1 Rab teev uas ntxo luag, (יחוח)Yahweh ntxub kawg li, tiamsis lub thauj teev uas haum ua rau nws zoo siab. 2 Thaum khav theeb lawm yuav raug poob ntsej muag, tiamsis tswvyim yuav nrog nraim tus uas tsis muab hlob. 3 Tus uas ncaj ncees txojkev ua ncaj yuav coj nws lub hauv ntej, tiamsis tus tibneeg ntxeev ntxias txojkev nkhib nkhaus yuav rov ua rau nws puam tsuaj. 4 Tej nyiaj txiag tsis muaj qabhau rau hnub uas (יחוח)Yahweh npau taws, tiamsis txojkev ncaj ncees cawm kom dim kev tuag. 5 Tus uas tsis muaj chaw thuam, nws txojkev ncaj ncees yuav coj nws kev ncaj nraim, tiamsis tus tibneeg limhiam yuav ntog vau hlo rau hauv nws txojkev ua limhiam. 6 Tus ncaj ncees txojkev ua ncaj yuav pab nws dim, tiamsis tus tibneeg ntxeev ntxias txojkev ntshaw yuav rov ntes tau nws. 7 Thaum tus tibneeg limhiam tuag, nws txojkev vam kuj ploj tag, tus uas tsis hwm (יחוח)Yahweh tej uas nws xav tau kuj ploj ntais lawm. 8 Tus uas ncaj ncees tau kev dim qhov txom nyem, tiamsis tus tibneeg limhiam yuav nyob nws chaw raug txom nyem. 9 Tus uas tsis hwm (יחוח)Yahweh, nws lub qhov ncauj ua rau kwvtij zej zog puam tsuaj, tiamsis tus uas ncaj ncees kev txawj ntse pab tau nws dim. 10 Thaum cov uas ncaj ncees noj qab nyob zoo mas lub nroog kuj xyiv fab, thaum cov tibneeg limhiam puam tsuaj tag kuj muaj suab qw zoo siab.

11 Tej koob hmoov uas cov tibneeg ncaj ncees tau, ua rau lub nroog vam meej tuaj, tiamsis cov tibneeg limhiam lub qhov ncauj ua rau lub nroog puam tsuaj.

12 Tus uas saib tsis taus kwvtij zej zog yog tus uas tsis thoob tsib, tiamsis tus uas paub qabhau mas nyob twjywm. 13 Tus uas cuav zos taug xaiv pheej qhia tej uas muab npog cia tshwm los, tiamsis tus uas tso siab tau mas yeej npog tau tej ntawd cia. 14 Qhovtwg tsis muaj tus txawj coj tej pejxeem yuav ntog tag, tiamsis qhov uas muaj ntau leej ua chaw sablaj yeej yuav nyob thaj yeeb. 15 Tus uas qhwv lwm tus yuav raug kev ntxhov siab, tiamsis tus uas tsis kam qhwv lwm tus yuav nyob kaj siab lug. 16 Tus pojniam uas paub cai yeej tau koob meej, tiamsis tus txivneej siab heev yuav tau nyiaj txiag. 17 Tus uas hlub luag yuav rov ua rau nws tau zoo, tiamsis tus uas nyaum yuav rov ua rau nws mob. 18 Tus tibneeg limhiam tau cov nqe zog uas dag nws xwb, tiamsis tus uas tseb txojkev ncaj ncees yuav tau tej nqe zog uas tseeb. 19 Tus uas khov kho hauv txojkev ncaj ncees yuav muaj txojsia nyob, tiamsis tus uas raws ncuj nciav txojkev phem yuav tuag. 20 Cov tibneeg uas lub siab nkhaus, (יחוח)Yahweh ntxub kawg li, tiamsis cov uas tsis muaj chaw thuam li ua rau (יחוח)Yahweh zoo siab. 21 Cia li paub tseeb tias tus tibneeg phem yuav tsis dim kev teem txim, tiamsis tus uas ncaj ncees yuav tau kev cawm dim. 22 Tus pojniam zoo nkauj uas tsis paub cai zoo li lub nplhaib kub uas npua coj ntawm qhov ntswg. 23 Qhov uas cov tibneeg ncaj ncees ntshaw coj mus tau qhov zoo xwb, tiamsis qhov uas cov tibneeg limhiam vam coj mus txog (יחוח)Yahweh kev npau taws. 24 Tus uas zoo siab pub dawb nws nplua nuj zuj zus, tus uas tsis kam pub yam uas nws pub tau, nws kuj pluag zuj zus. 25 Tus uas lub siab dav pub tau yeej yuav nplua nuj, tus uas muab dej rau luag haus, luag kuj yuav pub dej rau nws.

26 Tibneeg cem foom tus uas tuav nqe qoob loo tsis muag, tiamsis tus uas cia li muag, yuav tau hmoov zoo rau saum nws lub taubhau. 27 Tus uas siv zog nrhiav qhov zoo yeej yuav ua rau luag txaus siab rau nws, tiamsis kev phem yuav raug tus uas nrhiav qhov phem. 28 Tus uas tso siab rau nws tej nyiaj txiag yuav ntog ploj tag, tiamsis tus uas ncaj ncees yuav hlob zoo yam nkaus li tej nplooj ntoo ntsuab. 29 Tus uas tsim kev kub ntxhov rau nws tsev neeg, mas thaum kawg nws yuav tau cua ua qub txeeg qub teg xwb, thiab tus ruam yuav ua tus ntse qhev.

30 Tus uas ncaj ncees tej haujlwm yog tsob ntoo uas pub txojsia, tiamsis qhov uas tawv nyom txoj kevcai yeej yog txov txojsia. 31 Yog cov tibneeg ncaj ncees tau tej uas tsim nyog tau hauv ntiajteb no, mas cov tibneeg limhiam thiab muaj txim yimhuab yuav raug teem txim.