Yeeb Ncuab Tuav Tswvyim Ua Phem

1 Thaum muaj tibneeg mus hais rau Xanpalas thiab Thaunpiyah thiab Kesees, uas yog tibneeg Alas, thiab lwm tus uas ua yeeb ncuab rau peb paub tias, kuv tau ua lub ntsa loog thiab kho tej qhov uas pob tiav lawm (lub sijhawm ntawd kuv tsis tau nruab txhib qhov rooj rau ntawm rooj loog),

2 mas Xanpalas thiab Kesees txib tibneeg tuaj hais rau kuv tias, thov koj tuaj ntsib peb rau hauv ib lub zos Khefawlis uas nyob ntawm lub tiaj Aunaus.  Twb yog lawv ntaus tswvyim yuav ua phem rau kuv ntag.  

3 Kuv thiaj txib tibneeg mus hais rau lawv tias, kuv tab tom ua haujlwm tseem ceeb kawg, tuaj tsis tau.  Ua cas peb yuav tso haujlwm tseg rau thaum kuv tawm mus cuag nej?  

4 Mas lawv tseem txib tibneeg tuaj hais rau kuv li no plaub zaug, kuv kuj teb lawv ib yam nkaus thiab.  

5 Zaum tsib, Xanpalas txib nws ib tug tub teg tub taws tuaj cuag kuv ib yam li qub thiab coj ib tsab ntawv qhib lug tuav rawv ntawm nws txhais tes tuaj.

6 Hauv tsab ntawv sau hais tias, muaj xov hauv ib tsoom tibneeg thiab Kesees kuj hais tias, yeej muaj tseeb li ntawd, koj thiab cov Yahdah npaj siab yuav ntxeev siab.  Yog li no koj thiaj ua lub ntsa loog, thiab koj xav ua lawv tus vajntxwv raws li tej xov no.  

7 Thiab koj twb tsa cov xibhwb cev (יחוח)Yahweh lus tshaj tawm txog koj rau hauv Yeluxalees tias, muaj ib tug vajntxwv hauv Yahdah lawm. Nimno yuav hais tej lus no mus rau vajntxwv paub. Vim li no thov koj tuaj es wb sablaj ua ke.

8 Mas kuv thiaj tso tibneeg mus hais rau nws tias, yam uas koj hais kod, kuv yeej tsis tau ua li, koj xav tswvyim raws li koj lub siab xwb.

9 Rau qhov lawv sawvdaws xav hem kom peb ntshai, thiab xav tias peb txhais tes yuav tso haujlwm tseg thiab tej haujlwm yuav tsis tiav. Au (יחוח)Yahweh, nimno thov koj txhawb kuv txhais tes lub zog.

10 Kuv txawm mus rau hauv Delayah tus tub Semayah lub tsev, nws yog Mehethanpees tus xeeb ntxwv, nws pheej nyob hauv tsev xwb, mas Semayah hais tias, cia wb mus sib ntsib rau hauv (יחוח)Yahweh lub tuam tsev chav uas pe hawm (יחוח)Yahweh, thiab cia wb muab qhov rooj tuam tsev kaw, rau qhov lawv yuav tuaj tua koj, thaum tsaus ntuj lawv yuav tuaj tua koj pov tseg.

11 Tiamsis kuv hais tias, tus tibneeg zoo li kuv yuav txaus khiav lov? Thiab tibneeg zoo li kuv yuav nkag mus rau hauv lub tuam tsev thiaj cawm tau siav lov? Kuv tsis mus.

12 Mas kuv nkag siab thiab pom tias, tsis yog (יחוח)Yahweh txib nws tuaj, tiamsis yog nws cev lus tawm tsam kuv, vim Thaunpiyah thiab Xanpalas tau ntiav nws lawm.  

13 Nkawv ntiav nws tuaj xav tias yuav ua rau kuv ntshai thiab kuv yuav ua li ntawd thiaj ua txhaum muaj txim, mas lawv thiaj li coj tau kuv lub npe mus xyav xwv lawv thiaj thuam luag tau kuv.

14 Au (יחוח)Yahweh, thov koj nco txog Thaunpiyah thiab Xanpalas raws li tej uas nkawv ua no, thiab nco txog Nau‑adiyah uas yog tus pojniam xibhwb cev (יחוח)Yahweh lus thiab lwm tus uas cev (יחוח)Yahweh lus uas xav ua kom kuv ntshai.

15 Lub ntsa loog thiaj tiav rau hnub tim nees nkaum tsib, lub hli Elus, lub rau hlis ntuj, huvsi peb ua tsib caug ob hnub. 

16 Thaum peb cov yeeb ncuab sawvdaws tau hnov, ib tsoom tebchaws uas nyob ib ncig peb kuj ntshai thiab poob ntsej muag tag, rau qhov lawv pom tias tej haujlwm no ua tau tiav, vim yog muaj (יחוח)Yahweh, uas yog peb Tus Tswv pab peb.

17 Dua li ntawd lub sijhawm ntawd cov uas ua hlob hauv Yahdah kuj xa ntau tsab ntawv mus rau Thaunpiyah, thiab Thaunpiyah tej ntawv kuj tuaj txog lawv.

18 Rau qhov cov Yahdah muaj ntau leej nrog Thaunpiyah cog lus sib raug zoo vim nws yog Alas tus tub Sekhaniyah tus vauv, thiab nws tus tub Yahchanan tau yuav Npelekhiyah tus tub Mesulas tus ntxhais ua pojniam.

19 Lawv hais txog tej qhov zoo uas Thaunpiyah ua rau kuv mloog thiab coj kuv tej lus mus qhia rau nws.  Mas Thaunpiyah xa ntawv tuaj hem ua kom kuv ntshai.