj leejtwg cawm tau.

9 Nej txhais tes yuav raug muab tsa rau saum nej cov tshawj chim, thiab nej cov yeeb ncuab huvsi yuav raug muab txiav tu nrho.

10 (יחוח)Yahweh  hais tias, hnub ntawd kuv yuav muab nej tej nees ua kom ploj tag hauv nej nruab nrab mus, thiab muab nej tej tsheb nees ua rog ua puam tsuaj tag.

11 Kuv yuav muab tej moos hauv nej lub tebchaws rhuav tshem tag, thiab rhuav nej tej chaw ruaj khov pob tag huvsi.

12 Kuv yuav muab qhov uas ua khaws koob rhuav tshem tag ntawm nej txhais tes, nej yuav tsis muaj txiv neeb txiv yaig dua li lawm.

13 Kuv yuav rhuav nej tej dab mlom thiab nej tej ncej teev dab kom ploj ntawm nej mus, thiab nej yuav tsis tau pe tej uas nej txhais tes ua dua li lawm.

14 Kuv yuav rho kiag nej tej ncej dab Aselas  hauv nej nruab nrab pov tseg, thiab ua rau nej tej moos puam tsuaj.

15 Kuv yuav chim thiab ua pauj npau taws vog rau tej tebchaws uas tsis mloog lus.