Nehemyah Pab Cov Tibneeg Pluag

1 Cov pejxeem thiab lawv tej pojniam quaj ntsoog qees yws lawv cov kwvtij Yahdah.

2 Muaj ib co tibneeg quaj hais tias, peb yuav tau muab peb tej tub tej ntxhais coj mus yuam nqis ua ntej. Lawv thiaj yuav muab qoob rau peb, peb thiaj tau noj thiab muaj txoj sia nyob tau.

3 Thiab muaj dua ib co quaj hais tias, peb yuav tau muab peb tej teb, peb tej vaj txiv hmab thiab peb tej vaj tse coj mus yuam nqis thiaj tau qoob, vim yog muaj kev tshaib nqhis heev.

4 Hos muaj dua ib co quaj hais tias, peb twb muab peb tej teb thiab peb tej vaj txiv hmab coj mus yuam nyiaj los them se rau vajntxwv lawm.   

5 Peb lub cev nqaij kuj zoo ib yam li peb cov kwvtij, peb tej menyuam kuj zoo ib yam li lawv tej menyuam, los peb tseem yuav tau muab peb tej tub tej ntxhais coj mus yuam ua qhev, thiab peb tej ntxhais qee leej twb raug yuam ua qhev lawm. Tiamsis peb pab tsis tau, vim peb tej teb thiab tej vaj txiv hmab nyob rau hauv luag tes lawm.

6 Thaum uas kuv hnov lawv tej suab quaj qw thiab lawv tej lus lawm mas kuv chim heev.

7 Kuv muab tej no xav txhij xav txhua thiab kuv coj mus kom rau cov uas ua hlob thiab cov thawj.  Kuv hais rau lawv tias, nej txhua tus sau paj nyiag ntawm nej cov kwvtij. Thiab kuv hu cov pejxeem coob tuaj txoos ua ke tawm tsam lawv.

8 Thiab kuv hais rau lawv tias, peb twb txhiv peb cov kwvtij Yahdah uas raug muab muag rau lwm lub tebchaws los npaum li uas peb muaj peevxwm ua tau, tiamsis nej tseem rov muab nej cov kwvtij muag, lawv thiaj raug muab muag rau peb ntag.  Lawv kuj nyob ntsiag to teb tsis taus ib los li.

9 Kuv thiaj hais tias, tej uas nej ua ntawd tsis zoo.  Tsis tsim nyog nej ua lub neej paub ntshai ()Yahweh lov? Kom ib tsoom tebchaws uas yog peb cov yeeb ncuab thiaj tsis muaj chaw thuam luag peb lov?

10 Dua li ntawd kuv thiab kuv cov kwvtij thiab kuv cov tub qhe thiaj muab nyiaj thiab qoob txais rau lawv. Cia peb tseg tsis txhob sau paj nyiag.

11 Hnub no cia li muab lawv tej teb, tej vaj txiv hmab, tej teb txiv aulib thiab lawv tej vaj tse thiab tej paj nyiag thiab tej qoob, tej cawv txiv hmab thiab tej roj uas nej sau tshaj, thim rov rau lawv.

12 Mas lawv teb tias, peb yuav thim tej ntawd rov qab thiab yuav tsis sau ib yam abtsi ntawm lawv lawm. Peb yuav ua raws li uas koj hais.  Ces kuv thiaj hu cov pov thawj los thiab kom cov tibneeg ntawd cog lus twv tias, lawv yuav ua raws li uas lawv cog lus tseg lawd.

13 Kuv thiaj li nchos kuv lub tsho thiab hais tias, ib yam nkaus li no, yog leejtwg tsis ua raws li uas cog lus tseg no, thov (יחוח)Yahweh muab nws nchos tawm hauv nws lub tsev thiab hauv nws tej haujlwm, nws thiaj yuav raug muab nchos tawm mus tes dawb tes do.  Mas cov tibneeg uas tuaj txoos ua ke ntawd sawvdaws teb tias, Amees, thiab qhuas (יחוח)Yahweh.  Thiab cov tibneeg kuj ua raws li uas lawv cog lus cia.  

14 Dua li ntawd txij thaum kuv raug tsa ua tus uas kav Yahdah tebchaws, yog txij xyoo nees nkaum mus txog xyoo peb caug ob uas Athaxawxes ua vajntxwv mas huvsi yog kaum ob xyoos, mas kuv thiab kuv cov kwvtij tsis tau noj tej zaub mov uas yog tus tswv xeev li feem.  

15 Cov tswv xeev uas ua kuv ntej tau quab yuam cov pejxeem nyhav heev thiab tseem kom lawv them plaub caug sekhees nyiaj tsav rau tej zaub mov thiab cawv txiv hmab ntawd. Txawm yog lawv cov tub teg tub taws los kuj tsab ua loj rau cov pejxeem thiab. Tiamsis kuv tsis tau ua li ntawd, vim kuv hwm thiab paub ntshai (יחוח)Yahweh.

16 Kuv tseem ua tej haujlwm uas ua lub ntsa loog no, thiab kuv tsis tau ib thaj av kiag li, thiab kuv cov tub qhe sawvdaws tuaj ua ke ua ntsa loog thiab.

17 Dua li ntawd kuv tseem muaj ib puas tsib caug leej nrog kuv noj ua ke, yog cov Yahdah thiab cov nom tswv, yog tsav rau cov uas tuaj hauv tej tebchaws uas nyob ib ncig peb tuaj nrog peb nyob.

18 Tej uas npaj rau peb noj mas ib hnub, yog ib tug nyuj thiab rau tus yaj uas zoo kawg. Thiab luag npaj qaib rau kuv, thiab npaj hnab cawv txiv ntau heev, kaum hnub ib zaug. Txawm yog muaj npaum li no los kuv yeej tsis tau sau tej zaub mov uas yog tus tswv xeev li feem, vim qhov uas ua koom li no twb nyhav rau cov pejxeem no lawm.  

19 Au (יחוח)Yahweh, thov koj nco txog txhua yam uas kuv tau ua pab cov tibneeg no kom kuv thiaj tau qhov zoo.