Habakkuk Tej Lus Thov

1 Habakkuk uas ua xibhwb cev lus tej lus thov uas raws li lub suab nkauj Sikiau-naus.

2 Au (יחוח)Yahweh , kuv tau hnov txog koj lub koob meej, au (יחוח)Yahweh , tej uas koj tau ua lawd kuv ntshai kawg. Ncua sijhawm no thov koj rov ua dua, peb tiam no thov qhia koj tej haujlwm rau peb paub. Thaum koj npau taws, thov koj nco txog txojkev khuvleej.

3 (יחוח)Yahweh  tuaj ntawm Themas tuaj, tus uas Dawb Huv tuaj ntawm lub roob Palas tuaj. Nws lub hwjchim ci ntsa iab laum nkaus saum ntuj, thiab lub ntiajteb kuj puv nkaus tej suab qhuas nws.

4 Nws ci lam lug yam li duab tshav ntuj, muaj duab ci nplas ntawm nws txhais tes uas nraim nws lub hwjchim cia.

5 Muaj mob kis mus ua nws ntej, muaj mob phem ti nkaus nws qab.

6 Nws sawv ntsug co lub ntiajteb, nws saib ntsoov thiab ua rau ib tsoom tebchaws tshee hnyo, mas tej roob uas nyob ib txwm los kuj tawg ri sua thiab tej pov roob uas nyob mus ib txhis kuj saus tag, yog tej roob uas thaum ub nws txeev mus los.

7 Kuv pom cov tibneeg Khusas tej tsev ntaub lwj siab ntsuav, thiab pom cov Midees daim ntaub xov tsev tshee hnyo.

8 Au (יחוח)Yahweh , koj npau taws rau tej dej lov? Koj npau taws rau tej hav dej lov? Lossis koj chim rau hiavtxwv rau thaum koj caij nees thiab thaum koj caij koj lub tsheb ua rog uas kov yeej lov?

9 Koj rho kiag rab hneev nti, nruab nkaus xub rau txoj hlua lawm. Koj ua rau lub ntiajteb tawg faib sua ua hav dej.

10 Tej roob pom dheev koj kuj ntswj ntseeg nkaws, tej nthwv dej ceev kuj ntsawj kiag mus, nruab tiv txwv kuj tsa suab nrov thiab ntas siab siab.

11 Lub hnub thiab lub hli nres twjywm ntawm lub chaw rau thaum koj rab xub ci tuaj mus thiab thaum koj rab hmuv ci nplas tuaj.

12 Koj hla lub ntiajteb mus ua npau taws vog, thiab tsuj pes ntiag ib tsoom teb chaws ua chim tsawv.

13 Koj tawm mus cawm koj haiv neeg kom dim, yog cawm tus uas koj hliv roj tsa kom dim. Koj tsoo cov tibneeg limhiam tus thawj, kom nyob liab qab txij ntawm taubhau ti nkaus kotaw.

14 Koj xuas koj rab hmuv nkaug nws cov tub rog tus thawj, rau thaum nws tuaj ceev li khaub zeeg cua yuav ua rau kuv tawg ri sua, nws zoo siab xyiv fab yam li nws yuav tau noj cov tibneeg pluag uas tsiv nraim lawm.

15 Koj caij koj tej nees tsuj hiavtxwv, ua rau dej loj nphau pes nphwv.

16 Kuv tau hnov, kuv ib ce tshee hnyo, thaum hnov lub suab kuv daim tawv ncauj kuj tshee hnyo. Kuv tej pob txha po, kuv txhais ceg vau pes tsus. Kuv yuav nyob twjywm tos rawv hnub txom nyem, uas yuav los raug cov tibneeg uas txeem tuaj ntaus peb.

17 Txawm yog tej txiv cev tsis tawg paj, tej txiv hmab tsis txi txiv, tej txiv aulib tu nrho lawm, tsis muaj qoob hauv tej teb, tej nkuaj nqha nrig tsis muaj yaj tsis muaj tshis thiab tej nkuaj nyug khoob ntshuv,

18 los kuv yuav xyiv fab rau hauv (יחוח)Yahweh , kuv yuav zoo siab rau (יחוח)Yahweh  uas cawm kuv dim.

19 (יחוח)Yahweh  yog kuv lub zog, nws ua kuv txhais kotaw zoo yam li kotaw maum muas lwj, nws ua rau kuv mus tau saum tej chaw siab. Zaj nkauj sau rau tus thawj coj hu, thiab siv nkauj nog ncas.