1 Tswvyim ua nws lub tsev, tiamsis txojkev ruam txhais tes muab nws lub tsev rhuav pov tseg. 2 Tus uas taug txojkev ncaj hwm thiab paub ntshai (יחוח)Yahweh, tiamsis tus uas taug txojkev nkhaus yog saib tsis taus (יחוח)Yahweh. 3 Hauv tibneeg ruam lub qhov ncauj muaj rab nplawm rau nws lub nrob qaum, tus tibneeg ntse daim tawv ncauj yuav tiv thaiv tau nws. 4 Qhovtwg tsis muaj txiv nyuj, qhov ntawd tsis muaj qoob, tiamsis tej qoob loo ntau tau ntawm nyuj lub zog.

5 Tus timkhawv ncaj tsis hais dag, tiamsis tus timkhawv cuav ua pa puavleej yog dag. 6 Tus uas muab hlob yeej nrhiav tsis tau tswvyim li, tiamsis tus uas nkag siab mas yoojyim kawm tau kev txawj ntse. 7 Cia li khiav ntawm tus tibneeg ruam lub xubntiag mus vim tias koj yuav tsis tau tej lus txawj ntse qhov ntawd.

8 Tus paub tab lub tswvyim qhia nws paub ua neej, tiamsis tus tibneeg ruam txojkev ruam dag ntxias nws.

9 Tibneeg ruam luag qhov uas ua kevcai xyeem daws txim, tiamsis (יחוח)Yahweh txaus siab rau cov uas ncaj ncees.

10 Nyias lub siab paub nyias txojkev lwj siab, thiab tsis muaj lwm tus los nrog nws zoo siab. 11 Tus tibneeg limhiam lub tsev yuav raug puam tsuaj, tiamsis tus uas ncaj ncees lub tsev ntaub yuav vam meej. 12 Muaj ib txojkev uas tibneeg pom tias zoo, tiamsis txojkev ntawd qhov kawg yog kev tuag. 13 Lub ntsej muag luag los lub siab tseem txhawj quaj, qhov uas siab xyiv fab, thaum kawg yog kev quaj ntsuag. 14 Tus tibneeg siab nkhaus yuav tau saws tej uas nws ua phem puv npo, tibneeg zoo yuav tau saws tej uas nws ua zoo. 15 Tus tibneeg tsis thoob tsib ntseeg txhua yam, tiamsis tus uas paub qabhau ua tib zoo saib nws taug txojkev twg. 16 Tus uas muaj tswvyim ceev faj thiab tig hlo ntawm txojkev phem, tiamsis tus tibneeg ruam tsis txawj tswj, nws lam tau lam ua.

17 Tus tibneeg npau ceev mas ua tej uas ruam kawg li, tiamsis tus uas ntse ua siab ntev.

18 Cov uas tsis thoob tsib tau txojkev ruam, cov uas paub qabhau tau txojkev txawj ntse ua lub mom kub. 19 Cov tibneeg phem pe cov tibneeg zoo, cov tibneeg limhiam pe ntawm cov uas ncaj ncees lub qhov rooj.

20 Tus tibneeg pluag mas kwvtij zej zog los kuj ntxub, tiamsis tus nplua nuj muaj phoojywg coob heev. 21 Tus uas saib tsis taus kwvtij zej zog kuj muaj txim, tiamsis tus uas hlub cov pluag kuj tau hmoov zoo. 22 Cov uas ntaus tswvyim phem tsis txhaum lov? Cov uas ntaus tswvyim zoo kuj tau qhov zoo thiab luag tso siab rau lawv. 23 Muaj tshaj thawj rau txhua yam haujlwm uas ua, tiamsis lub ncauj hais do xwb ua rau pluag. 24 Tej nyiaj txiag yog cov uas txawj ntse lub mom kub, tiamsis txojkev ruam yog cov uas ruam txoj saw ntawm caj dab.

25 Tus timkhawv uas ncaj pab cawm txojsia, tiamsis tus hais tsis ncaj yog ntxias luag nce nthab. 26 Qhov uas hwm thiab paub ntshai (יחוח)Yahweh ua rau yus nyob tso siab plhuav, yus cov menyuam kuj tau lub chaw mus cawm siav.

27 Qhov uas hwm thiab paub ntshai (יחוח)Yahweh yog lub qhov dej txhawv uas pub txojsia, kom thiaj lug dhau txojkev tuag lub voj hlua. 28 Tej pejxeem coob coob yog vajntxwv li meej mom, yog tsis muaj pejxeem vajntxwv kuj puam tsuaj tag. 29 Tus uas tsis chim sai kuj yog tus thoob tsib to nrog, tiamsis tus uas npau taws sai kuj yog txhawb txojkev ruam. 30 Lub siab uas nyob tus kuj yog pub txojsia rau lub cev, tiamsis lub siab uas kub ntxhov hnyo ua rau pob txha po.

31 Tus uas quab yuam tus pluag kuj saib tsis taus (יחוח)Yahweh uas yog tus tsim, tiamsis tus uas hlub cov uas txom nyem kuj ua rau (יחוח)Yahweh tau koob meej. 32 Tus tibneeg limhiam ntog vim tej kev phem uas nws ua, tiamsis tus ncaj ncees kuj tau lub chaw cawm siav vim nws ua ncaj. 33 Tswvyim nyob hauv tus uas thoob tsib to nrog lub siab, tiamsis tibneeg ruam lub siab tsis pom tswvyim kiag li. 34 Kev ncaj ncees txhawb nqa lub tebchaws, tiamsis kev txhaum ua rau lub tebchaws poob ntsej muag. 35 Cov tub qhe uas ua haujlwm ntse ntswb ntsuav ua rau vajntxwv txaus siab, tiamsis vajntxwv npau taws rau tus uas ua tej kev txaj muag.