Thov (יחוח)Yahweh Tiv Thaiv Kev Phem

Daviv txoj nkauj.

​

1 Au (יחוח)Yahweh, kuv hu taij thov koj, thov tuaj pab kuv sai sai.  Thov koj tig ntsej mloog kuv lub suab rau thaum uas kuv thov hu koj.

2 Thov cia kuv tej lus thov, zoo yam nkaus li cov tshuaj tsw qab rau ntawm koj lub xubntiag, thiab qhov uas kuv tsa tes thov, zoo yam nkaus li tej uas muab xyeem thaum yuav tsaus ntuj.

3 Au (יחוח)Yahweh, thov koj tswj kuv lub qhov ncauj, thiab tswj kuv ob daim di ncauj.  

4 Thov tsis txhob cia kuv lub siab qaug mus rau txojkev phem twg li, tsis txhob cia kuv nrog cov tibneeg limhiam ua ib nqag xav ua kev phem kev qias, tsis txhob cia kuv nrog lawv noj nqaij noj hno.

5 Thov cia tus ncaj ncees ntaus thiab ntuas

kuv, vim yog nws hlub.  Tsis txhob cia cov tibneeg limhiam tej roj pleev kuv lub taubhau, vim yog kuv pheej thov (יחוח)Yahweh tawm tsam lawv tej kev phem.

6 Thaum cov tibneeg uas txiav txim raug muab pov rau hauv qab tsuas, mas ib tsoom tibneeg yuav paub tias, kuv tej lus muaj tseeb.  

7 Lub pob zeb tawg ri sua saum npoo av li cas, lawv tej pob txha yuav ri sua tom tej toj ntxas li ntawd.

8 Au (יחוח)Yahweh, kuv Tus Tswv, kuv lub qhov muag saib ntsoov koj, kuv cawm siav rau hauv koj, koj tsis txhob cia kuv txojsia tu.

9 Thov koj pab kom kuv tsis txhob mag rooj nta uas luag cuab kuv, thiab tsis txhob mag rooj ntxiab uas tej tibneeg phem cuab kuv.

10 Thov cia cov tibneeg limhiam mag lawv rooj hlua huvsi, es cia kuv dim.