Thov (יחוח)Yahweh Pab Tiv Thaiv

Sau rau tus thawj coj hu nkauj. Yog Daviv txoj nkauj.

​

1 Au (יחוח)Yahweh, thov cawm kuv dim ntawm cov tibneeg ua phem, thov tiv thaiv kuv ntawm cov tibneeg ua nruj ua tsiv.

2 Yog cov uas xav tswvyim hauv lub siab ua phem, thiab pheej tshum kom muaj kev ua rog.  

3 Lawv ua lawv tus nplaig ntse ib yam li nplaig nab, thiab lawv daim tawv ncauj muaj taug ib yam li taug nab raj kub sai.  

4 Au (יחוח)Yahweh, thov tsom kwm kuv kom dim ntawm cov tibneeg limhiam txhais tes, thov tiv thaiv kuv ntawm cov tibneeg ua nruj ua tsiv uas ntaus tswvyim chua kuv kotaw.

5 Cov tibneeg khav theeb caws yej caws ntxiab tos kuv, thiab cuab tsig cuab hlua rau kuv. Kuv txojkev mas lawv cuab hmab cuab hlua tos.

6 Kuv hais rau (יחוח)Yahweh tias, koj yog kuv Tus Tswv.  Au (יחוח)Yahweh, thov koj tig ntsej mloog kuv lub suab taij thov koj.

7 Au (יחוח)Yahweh uas yog kuv Tus Tswv, yog tus uas muaj zog cawm kuv dim, koj roos kuv lub taubhau thaum uas ntaus rog.

8 Au (יחוח)Yahweh, thov tsis txhob kheev cov tibneeg limhiam ua tau raws li lawv lub siab xav, tsis txhob kheev lawv tej tswvyim phem tiav.

9 Cov uas nyob vij ib ncig kuv, tsa lawv lub taubhau siab.  Thov cia lawv raug tej lus phem uas lawv daim tawv ncauj hais.

10 Thov kom cov ncaig taws uas kub heev poob raug lawv, thov cia lawv raug pov rau hauv hluavtaws thiab poob rau hauv qhov ntuj tsis txhob kheev lawv tawm los li.

11 Thov tsis txhob cia cov uas iab liam luag nyob ruaj hauv lub tebchaws, thov cia txojkev phem raws caum tau tej tibneeg ua nruj ua tsiv.

12 Kuv paub tias, (יחוח)Yahweh tuav cov tibneeg txom nyem nyuaj siab txojcai, thiab tu plaub ncaj, pab cov pluag.

13 Yeej muaj tseeb, cov tibneeg ncaj ncees, yuav ua tsaug koj lub npe, cov tibneeg siab ncaj, yuav tau nyob ntawm koj xubntiag.