(יחוח)Yahweh  Npau Taws Rau Lub Nroog Ninaves

1 Cov lus no hais txog lub nroog Ninaves, yog phau uas sau tej uas Nachumyah uas yog tibneeg hauv lub zos Eekhaus ua yog toog pom.

2 (יחוח)Yahweh  yog Tus Tswv uas khib xeeb thiab ua pauj, (יחוח)Yahweh  ua pauj thiab npau taws, thiab (יחוח)Yahweh  ua pauj rau cov uas tawm tsam nws thiab nws chim rau nws cov yeeb ncuab mus li.

3 (יחוח)Yahweh  tsis chim sai, nws muaj hwjchim loj kawg nkaus. (יחוח)Yahweh  yeej tsis tso tus uas ua txhaum dim dawb li.(יחוח)Yahweh  taug kev nrog khaub zeeg cua thiab cua daj cua dub, thiab huab pos nti ntawm nws kotaw yam li hmoov av.

4 (יחוח)Yahweh  txwv dej hiavtxwv thiab ua kom qhuav kiag thiab ua kom tej niag dej huvsi qhuav tag. Npasas thiab Khamees kuj tuag tshav tag thiab tej paj xyoob paj ntoos hauv Lenpanoos ntsws tag lawm.

5 Tej toj roob hauv pes ntseeg nkaws rau ntawm (יחוח)Yahweh  xubntiag, thiab tej ncov roob kuj yaj tag. Lub ntiajteb thiab ib puas tsav yam hauv qab ntuj kuj raug nyob do cuas rau ntawm (יחוח)Yahweh  xubntiag.

6 Leejtwg yuav thev taus qhov uas (יחוח)Yahweh  chim? Leejtwg thev taus qhov uas (יחוח)Yahweh  npau taws ceev ceev?

Qhov uas (יחוח)Yahweh  npau mas tawm plaws li nplaim taws, thiab nws ua rau tej pob zeb pob tsuas tawg pes rhe.

7 (יחוח)Yahweh  zoo kawg nkaus. Nws yog lub chaw ruaj khov rau hnub uas raug txom nyem. (יחוח)Yahweh  paub zoo tus uas los cawm siav rau hauv nws.

8 (יחוח)Yahweh  yuav tso dej nyab los kuav kom cov uas tawm tsam nws ploj tag mus, thiab yuav muab nws cov yeeb ncuab ntiab rau hauv qhov tsaus ntuj.

9 Nej xav zaj tswvyim phem twg rau (יחוח)Yahweh ?

(יחוח)Yahweh  yuav ua rau nej puam tsuaj ploj tag nrho mus, tsis muaj leejtwg yuav mus tiv tau (יחוח)Yahweh  zaum ob.

10 Lawv yuav zoo yam nkaus li cov pos kaus ntsim uas sib qhaib tag lawm, thiab yam li cov haus cawv qaug cawv, thiab yam li tej quav nyab qhuav kub hnyiab tag.

11 Txeev muaj ib tug tawm hauv nej cov tuaj ntaus tswvyim phem rau (יחוח)Yahweh  thiab qhia kom ua phem.

12 (יחוח)Yahweh  hais li no tias, txawm yog lawv muaj zog thiab coob heev los lawv yuav raug muab rhuav tshem kom ploj tag mus. Txawm yog kuv ua rau nej raug kev txom nyem lawm los kuv yuav tsis rov ua rau nej txom nyem dua li lawm.

13 Nimno kuv yuav muab lawv tus quab uas nej kwv lov pov tseg, thiab yuav muab tej saw hlau uas khi nej ua kom tu plam tag.

14 (יחוח)Yahweh  hais hnyav txog Ninaves tias, koj lub moo yuav tsis nto mus ntxiv lawm. Kuv yuav muab tej dab mlom uas koj txaug thiab tej uas koj nchuav huvsi rhuav tshem tawm hauv koj tej tsev teev dab. Kuv yuav khawb qhov ntxa tos koj vim koj phem qias heev.

15 Saib maj, muaj ib tug taug kotaw tuaj txog saum roob, yog nws coj txoj xov zoo tuaj thiab tshaj tawm txog kev thaj yeeb siab tus. Cov Yahdah es, nej cia li coj tej kevcai npaj noj npaj haus, thiab cia li ua tej uas nej yeem lus tseg lawd kom tiav, vim cov tibneeg limhiam yuav tsis rov tuaj ntaus nej dua li lawm, lawv twb raug puam tsuaj tag huvsi lawm.