Cov Ixayees Lees Txim

1 Hnub tim nees nkaum plaub, lub hli no cov Ixayees tuaj txoos ua ke coj kevcai yoo mov thiab hnav khaub seev tsaj thiab tsuab av rau saum taubhau.

2 Thiab cov Ixayees cais lawv tawm hauv lwm haiv neeg sawvdaws thiab sawv lees lawv lub txim thiab lees lawv tej poj koob yawm txwv tej kev txhaum.

3 Lawv sawv ntawm lawv lub chaw thiab nyeem (יחוח)Yahweh uas yog lawv Tus Tswv phau kevcai ntev txog peb teev.  Lawv lees txim thiab pe hawm (יחוח)Yahweh uas yog lawv Tus Tswv peb teev ntxiv.

4 Yahshua, Npanis, Khami‑ees, SenpaniyaH, Npunis, SelenpiyaH, Npanis thiab Khenanis sawv ntawm cov Levis tus ntaiv qw nrov nrov rau (יחוח)Yahweh uas yog lawv Tus Tswv.

5 Mas cov Levis yog Yahshua, Khami‑ees, Npanis, Hasaneyah, Selenpiyah, Haudiyah, Senpaniyah thiab Pethahiyah hais tias, cia li sawv tsees qhuas (יחוח)Yahweh uas yog nej Tus Tswv txij thaum ub los mus ib txhis tsis kawg. Cia li qhuas (יחוח)Yahweh lub npe uas muaj koob meej loj kawg, yog lub npe uas nyob siab kawg uas tsis muaj leejtwg qhuas thiab ua tsaug txaus.

6 Koj tib leeg xwb thiaj yog (יחוח)Yahweh. Koj tsim lub ntuj uas siab kawg nkaus thiab ib puas tsav yam uas nyob saum nruab ntug, koj tsim lub ntiajteb thiab txhua yam uas nyob hauv, thiab tsim dej hiavtxwv thiab txhua yam uas nyob hauv dej. Koj pub txojsia rau tej no huvsi, thiab ib puas tsav yam uas nyob saum nruab ntug pe hawm koj.

7 Koj yog (יחוח)Yahweh, yog peb Tus Tswv, tus uas xaiv Aplas thiab coj nws tawm hauv lub moos Aws uas nyob hauv tebchaws Kheedias los thiab tis nws lub npe hu ua Anplaham.

8 Thiab koj pom tias nws lub siab xib rau koj, thiab koj nrog nws sib cog lus tias, koj yuav muab cov Khana‑as, cov Hithais, cov Amaulais, cov Pelixais, cov Yenpus thiab cov Kawkasis lub tebchaws rau nws caj ces, thiab koj tau ua rau koj tej lus cog tseg tiav rau qhov koj ncaj ncees.

9 Koj tsa muag saib peb tej poj koob yawm txwv tej kev txom nyem hauv Iziv tebchaws thiab mloog lawv lub suab quaj ntawm Hiavtxwv Liab,

10 thiab koj ua tej txujci tseem ceeb thiab txujci loj uas tibneeg xav tsis thoob tawm tsam Falaus thiab nws cov tub teg tub taws huvsi thiab nws cov pejxeem hauv nws lub tebchaws huvsi, rau qhov koj paub tias lawv khav ntxhias tsim txom peb tej poj koob yawm txwv, mas koj lub npe thiaj nrov nto moo lug los txog niaj hnub nimno.

11 Koj faib dej hiavtxwv rau ntawm lawv xubntiag, lawv thiaj li tau mus saum tej av qhuav hauv nruab nrab hiavtxwv, thiab koj muab cov uas caum lawv, laim rau hauv nruab tiv txwv ib yam li laim pob zeb rau hauv hiavtxwv uas tob kawg. 12 Nruab hnub, koj muab tus ncej huab los coj lawv, hmo ntuj, koj muab tus ncej hluavtaws ci rau lawv pom txojkev uas lawv yuav mus.

13 Koj nqis los rau saum lub roob Xinais thiab hais saum ntuj los rau lawv thiab pub tej kevcai ncaj thiab txoj kevcai tseeb, thiab tej kab ke thiab tej lus cob qhia uas zoo rau lawv.

