1 Tus uas nyiam tej lus qhuab qhia kuj yog nyiam kev txawj ntse, tus uas ntxub tej lus qhuab ntuas yog tus ruam. (יחוח)Yahweh txaus siab rau tus tibneeg zoo, tiamsis tus uas ntaus tswvyim phem mas (יחוח)Yahweh yuav rau txim.

3 Txojkev lim hiam ua tsis tau rau tibneeg nyob ruaj nreeg, tiamsis cov uas ncaj ncees yuav cog cag tob dob tsis tau li.

4 Pojniam zoo mas yog tus txiv lub mom kub, tiamsis tus pojniam rhuav plhu zoo yam li tus kab mob uas ua rau nws txiv tej pob txha lwj. 5 Tus tibneeg ncaj ncees tej kev xav kuj ncaj, tiamsis tus tibneeg limhiam tej lus taw qhia yog lus ntxeev ntxias. 6 Tus tibneeg limhiam tej lus nyas nrhw ua kom los ntshav, tiamsis tus uas ncaj ncees lub qhov ncauj pab tibneeg dim. 7 Tus tibneeg limhiam raug rhuav tshem ploj tag lawm, tiamsis tus tibneeg ncaj ncees lub tsev yuav nyob ruaj.

8 Tibneeg yuav raug luag qhuas npaum li uas nws muaj tab fab, tiamsis tus tibneeg siab nkhaus yuav raug luag saib tsis taus. 9 Tus uas luag saib tsis taus los tseem muaj tub qhe, kuj zoo dua tus uas tsab ua loj tiamsis tsis muaj noj.

10 Tus tibneeg ncaj ncees yeej hlub nws cov tsiaj txhu, tiamsis tus tibneeg limhiam kev khuvleej yog ua nyaum heev.

11 Tus tibneeg uas laij teb yuav muaj mov noj ntau, tiamsis tus uas ua tej haujlwm tsis muaj qabhau yeej yog tsis thoob tsib.

12 Tus tibneeg limhiam ntshaw tej uas ua phem es tau los, tiamsis tus tibneeg ncaj ncees yuav cog cag ruaj khov.

13 Tus tibneeg phem rov mag tej lus txhaum uas nws daim tawv ncauj hais, tiamsis tus tibneeg ncaj ncees khiav dim tej kev ceeblaj.

14 Tej lus uas yus hais ua rau yus tau tej yam zoo tsau npo, thiab tej haujlwm uas yus txhais tes ua rov los pauj rau yus.

15 Tus tibneeg ruam pom tias nws txojkev raug cai lawm, tiamsis tus uas txawj ntse mloog tej lus taw qhia.

16 Yuav paub tus tibneeg ruam kev chim siab tamsid, tiamsis tus tibneeg ntse mas tsis quav ntsej qhov uas luag saib tsis taus nws.

17 Tus uas hais tseeb nws ua timkhawv ncaj, tiamsis tus cuav timkhawv mas hais lus dag ntxias.

18 Tus tibneeg ncauj sai tej lus mas zoo yam nkaus li rab ntaj chob, tiamsis tus tibneeg ntse tus nplaig yog tshuaj kho zoo. 19 Daim tawv ncauj uas hais tseeb yuav nyob ib txhis, tus nplaig txawj dag nyob ib ntsais muag xwb.

20 Txojkev dag ntxias nyob hauv cov tibneeg uas ntaus tswvyim ua phem lub siab, tiamsis cov uas npaj kom sawvdaws nyob sib haum tau siab xyiv fab.

21 Tsis muaj vij sub vij sw abtsi poob rau saum cov tibneeg ncaj ncees, tiamsis cov tibneeg limhiam tsuas saws tej kev ceeblaj pov khawv nkaus xwb.

22(יחוח)Yahweh ntxub daim tawv ncauj txawj dag kawg li, tiamsis cov uas xyaum ua ncaj ua rau nws zoo siab.

23 Tus uas paub tab yeej muab nws kev txawj ntse npog cia, tiamsis tus uas ruam tshaj tawm nws txojkev ruam.

24 Txhais tes nquag yuav tau kav, tiamsis tus tub nkeeg yuav raug muab quab yuam ua haujlwm. 25 Kev ntxhov siab ua rau tibneeg poob siab, tiamsis lo lus zoo ua rau nws xyiv fab.

26 Tus tibneeg ncaj ncees tig ntawm txojkev phem, tiamsis cov tibneeg limhiam txojkev coj lawv mus yuam kev.

27 Tus tub nkeeg yuav cev tes muab tsis tau los noj, tiamsis tus tibneeg nquag yuav tau tej nyiaj txiag uas muaj nqes.

28 Txojkev ncaj ncees yog txojkev tau txojsia, tiamsis txojkev txhaum coj mus txog qhov tuag.