Hnub Uas (יחוח)Yahweh  Teem Txim

1 Cov lus no yog (יחוח)Yahweh  hais tuaj rau Zephanyah uas yog Khusis tus tub. Nws yawg yog Kedaliyas, nws yawg koob yog Amaliyas, nws yawg suab yog Hexekhiyas. Thaum (יחוח)Yahweh  hais cov lus no yog ncua sijhawm uas Asmoos tus tub Yauxiyas ua vajntxwv kav Yahdah tebchaws.

2 (יחוח)Yahweh  hais tias, kuv yuav muab txhua tsav txhua yam hauv qab ntuj no rhuav tshem pov tseg huvsi.

3 Kuv yuav rhuav tshem tej tibneeg thiab tej tsiaj qus tsiaj nyeg thiab tej noog saum nruab ntug thiab tej ntses hauv hiavtxwv huvsi. Kuv yuav muab cov tibneeg limhiam ntxuav pov tseg, kuv yuav rhuav tshem tibneeg kom ploj tag hauv qab ntuj. (יחוח)Yahweh  hais li no ntag.

4 Kuv yuav tsa tes kiag tawm tsam cov Yahdah thiab cov tibneeg hauv Yeluxalees huvsi. Kuv yuav rhuav tshem tej chaw uas tseem tshuav teev dab Npa‑as ntawm thaj chaw no, thiab kuv yuav muab tej txiv neeb txiv yaig lub npe rhuav tshem kom ploj mus.

5 Yog cov uas nyob saum txheej tsev las tshav pe hnub, pe hli, pe tej hnub qub saum nruab ntug. Thiab cov uas tuav (יחוח)Yahweh  lub npe yeem lus twv los tseem tuav dab Mikhoos lub npe yeem lus twv thiab.

6 Thiab cov uas tig kiag tsis raws (יחוח)Yahweh , thiab tsis nrhiav nws, thiab tsis ua nug rau (יחוח)Yahweh .

7 Cia li nyob twj ywm rau ntawm (יחוח)Yahweh  lub xub ntiag, rau qhov (יחוח)Yahweh  hnub los ze lawm. (יחוח)Yahweh  npaj tej uas nws yuav muab xyeem lawm thiab nws cais nws cov qhua kom dawb huv rau nws.

8 Hnub uas (יחוח)Yahweh  muab tua xyeem ntawd, kuv yuav teem txim rau cov nom tswv thiab vajntxwv tej tub thiab cov tibneeg uas muab lwm tebchaws tej tsoos los hnav.

9 Hnub ntawd kuv yuav rau txim rau txhua tus uas caws qia hla kiag taw rooj thiab cov tibneeg uas ua nruj ua tsiv ua tsis ncaj es tau qhov txhia chaw los puv nkaus tus lospav tsev.

10 (יחוח)Yahweh  hais tias, hnub ntawd mas yuav hnov suab quaj qw ntawm lub rooj loog Ntses, thiab hnov suab quaj nyiav ntawm ceg kaum nroog uas ua tshiab thiab hnov suab nrov pig poog saum tej roob.

11 Cov tibneeg uas nyob qhov zawj cia li quaj nyiav, vim nej tej tub lag tub luam tsis tshuav nyob lawm, cov uas luj nyiaj raug muab rhuav tshem tag lawm.

12 Thaum ntawd kuv yuav taws teeb mus tshuaj lub nroog Yeluxalees, kuv yuav rau txim rau cov tibneeg uas tso cev plhuav nyob zoo li tej txo cawv txiv hmab uas tseg cia ntev tsis lim kiag li. Lawv xav hauv lub siab tias,(יחוח)Yahweh  yuav tsis ua qhov zoo, thiab nws kuj yuav tsis ua qhov phem.

13 Lawv tej cuab txhiaj cuab tam yuav raug muab lws tag, thiab lawv tej vaj tse yuav nyob nqha lug cia. Lawv ua vaj ua tsev los lawv tsis tau nyob hauv, lawv ua teb txiv hmab los lawv yuav tsis tau haus tej cawv txiv hmab hauv tej teb ntawd. 14 (יחוח)Yahweh  hnub tseem ceeb los ze lawm, los ze zuj zus los sai kawg li. (יחוח)Yahweh  hnub ntawd yuav muaj suab quaj qhuav siab qhawv. Cov uas siab loj siab tuab los yuav quaj qw nrov nrov.

15 Hnub ntawd yog hnub uas npau taws, yog hnub uas txom nyem lwj siab heev, yog hnub uas raug puam tsuaj thiab piam tag du lug, yog hnub uas tsaus ntuj thiab tsaus dub nciab, yog hnub uas muaj huab thiab tsaus nti,

16 yog hnub uas muaj suab raj kub yaj nrov thiab suab tub rog qw nrov rau thaum lawv ntaus tej moos uas muaj ntsa loog thiab tej chaw zov khuav siab siab. 17 Kuv yuav tso kev txom nyem lwj siab los rau tej tibneeg, mas lawv yuav taug kev yam nkaus li tej dig muag. Vim yog lawv tau ua txhaum rau (יחוח)Yahweh , mas lawv tej ntshav yuav raug muab hliv nchuav yam nkaus li hmoov av, thiab lawv cev nqaij yuav raug muab nchuav pov tseg yam nkaus li tej quav tsiaj txhu.

18 Hnub uas (יחוח)Yahweh  npau taws lawv tej nyiaj tej kub, kuj pab tsis tau lawv dim. Qhov uas (יחוח)Yahweh  khib xeeb thiab npau taws yuav hlawv ib puas tsav yam hauv qab ntuj huvsi pov tseg. (יחוח)Yahweh  yuav ua rau ib tsoom tibneeg hauv qab ntuj no puam tsuaj tag huvsi tamsim ntag.