14 Thiab koj qhia lawv paub txog koj hnub Sabbath uas dawb huv thiab kom Mauxes uas yog koj tus qhev muab tej lus cob qhia thiab tej kab ke thiab txoj kevcai qhia rau lawv.

15 Koj pub mov saum ntuj los rau thaum lawv tshaib plab thiab muab dej txhawv hauv phab zeb rau thaum lawv nqhis, thiab koj hais kom lawv mus txeeb lub tebchaws uas koj twb cog lus ruaj tias yuav pub rau lawv.

16 Tiamsis lawv thiab peb tej poj koob yawm txwv khav theeb thiab tawv ncauj tsis mloog koj tej lus cob qhia.  

17 Lawv tsis kam mloog lus thiab tsis nco tej txujci tseem ceeb uas koj ua tshwm rau hauv lawv nruab nrab. Lawv tawv ncauj thiab tsa ib tug thawj coj lawv rov qab mus ua qhev rau hauv Iziv tebchaws. Tiamsis koj yog peb Tus Tswv uas muaj kev zam txim, muaj lub siab zoo thiab muaj kev hlub, tsis chim sai thiab koj txojkev hlub uas ruaj khov muaj nplua mias, thiab koj tsis muab lawv tso pov tseg.

18 Txawm yog lawv tau nchuav ib tug dab mlom thav nyuj rau lawv thiab hais tias, no yog nej Tus Tswv uas coj nej tawm hauv Iziv tebchaws los, thiab ua tej uas tuam mom kawg,

19 los vim yog koj txojkev hlub loj, koj thiaj tsis tso lawv tseg rau hauv tebchaws moj sab qhua.  Tus ncej huab uas coj lawv nruab hnub thiab tus ncej hluavtaws uas ci hmo ntuj rau lawv pom txojkev uas lawv yuav mus thiaj tsis ncaim lawv. 20 Koj pub koj Tus Ntsuj Plig Dawbhuv zoo qhuab qhia lawv, thiab tsis tav koj cov manas tu ntawm lawv lub qhov ncauj, thiab pub dej rau thaum lawv nqhis.

21 Koj yug lawv hauv tebchaws moj sab qhua tau plaub caug xyoo thiab lawv tsis tu ncua ib yam abtsi. Lawv tej ris tsho kuj tsis ntuag, lawv tej kotaw kuj tsis o.

22 Thiab koj muab tej tebchaws thiab tej haiv neeg rau lawv, thiab tu ciam teb rau lawv, lawv thiaj txeeb tau vajntxwv Xihoos hauv lub moos Hesa-npoos tebchaws thiab vajntxwv Aus lub tebchaws Npasas.

23 Koj ua rau lawv caj ces huaj vam coob yam li cov hnub qub saum nruab ntug, thiab koj coj lawv mus rau hauv lub tebchaws uas koj hais kom lawv tej poj koob yawm txwv txeem mus txeeb ntawd.

24 Lawv caj ces thiaj li txeem mus txeeb tau lub tebchaws ntawd. Koj yuam ntiag cov Khana‑as uas nyob hauv lub tebchaws ntawd rau tom lawv hauv ntej thiab muab cov tibneeg thiab lawv tej vajntxwv thiab tej pejxeem hauv lub tebchaws ntawd cob rau hauv lawv txhais tes, lawv thiaj ua tau rau cov tibneeg ntawd raws li lawv lub siab xav.

25 Lawv thiaj txeeb tau tej moos uas muaj ntsa loog thiab lub tebchaws uas zoo qoob thiab txeeb tau luag tej vaj tse uas muaj cuab txhiaj cuab tam zoo puv nkaus, thiab tej pas dej uas khawb cia lawd thiab tej vaj txiv hmab, tej teb txiv aulib thiab tej txiv ntoo ntau kawg. Lawv thiaj tau noj tsau npo rog nthaws, thiab lawv zoo siab xyiv fab rau tej hmoov zoo uas koj pub.

26 Txawm li ntawd los lawv tseem tsis mloog lus thiab ntxeev siab rau koj thiab muab koj txoj kevcai laim tseg rau tom qub qab thiab tua koj cov xibhwb cev lus uas pheej qhuab ntuas kom lawv rov los cuag koj, thiab lawv ua tuam mom koj loj heev.  

