Qhuas (יחוח)Yahweh

Txoj nkauj qhuas (יחוח)Yahweh. Daviv sau

​

1 Kuv yuav qhuas ntxhias koj uas yog kuv Tus Tswv thiab kuv tus vajntxwv, thiab qhuas koj lub npe mus ib txhis tsis kawg.

2 Kuv yuav niaj hnub qhuas koj, thiab qhuas koj lub npe mus ib txhis tsis kawg.

3 (יחוח)Yahweh loj kawg nkaus, tsim nyog qhuas nws heev kawg. Qhov uas nws loj ntawd mas paub tsis tag.

4 Ib tiam yuav qhuas koj tes haujlwm rau ib tiam mloog, thiab yuav qhia koj tej haujlwm uas muaj hwjchim.

5 Lawv yuav hais txog koj lub hwjchim ci ntsa iab thiab koj lub meej mom, thiab kuv yuav tshawb nrhiav koj tej haujlwm tseem ceeb.

6 Tibneeg yuav qhia txog koj tej haujlwm txaus ntshai lub hwjchim, thiab kuv yuav qhia txog qhov uas koj loj kawg.

7 Lawv yuav qhia txog koj txojkev zoo nplua mias lub koob meej, lawv yuav hu nkauj txog koj txojkev ncaj ncees.

8 (יחוח)Yahweh muaj lub siab zam txim thiab siab hlub loj kawg nkaus, nws tsis chim sai thiab muaj txojkev hlub ruaj khov nplua mias.

9 (יחוח)Yahweh ua zoo rau txhua tus, nws tab ncuab txhua yam uas nws tsim.

10 Au (יחוח)Yahweh, txhua yam uas koj tsim los yuav ua koj tsaug, thiab koj cov tibneeg dawb huv sawvdaws yuav qhuas koj.

11 Lawv yuav hais txog koj lub meej mom uas koj ua vajntxwv kav, thiab qhia txog koj lub hwjchim.

12 Kom tibneeg tej tub thiaj paub txog koj tej haujlwm uas muaj hwjchim thiab koj lub meej mom uas ua vajntxwv kav.

13 Koj lub tebchaws nyob mus ib txhis tsis kawg, koj ua vajntxwv kav mus txhua tiam tibneeg. (יחוח)Yahweh ua ncaj raws li txhua lo lus uas nws twb hais tseg lawm, thiab hlub txhua yam uas nws ua huvsi.  

14 (יחוח)Yahweh hwj txhua tus uas yuav ntog, thiab tsa txhua tus uas poob nthab sawv.

15 Txhua tus lub qhov muag saib ntsoov koj, thiab koj pub zaub mov rau lawv raws sijhawm.

16 Koj cev tes, koj pub rau txhua yam uas ciaj sia tau noj npaum li uas lawv xav noj.  

17 (יחוח)Yahweh ua ncaj ua ncees rau hauv txhua txojkev, thiab hlub txhua yam uas nws ua huvsi.

18 (יחוח)Yahweh nyob ze txhua tus uas thov hu nws, yog txhua tus uas muaj siab thov tiag.

19 Nws pub rau txhua tus uas hwm thiab paub ntshai nws raws li lawv lub siab xav, thiab nws mloog lawv lub suab quaj thov thiab cawm lawv dim.

20 (יחוח)Yahweh tsom kwm txhua tus uas hlub nws, tiamsis nws yuav ua kom cov uas limhiam sawvdaws puam tsuaj.

21Kuv lub qhov ncauj yuav qhuas (יחוח)Yahweh, cia txhua yam uas ciaj sia qhuas nws lub npe uas dawb huv mus ib txhis tsis kawg.