Nehemyah Mus Yeluxalees

1 Thaum lub hli Nixas, lub ib hlis, yog xyoo nees nkaum uas Athaxawxes ua vajntxwv, thaum muab cawv txiv hmab txawb rau ntawm nws lub xubntiag, kuv thiab cawv txiv hmab cev rau vajntxwv. Ua ntej ntawd kuv tsis tau ua ntsej muag mluas mlob rau ntawm nws xubntiag li.

2 Ces vajntxwv hais rau kuv tias, koj twb tsis muaj mob, ua cas koj mluas mlob? Qhov uas koj mluas mlob tsuas yog koj ntxhov siab xwb kaj. Ces kuv ntshai heev,

3 kuv thiaj hais rau vajntxwv tias, thov kom vajntxwv muaj txojsia nyob mus ib txhis. Ua cas kuv yuav tsis mluas mlob rau thaum lub nroog uas faus kuv tej poj koob yawm txwv raug muab tso tseg nyob do cuas thiab tej rooj loog kuj raug hluavtaws kub puam tsuaj tag?  

4 Ces vajntxwv txawm hais rau kuv tias, koj xav thov abtsi? Kuv txawm thov (יחוח)Yahweh, Tus Tswv uas nyob saum ntuj, twj ywm hauv lub siab.

5 Thiab kuv teb vajntxwv tias, vajntxwv, yog koj pom zoo thiab koj txaus siab rau kuv uas yog koj tus tub qhe, mas thov koj tso kuv mus rau hauv Yahdah tebchaws, mus rau hauv lub nroog uas faus kuv tej poj koob yawm txwv, xwv kuv thiaj tau tsim kho lub nroog ntawd dua tshiab.

6 Ces vajntxwv hais rau kuv rau thaum poj vajntxwv nyob ntawm vajntxwv ib sab hais tias, koj yuav mus ntev li cas, thaum twg koj li rov los? Yog li no vajntxwv thiaj txaus siab tso kuv mus. Ces kuv thiaj teem sijhawm.

7 Thiab kuv hais rau vajntxwv tias, yog vajntxwv pom zoo, thov ua ntawv rau kuv coj mus rau cov thawj uas kav lub xeev sab dej Yufetis hnub poob xwv lawv thiaj tso cai rau kuv hla zuj zus mus txog Yahdah tebchaws.

8 Thiab thov ua ntawv hais rau Axas uas kav vajntxwv lub hav zoov kom nws muab ntoo rau kuv ua tej npuab rooj rau lub chaw ruaj khov ntawm lub tuam tsev thiab ua lub nroog tej ntsa loog thiab kho lub tsev uas kuv yuav mus nyob. Vajntxwv thiaj pub txhua yam uas kuv thov rau kuv, vim yog (יחוח)Yahweh txhais tes zoo roos rawv kuv.

9 Ces kuv thiaj los txog cov thawj uas kav lub xeev sab dej Yufetis hnub poob thiab muab tej ntawv uas vajntxwv sau rau lawv. Vajntxwv kuj txib cov thawj tub rog thiab cov tub rog caij nees nrog kuv mus.

10 Thaum Xanpalas uas yog tibneeg Hauloos thiab tus nom tswv Thaunpiyah uas yog tibneeg Asmoos hnov tej no, mas nkawv tsis txaus siab heev, rau qhov uas muaj ib tug tuaj pab cov Ixayees kom tau zoo.

​

Nehemyah Ncig Saib Xyuas Tej Ntsa Loog

11 Kuv thiaj los txog Yeluxalees thiab so tau peb hnub.

12 Ces kuv txawm sawv thaum hmo ntuj thiab coj qee leej nrog kuv mus.  Kuv tsis qhia rau leejtwg paub tias (יחוח)Yahweh tau muab abtsi rau hauv kuv lub siab kom pab Yeluxalees. Kuv tsis muaj dua lwm tus tsiaj, tsuas muaj tus uas kuv caij xwb.

13 Thaum hmo ntuj, kuv thiaj tawm ntawm lub Rooj Loog Hav mus txog rau lub Qhov Dej Zaj thiab mus txog Rooj Loog Quav Tsiaj.  Kuv tshuaj saib Yeluxalees tej ntsa loog uas pob tag thiab tej rooj loog uas raug hluavtaws kub puam tsuaj tag.

14 Ces kuv txawm hla mus rau lub Rooj Loog Dej Txhawv thiab mus txog vajntxwv lub pas dej, tiamsis tsis tau kev rau tus tsiaj uas kuv caij hla mus.

15 Kuv thiaj maub tsaus ntuj nti hauv lub hav tshuaj saib lub ntsa loog, ces mam tig rov los nkag lub Rooj Loog Hav thiaj rov los txog tsev.

16 Cov nom tswv kuj tsis paub tias kuv mus qhovtwg lossis kuv mus ua abtsi. Kuv tsis tau qhia rau cov Yahdah, tsis hais cov pov thawj thiab cov uas ua hlob thiab cov thawj thiab lwm tus uas yuav ua tej haujlwm ntawd.

17 Ces kuv txawm hais rau lawv tias, nej kuj pom tias peb poob rau hauv txojkev txom nyem li cas lawm, vim yog qhov uas lub nroog Yeluxalees pob tag thiab tej rooj loog kub nyhiab tag. Cia li tuaj es peb ua lub ntsa loog Yeluxalees dua tshiab xwv peb thiaj tsis raug txaj muag.

18 Thiab kuv hais rau lawv paub txog qhov uas kuv Tus Tswv txhais tes roos rawv kuv ua zoo rau kuv thiab paub txog tej lus uas vajntxwv tau hais rau kuv. Mas lawv hais tias, peb cia li nqis tes ua dua tshiab.  Lawv thiaj koom siab nqis tes ua yam uas zoo ntawd.

19 Thaum Xanpalas uas yog tibneeg Hauloos thiab tus nom tswv Thaunpiyah uas yog tibneeg Asmoos thiab Kesees uas yog tibneeg Alas hnov tej no, lawv thuam luag saib tsis taus peb thiab hais tias, nej ua abtsi li no? Nej ntxeev siab rau vajntxwv lov?  

20 Mas kuv teb lawv tias, (יחוח)Yahweh, Tus Tswv uas nyob saum ntuj, yuav pab kom peb ua kom tiav. Peb cov uas yog nws cov tub qhe yuav nqis tes ua. Tiamsis nej tsis muaj feem, tsis muaj cai, tsis muaj ib yam abtsi uas nrog Yeluxalees koom kiag li.