Vajntxwv Nco (יחוח)Yahweh Tshav Ntuj

Daviv sau.

​

1 Cia li qhuas (יחוח)Yahweh uas yog txhib zeb uas tiv thaiv kuv, yog tus uas muab kuv txhais tes xyaum ua rog, thiab muab kuv ntiv tes xyaum sib ntaus sib tua.

2 Nws yog txojkev hlub uas ruaj khov thiab yog kuv lub chaw nraim cev uas khov kho, nws yog kuv lub chaw uas ruaj khov, yog tus uas tso kuv dim, nws yog daim hlau uas tiv thaiv kuv, yog tus uas kuv nraim cev rau hauv.  Nws muab ib tsoom tibneeg txo rau kuv tswjhwm.

3 Au (יחוח)Yahweh, tibneeg yog abtsi es koj yuav mob siab lawv? Tibneeg tej tub ki yog abtsi es koj yuav nco txog lawv?

4 Tibneeg tsuas zoo li ib pas cua xwb, thiab nws lub sijhawm tsuas zoo li tus duab ntxoov ntxoo uas hla dhau plaws mus.

5 Au (יחוח)Yahweh, thov koj qhib kiag koj lub rooj ntug thiab nqis los, thov koj kov tej toj roob hauv pes ua kom tawm pa ncho lug.

6 Thov tso xob laim los ua kom cov yeeb ncuab tawg ri sua mus, thov koj tua rab xub ua rau lawv tawg khiav tag.

7 Thov koj cev tes saum ntuj tuaj, thov cawm kuv thiab npo kuv dim hauv cov dej tob tob, thiab dim hauv lwm haiv neeg txhais tes.

8 Lawv lub qhov ncauj txawj dag, lawv tsa txhais tes xis twv los kuj yog dag.

9 Au (יחוח)Yahweh, kuv yuav hu txoj nkauj tshiab qhuas koj, kuv yuav ntaus lub nkauj nog ncas kaum txoj xov qhuas koj.

10 Koj yog tus uas pab tej vajntxwv kov yeej, thiab yog tus uas cawm koj tus tub qhe Daviv dim.

11 Thov koj cawm kuv dim thiab tso kuv dim hauv lwm haiv neeg txhais tes. Lawv lub qhov ncauj txawj dag, lawv tsa txhais tes xis twv los kuj yog dag.

12 Thaum peb cov tub tseem hluas, thov kom lawv zoo li tsob ntoo uas twb loj txaus lawm, thiab thov kom peb cov ntxhais zoo yam nkaus li tus ncej ntawm kaum tsev uas txaug ua vajntxwv lub tsev.

13 Thov kom peb tej txhab puv thiab muaj txhua yam qoob nyob hauv.  Thov kom peb tej yaj muaj menyuam qas txhiab qas vam tus rau hauv peb tej tshav zaub.

14 Thov kom peb tej tsiaj txhu muaj zes ntau, thov kom tsis txhob muaj leejtwg txeem mus rau hauv thiab tsis muaj leejtwg tawm khiav mus, thiab thov kom tsis txhob muaj suab quaj lwj siab hauv peb tej kev.

15 Haiv neeg uas tau koob hmoov li no, yuav tau nyob kaj siab lug, haiv neeg uas lawv Tus Tswv yog (יחוח)Yahweh, yuav tau nyob kaj siab lug.