1 Tus tub uas ntse mloog nws leej txiv tej lus qhia, tiamsis tus uas thuam luag tsis mloog tej lus qhuab ntuas.

2 Tus tibneeg zoo tau noj tej uas nws lub qhov ncauj hais zoo, tiamsis tus tibneeg ntxeev ntxias ntshaw ua limhiam ntais ntuj.

3 Tus uas tswj tau nws lub qhov ncauj tuav tau nws txojsia, tiamsis tus uas qheb daim tawv ncauj rua tsuas kuj raug kev puam tsuaj.

4 Tus tub nkeeg tus ntsuj plig nqhis nqhis los kuj tsis tau abtsi li, tiamsis tus nquag tus ntsuj plig puv ntoob. 5 Tus ncaj ncees ntxub kev dag, tiamsis tus tibneeg limhiam ua tej uas txaj muag thiab poob koob meej. 6 Txojkev ncaj ncees tsom kwm tus uas ua ncaj, tiamsis lub txim ua rau tibneeg limhiam puam tsuaj.

7 Ib txhia ua txuj nplua nuj tiamsis tsis muaj abtsi li, ib txhia ua txuj pluag tiamsis muaj nyiaj txiag ntau kawg li.

8 Nqe txhiv tibneeg txojsia yog tej nyiaj txiag uas nws muaj, tiamsis tsis muaj leejtwg hem tus tibneeg pluag. 9 Tus uas ncaj ncees lub teeb ci zoo siab xyiv fab, tiamsis tus tibneeg limhiam lub teeb yuav raug muab tua. 10 Qhov uas muab hlob tsuas yog ua kom muaj kev sib cav sib ceg xwb, tiamsis tswvyim nrog cov uas mloog tej lus taw qhia. 11 Tej nyiaj txiag uas ua ib pas xwb twb tau, los yuav nqeg zuj zus tag, tiamsis tus uas mav khwv tau yuav tsav kom tau ntau. 12 Qhov uas tsis tau raws li lub siab vam kuj mob siab, tiamsis qhov uas tau raws li lub siab xav kuj yog tsob ntoo uas pub txojsia.

13 Tus uas saib tsis taus tej lus qhuab qhia nws coj kev puam tsuaj los rau nws, tiamsis tus uas hwm tej kevcai yuav tau yeeb koob. 14 Tej lus uas cov tibneeg txawj ntse qhia yog lub qhov dej txhawv uas pub txojsia, kom thiaj lug dhau txojkev tuag lub voj hlua. 15 Tus uas tab fab zoo mas luag hwm, tiamsis tus tibneeg tsis ncaj txojkev ua rau nws puam tsuaj. 16 Tus tibneeg uas paub qabhau nws ua txhua yam raws li kev txawj ntse, tiamsis tus tibneeg ruam tsuas qhia nws txojkev ruam xwb. 17 Tus tub tshaj xo uas tsis ncaj ua rau tibneeg poob rau hauv kev kub ntxhov, tiamsis tus tub tshaj xo uas ncaj coj tshuaj tuaj kho. 18 Kev pluag kev txaj muag los raug tus uas tsis quav ntsej tej lus qhuab qhia, tiamsis tus uas mloog tej lus qhuab ntuas tau koob meej. 19 Yog tau raws li uas yus ntshaw mas qab zib kawg rau yus tus ntsuj plig, tiamsis tus tibneeg ruam ntxub qhov uas tso kev phem tseg kawg li. 20 Tus uas nrog nraim tus txawj ntse nws kuj yuav txawj ntse, tiamsis tus uas nrog cov tibneeg ruam ua phoojywg yuav raug kev liamsim. 21 Lub khuab phem raws cuag cov muaj txim, tiamsis kev vam meej poob rau cov ncaj ncees. 22 Tus tibneeg zoo tseg qub txeeg qub teg rau nws tub ki xeeb ntxwv, tiamsis tus tibneeg muaj txim tej nyiaj txiag yuav khaws tseg cia rau tus ncaj ncees.

23 Tus tibneeg pluag tej teb uas muab tso tseg tseem yuav tau qoob loo ntau, tiamsis qhov uas tu plaub tsis ncaj yuav muab txeeb kiag mus. 24 Tus uas tsis siv rab nplawm kuj yog ntxub nws tus tub, tus uas hlub nws tus tub yeej yuav ua tib zoo nplawm qhuab qhia.

25 Tus uas ncaj ncees yuav noj txaus siab txaus ntsws, tiamsis tibneeg limhiam lub plab tshaib tshaib.