1 Neeg hom haujlwm cia rau hauv nruab siab, tiamsis (יחוח)Yahweh pub lo lus teb rau tus nplaig. 2 Tibneeg kuj pom tias txhua yam uas lawv ua puavleej dawb huv, tiamsis (יחוח)Yahweh tshuaj hauv lub siab. 3 Cia li muab koj tej haujlwm tso rau (יחוח)Yahweh, mas tej uas koj hom tseg cia yuav tiav.

4(יחוח)Yahweh tsim txhua yam nyias muaj nyias hom phiaj, txawm yog cov tibneeg limhiam los nws tsim los rau hnub puam tsuaj. 5 Txhua tus uas khav theeb mas (יחוח)Yahweh ntxub kawg li, cia li paub tseeb tias lawv yeej yuav tsis dim kev teem txim. 6 Vim yus xib rau (יחוח)Yahweh thiab tso siab plhuav, nws thiaj ntxuav yus lub txim pov tseg, thiab vim hwm thiab paub ntshai (יחוח)Yahweh yus thiaj lug dhau kev phem. 7 Thaum tibneeg ua haum (יחוח)Yahweh lub siab, txawm yog lawv tej yeeb ncuab los (יחוח)Yahweh ua kom rov nrog lawv sib raug zoo. 8 Ua ncaj ncees es tau tsawg tsawg kuj zoo dua li ua tsis ncaj es tau nyiaj txiag ntau ntau. 9 Tibneeg lub siab npaj txojkev rau nws taug, tiamsis (יחוח)Yahweh coj nws txhais kotaw. 10(יחוח)Yahweh pub lo lus txiav txim rau vajntxwv lub qhov ncauj, vajntxwv thiaj txiav txim tsis txhaum. 11 Rab teev thiab lub phaj teev uas haum txiaj yog (יחוח)Yahweh li, thiab cov thauj teev huvsi hauv lub hnab kuj yog (יחוח)Yahweh ua.

12 Qhov uas ua phem mas tej vajntxwv ntxub kawg li, rau qhov kev ncaj ncees ua rau lub zwm txwv nyob ruaj khov.

13 Daim tawv ncauj uas hais lus ncaj ua rau vajntxwv zoo siab, thiab nws nyiam tus uas hais lus tseeb. 14 Vajntxwv kev npau taws mas yog tus tub tshaj xo kev ploj tuag, tiamsis tus muaj tswvyim yuav tswj tau. 15 Thaum vajntxwv ntsej muag luag tibneeg ciaj sia, thiab qhov uas vajntxwv txaus siab zoo yam nkaus li tej huab uas tso nag tshiab los. 16 Tau tswvyim kuj zoo heev dua li tau kub, thiab xaiv yuav kev txawj ntse zoo dua li yuav nyiaj. 17 Cov uas ncaj ncees txojkev mas ncaim ntawm txojkev phem, tus uas ceev faj nws txojkev kuj yog tuav tau nws txojsia. 18 Kev khav theeb yuav coj mus raug puam tsuaj, thiab lub siab muab hlob yuav coj mus kom ntog. 19 Tus uas txo hwjchim nrog tej pluag nyob zoo dua li nrog cov tibneeg khav theeb faib tej qhov txhia chaw uas txeeb tau los. 20 Tus uas mloog tej lus qhia yuav vam meej, thiab tus uas tso siab rau (יחוח)Yahweh yuav nyob kaj siab lug.

21 Tus uas lub siab ntse yuav hu tau tias yog tus thoob tsib to nrog, thiab ncauj lus zoo mas rub tau tibneeg lub siab zuj zus. 22 Tswvyim yog lub qhov dej txhawv uas pub txojsia rau tus uas muaj tswvyim, tiamsis txojkev ruam rau txim rau cov tibneeg ruam. 23 Tus uas muaj tswvyim lub siab ua rau nws tej lus txawj ntse, thiab tsav hwjchim rau nws daim tawv ncauj rub tau tibneeg lub siab.

24 Ncauj lus zoo mas zoo yam nkaus li zib ntab, thiab qab zib rau lub siab thiab pub lub cev noj qab nyob zoo.

25 Muaj ib txojkev uas tibneeg pom tias zoo, tiamsis txojkev ntawd qhov kawg yog kev tuag. 26 Qhov uas tus tub zog tshaib nqhis ua rau nws nrhiav haujlwm ua, nws lub qhov ncauj txhib kom nws ua. 27 Tus tibneeg tsis tsim txiaj ntaus tswvyim ua phem, nws tej lus zoo yam nkaus li hluavtaws kub. 28 Tus tibneeg siab nkhaus tshum kom muaj kev sib cav sib ceg, thiab tus lis xaiv ua rau tej phoojywg tawg. 29 Tus tibneeg ua nruj ua tsiv ntxias kwvtij zej zog, thiab coj lawv taug txojkev tsis zoo. 30 Tus uas zij ncaug ntxi muag ntaus tswvyim ntxeev ntxias, tus uas zim hniav zog yeej coj kom ua phem. 31 Taubhau uas dawb hau paug yog lub mom kub uas muaj meej, tus uas coj lub neej ncaj ncees yuav tau lub mom ntawd. 32 Tus uas tsis chim sai zoo dua li tus uas muaj zog heev, thiab tus uas tswj tau nws lub siab zoo dua li tus uas ntaus tau ib lub nroog. 33 Tibneeg rho ntawv saib tom hauv ntej yuav zoo li cas, tiamsis

(יחוח)Yahweh yog tus uas txiav txim siab rau txhua yam.