Exaleyah Nyeem (יחוח)Yahweh Phau Kevcai Rau Cov Pejxeem Mloog

1 Mas cov pejxeem sawvdaws tuaj txoos ua ke txhij zog rau hauv lub tshav puam ntawm Rooj Loog Dej thiab lawv hais kom xibhwb Exaleyah coj Mauxes phau ntawv kevcai uas (יחוח)Yahweh hais rau cov Ixayees tuaj.

2 Hnub xiab ib, lub xya hli, tus pov thawj Exaleyah kuj coj phau ntawv kevcai tuaj rau ntawm cov pejxeem uas tuaj txoos ua ke, uas yog cov pojniam, txivneej thiab txhua tus uas txawj nkag siab.

3 Mas nws tig xubntiag rau lub tshav puam ntawm Rooj Loog Dej nyeem thaum sawv ntxov mus txog tav su rau cov pojniam, txivneej thiab txhua tus uas txawj nkag siab mloog. Cov pejxeem sawvdaws kuj tig ntsej zoo zoo mloog phau ntawv kevcai ntawd.

4 Xibhwb Exaleyah sawv ntsug saum lub sam thiaj ntoo uas lawv ua siv rau qhov kev no. Cov uas sawv ntawm nws sab xis yog Mattithyah, Semas, Anayah, Uliyah, Hikhiyah thiab Ma‑axeyah, cov uas nyob ntawm nws sab laug yog Pedayah, Misa‑ees, Makhiyah, Hasus, Hanpadanas, Xekhaliyah thiab Mesulas.  

5 Exaleyah nthuav phau ntawv tab meeg cov pejxeem sawvdaws, rau qhov nws nyob siab dua lawv. Thaum nws nthuav phau ntawv, cov pejxeem sawvdaws kuj sawv ntsug.

6 Thaum Exaleyah qhuas (יחוח)Yahweh, Tus Tswv uas muaj hwj chim loj kawg nkaus hais tias, HalleluYahweh! Mas cov pejxeem sawvdaws tsa tes teb hais tias, HalleluYahweh, Amees! Lawv nyo hau khoov ntshis ua plhu ti nkaus av pe hawm (יחוח)Yahweh.

7 Yahshua, Npanis, Selenpiyah, Yamis, Akhus, Sanpethais, Haudiyah, Ma‑axeyah, Khelithas, Axaliyah, Yahxanpas, Hanas thiab Pelayah uas puav leej yog cov Levis, kuj pab qhia cov pejxeem kom nkag siab txoj kevcai rau thaum uas cov pejxeem tseem sawv ntsuj twjywm ntawm lawv qhov chaw.

8 Thiab lawv nyeem phau ntawv uas yog (יחוח)Yahweh txoj kevcai meej meej, thiab txhais lub ntsiab cov pejxeem thiaj nkag siab tej lus uas nyeem ntawd.

9 Nehemyah uas yog tus tswv xeev thiab xibhwb Exaleyah uas ua pov thawj thiab cov Levis uas qhia cov pejxeem hais rau cov pejxeem sawvdaws tias, hnub no yog hnub dawb huv rau (יחוח)Yahweh uas yog nej Tus Tswv. Nej tsis txhob tu siab, tsis txhob quaj. Rau qhov ib tsoom pejxeem sawvdaws quaj rau thaum lawv hnov tej lus hauv phau kevcai ntawd.

10 Nehemyah hais rau lawv tias, cia li mus noj tej nqaij, tej qhauv thiab haus cawv txiv hmab qab zib, thiab muab ib txhia pub rau cov uas tsis tau npaj noj, rau qhov hnub no yog hnub dawb huv rau (יחוח)Yahweh. Nej tsis txhob ntxhov siab kiag li, vim qhov uas zoo siab xyiv fab rau (יחוח)Yahweh, yog nej lub zog.

11 Cov Levis thiaj ua rau ib tsoom pejxeem nyob ntsiag to hais tias, nyob twjywm, rau qhov hnub no yog hnub dawb huv.  Tsis txhob ntxhov siab kiag li.

12 Ces cov pejxeem sawvdaws thiaj mus noj haus thiab muab ib txhia pub rau luag thiab ua zoo siab xyiv fab kawg, rau qhov lawv nkag siab tej lus uas piav rau lawv mloog ntawd.

13 Hnub uas ob, cov thawj hauv txhua cum thiab cov pov thawj thiab cov Levis tuaj kawm tej lus hauv txoj kevcai ntawm xibhwb Exaleyah.

14 Mas lawv pom txoj kevcai sau cia hais tias, (יחוח)Yahweh tau kom Mauxes hais tias, cov Ixayees yuav tau nyob hauv tsev pheeb suab rau thaum ua kevcai noj haus rau lub xya hli,

15 thiab lawv yuav tau tshaj tawm thiab piav rau hauv lawv tej moos txhua lub thiab hauv Yeluxalees tias, cia li tawm mus rau pem roob, coj tej ceg txiv aulib thiab ceg txiv aulib qus thiab ceg txiv ntoo roj thiab nplooj kuj yem thiab lwm yam nplooj ntoo los ua tsev pheeb suab, raws li tau sau cia lawd.

16 Cov pejxeem thiaj tawm mus coj tej ceg nplooj los thiab ua tsev pheeb suab rau lawv nyob rau saum lawv txheej tsev las tshav thiab ntawm lawv tej tog tsev thiab rau ntawm (יחוח)Yahweh lub tuam tsev tej tshav puam thiab rau hauv lub tshav puam ntawm Rooj Loog Dej thiab hauv lub tshav puam ntawm Rooj Loog Efa‑is.

17 Ib tsoom pejxeem sawvdaws uas poob tebchaws rov los kuj ua tsev pheeb suab thiab nyob hauv. Txij thaum Noos tus tub Yahshua nyob txog hnub ntawd cov Ixayees tsis tau ua ib zaug li. Lawv zoo siab xyiv fab kawg.

18 Thiab Exaleyah niaj hnub nyeem (יחוח)Yahweh phau kevcai, txij thawj hnub mus txog hnub kawg uas lawv ua kevcai. Nws nyeem tau xya hnub, mas hnub uas yim lawv tuaj txoos ua ke caiv so tiag tiag, raws li uas hais cia.