1 Lo lus teb mos muag pab kom kev npau taws ploj tag, tiamsis lo lus nruj lus tsiv zes kom chim. 2 Tus muaj tswvyim tus nplaig nthuav kev txawj ntse tuaj, tiamsis tus ruam lub qhov ncauj nchuav kev ruam tawm los. 3(יחוח)Yahweh lub qhov muag ntsia ntsoov txhua qhov, thiab zov rawv cov tibneeg phem thiab cov tibneeg zoo. 4 Tus nplaig uas hais lus zoo kuj yog tsob ntoo uas pub txojsia, tiamsis tus nplaig ntxeev ntxias ua rau lub siab lwj tag. 5 Tus uas ruam saib tsis taus leej txiv tej lus qhuab qhia, tiamsis tus uas mloog tej lus qhuab ntuas yog tus paub tab. 6 Tus ncaj ncees lub tsev muaj nyiaj txiag ntau, tiamsis cov tibneeg limhiam tej nyiaj txiag coj kev ceeblaj los.

7 Cov muaj tswvyim daim tawv ncauj nthuav kev txawj ntse, tiamsis cov ruam lub siab tsis ua li ntawd. 8 Tej uas cov tibneeg limhiam muab xyeem mas (יחוח)Yahweh ntxub kawg li, tiamsis nws zoo siab rau cov ncaj ncees tej lus thov.

9 Cov tibneeg limhiam txojkev mas (יחוח)Yahweh ntxub kawg li, tiamsis nws hlub tus uas ua raws li txojkev ncaj ncees.

10 Tus uas tso txojkev zoo tseg yuav raug nplawm qhuab qhia hnyav, tus uas ntxub tej lus qhuab ntuas yuav tuag.

11 Tub tuag teb thiab qhov puam tsuaj, nthuav kiag rau (יחוח)Yahweh pom, yog li no nws yimhuab pom hauv tibneeg lub siab thiab. 12 Tus uas muab hlob tsis nyiam luag qhuab ntuas, nws tsis mus nrhiav tus muaj tswvyim. 13 Lub siab zoo mas ua rau lub ntsej muag luag, tiamsis kev tu siab ua rau tus ntsuj plig yaj tag. 14 Tus uas paub qabhau lub siab nrhiav kev txawj ntse, tiamsis tus ruam lub qhov ncauj noj txojkev ruam. 15 Cov tibneeg uas raug kev txom nyem lub niaj xyoo puavleej phem, tiamsis cov uas lub siab xyiv fab muaj kev pam noj pam haus tsis tu li.

16 Muaj nyiaj txiag tsawg los hwm thiab paub ntshai (יחוח)Yahweh, kuj zoo dua li uas muaj tej niag txhab nyiaj los tseem muaj kev ceeblaj nrog nraim. 17 Noj zaub tsuag nyob sib hlub zoo dua noj nyuj zib nyob sib ntxub.

18 Tus uas lub siab kub tshum kom muaj lus sib cav sib ceg, tiamsis tus uas tsis chim sai tswj tau kev sib cav sib ceg kom tus. 19 Tus tibneeg tub nkeeg txojkev mas muaj pos tuaj puv nkaus, tiamsis tus ncaj ncees txojkev yog txoj niag kev tiaj. 20 Tus tub uas muaj tswvyim ua rau leej txiv zoo siab, tiamsis tus uas ruam saib tsis taus leej niam. 21 Txojkev ruam ua rau tus uas tsis thoob tsib zoo siab xyiv fab, tiamsis tus uas paub qabhau kuj taug txojkev ncaj. 22 Yog tsis muaj chaw sablaj haujlwm yuav plam, tiamsis yog muaj ntau leej taw qhia mas haujlwm tiav. 23 Yog teb tau raug mas ua rau yus zoo siab, thiab ib lo lus uas hais raug qhov cheem tsum mas zoo tshaj plaws li. 24 Tus muaj tswvyim txojkev coj nce mus txog txojsia, lawv thiaj tsis poob rau hauv tub tuag teb. 25(יחוח)Yahweh rhuav tshem tus tibneeg khav theeb lub tsev, tiamsis nws tsom kwm tus poj ntsuam li ciam teb. 26 Tej uas cov tibneeg limhiam xav mas (יחוח)Yahweh ntxub kawg li, tiamsis cov tibneeg dawb huv tej lus txaus nws lub siab. 27 Tus uas nrhiav nyiaj txiag ntawm tej kev tsis ncaj kuj ua rau nws tsev neeg raug kev ceeblaj, tiamsis tus uas ntxub tej nyiaj xiab yuav tau txojsia.

28 Tus ncaj ncees lub siab xav saib yuav teb li cas, tiamsis tus tibneeg limhiam lub qhov ncauj nchuav nthwv kev phem tawm los.

29(יחוח)Yahweh nyob deb ntawm cov tibneeg limhiam, tiamsis nws hnov cov ncaj ncees tej lus thov. 30 Ntsej muag luag ntxhi ua rau yus zoo siab, tej xov zoo ua rau tej txha sib qas las. 31 Tus uas lub qhov ntsej mloog tej lus qhuab qhia zoo yuav nrog nraim cov uas muaj tswvyim nyob ua ke. 32 Tus uas tsis quav ntsej tej lus qhuab qhia kuj yog nws rov saib tsis taus nws, tiamsis tus uas mloog tej lus qhuab ntuas kuj tau kev txawj ntse. 33 Qhov uas hwm thiab paub ntshai ((יחוח)Yahweh yog qhov kawm paub tswvyim, xub txo hwjchim mam li tau koob meej.