(יחוח)Yahweh Paub Txhua Yam

Sau rau tus thawj coj hu nkauj. Yog txoj nkauj uas Daviv sau.

​

1 Au (יחוח)Yahweh, koj twb tshuaj saib kuv, thiab paub kuv zoo.

2 Thaum kuv zaum thiab sawv ntsug, los koj kuj paub.  Txawm yog koj nyob deb los koj yeej paub tej uas kuv xav.

3 Koj saib ntsoov thaum kuv taug kev thiab thaum kuv so, koj yeej paub kuv txhua txojkev huvsi.

4 Au (יחוח)Yahweh, ua ntej uas kuv tus nplaig tsis tau hais, koj twb paub tag huvsi lawm.

5 Koj thaiv tom kuv hauv ntej thiab tom kuv qub qab, thiab muab koj txhais tes roos kuv.

6 Tej tswv yim zoo li no kuv paub tsis txog kiag li, nyob siab kawg kuv ncav tsis txog.

7 Kuv yuav khiav nkaum koj tus Ntsuj Plig rau qhov twg? Kuv yuav khiav rau qhovtwg thiaj dhau koj lub xub ntiag?

8 Yog kuv nce mus rau saum ntuj, koj kuj nyob qhov ntawd, yog kuv mus pw rau hauv tub tuag teb, koj kuj nyob qhov ntawd.

9 Txawm yog kuv muaj tis ya yam li tus duab kaj ntug thiab mus nyob tim ntug hiavtxwv uas deb kawg nkaus.

10 Los qhov chaw ntawd, koj txhais tes tseem coj kuv, thiab koj txhais tes xis tseem tuav rawv kuv cia.

11 Yog kuv hais tias, qhov tsaus ntuj twb yuav kov yeej kuv tiag, thiab qhov kaj uas nyob ib ncig kuv yuav ntxeev ua hmo ntuj.

12 Txawm yog qhov tsaus ntuj los yeej khiav nkaum tsis tau ntawm koj, hmo ntuj kuj ci ib yam li nruab hnub, qhov tsaus kuj zoo ib yam li qhov kaj rau koj.  

13 Rau qhov koj tsim txhua yam hauv kuv lub nrog cev, thiab koj muab kuv txuas rau hauv kuv niam lub plab.

14 Kuv thov qhuas koj, vim koj tsim kuv tsim nyog kawg thiab zoo kawg nkaus. Koj tes haujlwm mas zoo kawg. Kuv tus ntsuj plig paub txog qhov no zoo heev.

15 Kuv lub cev tsis tau muab zais ntawm koj kiag li, thaum kuv raug tsim nyob hauv qhov zais nkoos, thiab muab kuv tej pob txha sib txuas ua ke hauv lub ntiajteb qhov uas tob heev.

16 Koj lub qhov muag pom kuv rau thaum tsis tau xeeb rau hauv nruab thiab.

Txhua hnub uas teem cia rau kuv kuj sau cia rau hauv koj phau ntawv, ua ntej uas tsis tau muaj txhua hnub ntawd los.

17 Au (יחוח)Yahweh, tej uas koj xav cia tsim txiaj kawg nkaus rau kuv, muab sau zog ua ke kuj ntau kawg li lauj!

18 Yog kuv yuav suav, mas muaj ntau dua tej xuab zeb. Thaum kuv tsim dheev los, kuv tseem nrog nraim koj.

19 Au (יחוח)Yahweh, kuv xav kom koj tua cov tibneeg limhiam tseg, thiab xav kom cov tibneeg noj nyoos ncaim ntawm kuv mus.

20 Yog cov uas npaj ua phem hais tawm tsam koj, yog cov uas tsab ua loj tawm tsam koj es yuav ua phem.  

21 Au (יחוח)Yahweh, kuv tsis ntxub cov uas ntxub koj lov? Kuv tsis dhuav cov uas sawv tawm tsam koj lov?

22 Kuv ntxub lawv heev kawg nkaus, thiab suav tias, lawv yog kuv cov yeeb ncuab.

23 Au (יחוח)Yahweh, thov koj tshuaj saib kuv thiab paub kuv lub siab. Thov sim kuv thiab paub tej uas kuv xav.  

24 Thiab saib muaj yam kev phem twg nyob hauv kuv los tsis muaj, thiab coj kuv taug txojkev uas nyob mus ib txhis.