Muaj Tibneeg Tawm Tsam Qhov Uas Ua Ntsa Loog

1 Thaum Xanpalas hnov tias peb tab tom ua lub ntsa loog, nws txawm chim npau taws heev, nws thiaj thuam luag cov Yahdah.

2 Nws hais tab meeg nws cov kwvtij thiab tab meeg cov tub rog Xamalis tias, cov Yahdah uas tsis muaj zog no ua abtsi li ntawd ne? Lawv yuav kho dua tshiab lov? Lawv yuav tua tsiaj xyeem no lov? Lawv yuav ua ib hnub kom tiav no lov? Lawv yuav muab tej txhais zeb uas hlawv pob tag ua tej niag pawg   khaws rov qab los siv dua no lov?

3 Thaunpiyah uas yog tibneeg Asmoos nyob ib sab ntawm nws thiab hais tias, lub ntsa loog pob zeb uas lawv tab tom ua ntawd, yog ib tug hma dhia rau saud xwb, ces yuav ua rau pob tag.

4 Ces kuv, Nehemyah, thiaj li thov Tus Tswv hais tias, Au (יחוח)Yahweh, thov koj tig ntsej mloog, rau qhov peb raug saib tsis taus. Thov tig lawv lub suab thuam lub suab luag rov mus poob rau saum lawv lub taubhau, thiab thov cia lawv raug luag lwg rau hauv lub tebchaws uas lawv raug ntes coj mus nyob.

5 Thov tsis txhob npog lawv tej kev txhaum cia thiab tsis txhob rhuav lawv lub txim kom ploj ntawm koj lub qhov muag mus, rau qhov lawv tau thuam luag rhuav cov uas ua ntsa loog no ntsej muag.

6 Peb thiaj ua lub ntsa loog mas lub ntsa loog twb tuaj sib txuas tag, siab txog ib nrab lawm, rau qhov yog cov pejxeem rau siab ua haujlwm.

7 Tiamsis thaum Xanpalas thiab Thaunpiyah thiab cov Alas thiab cov Asmoos thiab cov tibneeg hauv Asadaus hnov tias qhov uas tsim kho Yeluxalees tej ntsa loog tab tom ua tiav zuj zus, thiab tej qhov uas pob tab tom muab txhaws, lawv txawm chim heev.

8 Lawv txawm ntaus tswvyim yuav tuaj ua rog rau Yeluxalees thiab ua kom muaj kev kub ntxhov rau hauv Yeluxalees.

9 Peb thiaj thov peb Tus Tswv thiab tso tibneeg zov tiv thaiv lawv nruab hnub hmo ntuj.

10 Tiamsis cov tibneeg Yahdah hais tias, cov uas ua haujlwm kwv nra lub zog ntaug zuj zus lawm, thiab muaj tej niag pawg txhais zeb ntau heev. Peb yuav kho tsis taus lub ntsa loog lawm.  

11 Thiab tej yeeb ncuab tseem hais tias, lawv yuav tsis paub, tsis pom peb mus txog thaum peb txeem plaws rau hauv lawv thiab muab lawv tua thiab txwv nkaus lawv tej haujlwm.

12 Ces cov Yahdah uas nyob ze lawv tuaj hais rau peb kaum zaus tias, lawv yuav sawv hauv lawv txhua lub chaw nyob tuaj ua rog rau peb.

13 Kuv thiaj tsa ib cov tibneeg nyob rau tej chaw uas qis kawg sab hauv lub ntsa loog raws li lawv tej cum, tuav rawv ntaj thiab hmuv thiab hneev zov.

14 Kuv pom tias lawv ntshai heev, kuv thiaj li sawv tsees hais rau cov uas ua hlob thiab cov thawj thiab cov pejxeem sawvdaws tias, nej tsis txhob ntshai lawv.  Cia li nco ntsoov txog (יחוח)Yahweh, Tus Tswv uas yog tus loj kawg thiab txaus ntshai es tiv thaiv pab nej cov kwvtij, nej tej tub tej ntxhais, nej tej pojniam thiab nej tej vaj tse.

15 Thaum peb cov yeeb ncuab hnov tias peb twb paub lawv lub tswvyim lawm thiab (יחוח)Yahweh twb rhuav tej uas lawv ntaus tswvyim lawm, mas peb sawvdaws thiaj nyias rov los ua nyias tej haujlwm ntawm ntsa loog.

16 Txij hnub ntawd los, kuv cov tibneeg ib nrab ua ntsa loog, ib nrab tuav rawv hmuv thiab daim phiaj hlau thaiv thiab hneev thiab lub tsho hlau. Cov thawj kuj sawv tom qab cov Yahdah sawv daws,

17 uas ua ntsa loog. Cov uas kwv nra txhua tus ib txhais tes ua haujlwm, ib txhais tes tuav rawv cuab yeej ua rog.

18 Txhua tus uas ua ntsa loog kuj ris rawv ntaj ntawm duav rau thaum tab tom ua. Tus uas tshuab raj kub yaj kuj sawv ntawm kuv ib sab.

19 Kuv hais rau cov uas ua hlob thiab cov thawj thiab cov pejxeem sawvdaws tias, peb tej haujlwm kuj loj thiab nthuav dav heev, thiab peb nyob saum lub ntsa loog ib leeg nrug deb ib leeg.

20 Thaum nej hnov lub suab raj kub yaj nrov qhov twg tuaj, nej cia li khiav los pab peb qhov ntawd. Peb Tus Tswv (יחוח)Yahweh yuav ua rog pab peb.  

21 Peb thiaj ua haujlwm li no, peb ib nrab tuav rawv hmuv thaum kaj ntug txoog mus txog thaum cov hnub qub tawm.

22 Thaum ntawd kuv kuj hais rau cov pejxeem tias, cia cov txivneej txhua tus thiab lawv tej tub qhe pw hmo ntuj hauv Yeluxalees kom lawv thiaj zov tau lub nroog rau peb hmo ntuj thiab ua haujlwm nruab hnub.

23 Kuv thiab kuv cov kwvtij thiab kuv cov tibneeg thiab cov uas nrog kuv zov, tsis muaj leejtwg hle tsoos tsho, txhua tus nyias tuav rawv nyias tej cuab yeej.