​

1 Kuv yuav sawv ntsug zov saib, kuv yuav sawv saum lub chaw tsom faj saib mus, saib nws yuav hais li cas rau kuv, thiab saib kuv yuav teb li cas rau nws txog tej uas kuv yws ntawd.

(יחוח)Yahweh  Tej Lus Teb

2 (יחוח)Yahweh  teb kuv tias, cia li sau zaj yog toog no, cia li muab sau cia rau saum daim txiag kom pom meej, kom tus uas khiav thiaj nyeem tau npliag.

3 Zaj yog toog ntawd tseem tos nws lub sijhawm, nws maj nroos mus txog qhov uas tiav, nws tsis dag. Yog pom tias qeeb kuj tos mentsis, nws yuav tshwm los tiag tiag li, nws yuav tsis sej cia ntev.

4 Saib maj, tus uas lub siab tsis ncaj yuav ntog, tiamsis tus uas ncaj ncees yuav muaj txojsia nyob vim nws ntseeg (יחוח)Yahweh .

5 Tsis tag li ntawd, cawv txiv hmab dag ntxias xwb, tus tibneeg uas tsab ua loj nyob tsis tus. Nws txojkev hu loj dav npaum nkaus li tub tuag teb, yam li txojkev tuag uas tsis txawj tsau. Nws zuas zog ib tsoom tebchaws sawvdaws los rau nws tib leeg, nws sau ib tsoom tibneeg sawvdaws los ua nws li.

6 Ib tsoom tibneeg sawvdaws yuav tsis muaj lo lus cem thuam tau nws lov? Lawv yuav thuam saib tsis taus nws hais tias, tus uas sau zog tej uas tsis yog nws li los, thiab sau zog tej uas luag muab yuam nqe tau ntau kawg, yuav raug txom nyem lauj! Nws yuav ua li ntawd tau ntev li cas ne?

7 Txhua tus uas tshuav koj nqe yuav tsis sawv tsees tamsid lov? Thiab cov uas ua kom koj tshee yuav tsis tsim dheev lov? Thaum ntawd koj yuav raug luag txeeb thiab.

8 Vim koj twb lws ntau lub tebchaws lawm, ib tsoom tibneeg sawvdaws uas tseem tshuav yuav tuaj lws koj vim yog tim tibneeg tej ntshav los tag thiab qhov uas ua limhiam ntais ntuj rau lub ntiajteb thiab rau tej moos thiab rau txhua tus uas nyob hauv.

Cov Tibneeg Phem Yuav Raug Txom Nyem

9 Tus uas ua phem thiab tau ntau coj los rau hauv lub tsev yuav raug txom nyem lauj! Nws ua nws lub zes rau qhov chaw siab kawg, kom thiaj tsis muaj ib yam phem ncav mus txog.

10 Koj ntaus tswvyim phem ua rau koj lub tsev raug txaj muag vim koj rhuav tshem ntau haiv neeg pov tseg. Koj ua rau koj txojsia piam tag. 11 Tej pob zeb txhim phab ntsa yuav qw tuaj, tej qhab tse yuav teb hauv tej ntoo ua tsev tuaj.

12 Tus uas muab ntshav los ua lub moos thiab muab txojkev phem tiag lub taw nroog yuav raug txom nyem lauj!

13 Saib maj, qhov uas ib tsoom tibneeg ua haujlwm los rau hluavtaws hlawv, thiab qhov uas ib tsoom tebchaws ua khwv khwv tsis muaj qabhau, tsis yog los ntawm (יחוח)Yahweh  uas muaj hwjchim loj kawg nkaus los lov?

14 (יחוח)Yahweh  lub hwjchim ci ntsa iab yuav puv nkaus hauv lub qab ntuj rau sawvdaws paub, ib yam li dej puv hiavtxwv.

15 Tus uas chim tsawv yuam cawv rau kwvtij zej zog haus qaug es thiaj pom lawv nyob liab qab tsuas, yuav raug txom nyem lauj!

16 Koj yuav tsau npo txojkev txaj muag tsis yog tsau lub meej mom. Koj cia li haus thiab qaug puj poog. Lub khob uas nyob hauv (יחוח)Yahweh  txhais tes xis yuav ncig los txog koj, mas txojkev txaj muag yuav los rau saum koj lub meej mom.

17 Tej kev limhiam ntais ntuj uas koj ua rau Lenpanoos yuav los nyab kiag koj, thiab qhov uas muab tej tsiaj qus tsiaj nyeg tua ua lwj ua liam yuav ua rau koj ntshai, vim koj ua rau tej tibneeg los ntshav thiab ua limhiam ntais ntuj rau lub ntiajteb thiab rau tej moos thiab rau txhua tus uas nyob hauv.

18 Tej dab mlom txaug uas yog tus Kws txaug cia xwb, thiab tej dab mlom uas nchuav uas qhia kev dag, muaj qabhau abtsi? Tus Kws tso siab rau yam uas nws tsim, nws tsim tej dab mlom uas tsis txawj hais lus.

19 Tus uas hais rau tog ntoo tias, cia li tsim dheev, thiab hais rau lub pob zeb uas tsis txawj hais lus tias, cia li sawv tsees, yuav raug txom nyem lauj! Tej ntawd txawj qhuab qhia thiab lov? Saib maj, tej ntawd yog muab nyiaj thiab kub luam, los yeej tsis txawj ua pa kiag li.

20 (יחוח)Yahweh  nyob hauv nws lub tuam tsev uas dawb huv, cia tag nrho lub ntiajteb nyob twjywm rau ntawm nws lub xubntiag.