Yahnah Khiav Nkaum (יחוח)Yahweh

1 (יחוח)Yahweh  hais lus tuaj rau Yahnah uas yog Amithais tus tub hais tias, 2 cia li sawv tsees mus rau lub nroog loj Ninaves, thiab qw tawm tsam lub nroog ntawd, vim lawv tej kev ua limhiam tuaj txog kuv lawm.

3 Tiamsis Yahnah sawv tsees khiav ntawm (יחוח)Yahweh  lub xubntiag mus rau lub moos Thasis. Nws mus rau nram lub moos Yaupas mas ntsib ib lub nkoj txwg tabtom yuav mus rau lub moos Thasis. Nws thiaj them nqe nkoj thiab nce rau hauv lub nkoj nrog lawv mus rau lub moos Thasis kom dhau (יחוח)Yahweh  lub xubntiag.

4 Mas (יחוח)Yahweh  tso cua nplawm hlob rau hauv hiavtxwv thiaj li muaj cua daj cua dub ntsawj ceev kawg hauv hiavtxwv ua rau lub nkoj yuav tawg.

5 Cov uas tsav nkoj ntshai kawg, nyias taus nyias thov nyias tus dab pab, thiab lawv thau tej nra hauv lub nkoj pov rau hauv hiavtxwv kom lub nkoj thiaj li sib zog. Tiamsis Yahnah twb nkag mus rau hauv lub plawv nkoj pw tsaug zog ceev lawm.

6 Tus Tswv nkoj thiaj los hais rau nws tias, koj tsaug zog ceev ua abtsi li no? Cia li sawv tsees, thov hu koj tus timtswv. Tej zaum tus timtswv ntawd yuav nco txog peb, peb thiaj tsis puam tsuaj.

7 Cov tsav nkoj thiaj sib yaum hais tias, cia li los, cia peb rho ntawv xwv peb thiaj paub tias yog tim leejtwg es tej xwm txheej phem no tshwm los raug peb. Lawv thiaj rho ntawv mas rho tau Yahnah.

8 Lawv hais rau nws tias, koj qhia rau peb saib, yog tim leejtwg es tej xwm txheej phem no thiaj tshwm los raug peb? Koj ua haujlwm abtsi? Koj tuaj qhovtwg tuaj? Koj lub tebchaws hu li cas? Koj yog haiv neeg twg?

9 Mas Yahnah teb lawv tias, kuv yog tibneeg Henplais, kuv hwm thiab paub ntshai Tus Tswv uas yog (יחוח)Yahweh  uas tsim hiavtxwv thiab nruab nqhuab.

10 Mas cov tibneeg ntawd yimhuab ntshai heev, lawv thiaj hais rau nws tias, koj ua abtsi li no? Cov tibneeg ntawd paub tias nws khiav ntawm (יחוח)Yahweh  lub xubntiag tuaj, vim nws twb hais li ntawd rau lawv lawm.

11 Lawv txawm hais rau nws tias, peb yuav ua li cas rau koj kom hiavtxwv thiaj li tus rau peb? Rau qhov dej hiavtxwv yimhuab nphau heev zuj zus tuaj.

12 Nws thiaj hais rau lawv tias, cia li muab kuv pov rau hauv hiavtxwv, mas dej hiavtxwv yuav tus rau nej, rau qhov kuv paub tias qhov uas cua daj cua dub raug nej loj li no yog tim kuv tus kheej.

13 Txawm li ntawd los cov uas tsav nkoj kuj siv zog nquam nkoj xav coj lub nkoj mus txog tim ntug, tiamsis ua tsis tau li, rau qhov dej hiavtxwv yimhuab nphau heev zuj zus tav lawv kev.

14 Lawv thiaj quaj thov (יחוח)Yahweh  tias, Au (יחוח)Yahweh , peb thov koj tsis txhob cia peb raug puam tsuaj vim yog tim tus yawg no txojsia. Thov tsis txhob muab tus uas tsis txhaum cov ntshav rau peb ris. Au (יחוח)Yahweh , koj yeej ua raws li koj pom zoo.

15 Lawv thiaj muab Yahnah pov rau hauv hiavtxwv, mas dej hiavtxwv thiaj li tus tsis nphau lawm.

16 Cov tibneeg ntawd kuj ntshai (יחוח)Yahweh  heev, lawv thiaj tua tsiaj xyeem thiab yeem lus rau (יחוח)Yahweh .

17 (יחוח)Yahweh  npaj ib tug ntses loj heev nqos Yahnah. Yahnah nyob hauv ntses lub plab tau peb hnub peb hmos.