27 Yog li ntawd koj thiaj muab lawv tso rau hauv lawv cov yeeb ncuab txhais tes uas ua rau lawv raug txom nyem.  Mas lub sijhawm uas lawv raug txom nyem ntawd, lawv quaj hu koj mas koj nyob saum ntuj hnov lawv hu, ces raws li koj txojkev hlub uas loj kawg, koj xa cov uas mus pab lawv thiab cawm lawv dim hauv yeeb ncuab txhais tes.

28 Tiamsis thaum lawv nyob tiaj tus lawm, lawv rov ua tej uas koj pom tias phem, koj thiaj muab lawv tso rau hauv cov yeeb ncuab txhais tes, yeeb ncuab thiaj kav lawv. Txawm li ntawd los thaum lawv tig los quaj rau koj, koj nyob saum ntuj hnov, thiab koj kuj cawm lawv dim ntau zaus raws li koj txojkev hlub.

29 Thiab koj qhuab ntuas lawv xwv thiaj li tig tau lawv rov los cuag koj txoj kevcai. Los lawv tseem ua lub neej khav theeb tsis mloog koj tej lus

nkaw, thiaj tau ua txhaum rau koj tej kevcai uas yog leejtwg ua raws li nws yuav muaj txojsia nyob.  Thiab lawv tseem tig nrob qaum rau koj, tawv nyom tsis mloog lus.

30 Koj ua siab ntev thev lawv ntau xyoo, thiab koj pub koj Tus Ntsuj Plij Dawbhuv rau cov xibhwb cev koj tej lus qhuab ntuas lawv los lawv kuj tsis tig ntsej mloog.  Vim li no koj thiaj muab lawv cob rau hauv lwm haiv neeg, hauv ib tsoom tebchaws txhais tes.  

31 Txawm li ntawd los vim yog koj txojkev hlub uas loj kawg, koj tsis ua rau lawv puam tsuaj tag huvsi thiab tsis tso lawv tseg, vim koj yog Tus Tswv uas zam txim thiab hlub.

32 Au (יחוח)Yahweh, koj yog peb Tus Tswv uas loj kawg thiab muaj hwjchim thiab txaus ntshai, koj tuav rawv tej lus cog tseg thiab txojkev hlub uas ruaj khov.  Mas thov koj tsis txhob suav tias peb tej kev txom nyem no huvsi yog ib qhov me me uas raug peb thiab peb tej vajntxwv, thiab raug peb cov thawj thiab peb cov pov thawj thiab peb cov xibhwb cev koj tej lus, thiab peb tej poj koob yawm txwv thiab koj haiv neeg huvsi, txij thaum vajntxwv Axiliads los txog hnub no.

33 Mas txhua yam uas raug peb no, koj ua ncaj ua ncees, rau qhov koj pheej ua ncaj raws li koj cog lus tseg, tiamsis peb pheej ua limhiam xwb.

34 Peb tej vajntxwv, peb cov thawj, peb cov pov thawj thiab peb tej poj koob yawm txwv tsis tuav rawv koj txoj kevcai thiab tsis mloog koj tej lus cob qhia thiab tej lus uas koj qhuab ntuas lawv.  

35 Txawm yog lawv nyob hauv lawv lub tebchaws, thiab koj tau pub koob hmoov ntau rau lawv thiab koj muab lub tebchaws uas dav thiab zoo ua qoob pub rau lawv los, lawv tsis ua koom tu koj thiab lawv tsis tso lawv tej kev limhiam tseg.

36 Saib maj, hnub no peb ua qhev, kuj yog ua qhev rau hauv lub tebchaws uas koj pub rau peb tej poj koob yawm txwv kom lawv thiaj tau noj tej txiv ntoo thiab txhua yam zoo hauv lub tebchaws.

37 Thiab tej qoob loo ntau kawg ntawd kuj poob ua tej vajntxwv tug, yog tej vajntxwv uas koj tsa los kav peb, vim yog tim peb tej kev txhaum. Lawv muaj hwjchim kav peb lub cev thiab peb tej tsiaj txhu raws li lawv lub siab nyiam, peb thiaj li raug txom nyem loj kawg.

​

Cov Pejxeem Cog Lus Tias Yuav Ua Raws Li (יחוח)Yahweh Kevcai

38 Yog tim li no peb thiaj cog lus ruaj khov thiab muab sau cia. Peb cov thawj thiab peb cov Levis thiab peb cov pov thawj ntaus lawv lub cim nias cia.