Qhuas (יחוח)Yahweh Uas Loj Kawg

1 Halleluyah! Cia li qhuas (יחוח)Yahweh lub npe, nej cov uas yog (יחוח)Yahweh cov tub qhe, cia li qhuas nws. 

2 Yog nej cov uas sawv ntsug hauv (יחוח)Yahweh lub tuam tsev, yog cov uas sawv ntsug hauv peb Tus Tswv tej tshav puam tuam tsev.

3 Cia li qhuas (יחוח)Yahweh, vim (יחוח)Yahweh yog tus zoo kawg nkaus.  Cia li hu nkauj qhuas nws lub npe, vim nws yog tus muaj lub siab hlub.

4 (יחוח)Yahweh xaiv Yakhauj cia rau (יחוח)Yahweh, thiab xaiv Ixayees ua nws teej nws tug.

5 Rau qhov kuv paub tias, (יחוח)Yahweh yog tus loj kawg, thiab paub tias, peb Tus Tswv loj dua tej timtswv huvsi.

6 (יחוח)Yahweh xav ua abtsi, nws kuj ua yam ntawd, tsis hais saum ntuj thiab hauv ntiajteb thiab hauv hiavtxwv thiab hauv nruab tiv txwv.

7 (יחוח)Yahweh yog tus uas ua rau tej huab sawv tim qab ntuj kawg tuaj thiab ua muaj xob laim rau thaum nag los, thiab coj cua tawm hauv nws lub txhab cua los.

8 (יחוח)Yahweh yog tus uas tua Iziv cov tub hlob, tsis hais tibneeg thiab tsiaj txhu.

9 Iziv es, hauv nej, (יחוח)Yahweh tau ua tej txujci loj thiab txujci tseem ceeb los tawm tsam Falaus thiab nws cov tub teg tub taws sawvdaws.

10 Nws ntaus yeej ntau haiv neeg, thiab tua tau tej vajntxwv uas muaj hwjchim heev.

11 Yog cov Amaulais tus vajntxwv Xihoos, thiab Npasas tus vajntxwv Aus, thiab cov Khana‑as tej vajntxwv huvsi.

12 Thiab pub lawv tebchaws ua qub txeeg qub teg, yog pub ua qub txeeg qub teg rau nws haiv neeg Ixayees.

13 Au (יחוח)Yahweh, koj lub npe nyob mus ib txhis.  Au (יחוח)Yahweh, koj lub npe uas nto moo lug, yuav nyob rau txhua tiam tibneeg.

14 Rau qhov (יחוח)Yahweh yuav tsa nws haiv neeg txojcai, thiab yuav hlub nws cov tub qhe.

15 Ib tsoom tebchaws tej dab mlom yog nyiaj thiab kub uas tibneeg txhais tes ua.

16 Tej dab mlom ntawd muaj qhov ncauj los hais tsis tau lus, muaj qhov muag los tsis pom kev.

17 Muaj qhov ntsej los tsis hnov lus, thiab twb tsis muaj pa hauv lub qhov ncauj.

18 Cov uas ua tej dab mlom ntawd, kuj zoo ib yam nkaus li tej dab mlom ntawd, cov uas vam khom tej dab mlom ntawd, kuj zoo ib yam nkaus.

19 Ib tsoom Ixayees es, nej cia li qhuas (יחוח)Yahweh, Aloos caj ces es, nej cia li qhuas (יחוח)Yahweh.

20 Levis caj ces es, nej cia li qhuas (יחוח)Yahweh, nej cov uas hwm thiab paub ntshai (יחוח)Yahweh, cia li qhuas (יחוח)Yahweh.

21 Cia li qhuas (יחוח)Yahweh hauv Xi‑oo, tus uas nyob hauv Yeluxalees. Halleluyah! Cia li qhuas (יחוח)Yahweh.