Xalaumoos Tej Paj Lug

1 Xalaumoos tej paj lug. Tus tub ntse ua rau leej txiv zoo siab, tus tub ruam ua rau leej niam nyuaj siab. 2 Tej nyiaj txiag uas ua limhiam tau los tsis muaj nuj nqes, tiamsis txojkev ncaj ncees cawm kom dim kev tuag. 3 (יחוח)Yahweh tsis cia cov tibneeg ncaj ncees tshaib, tiamsis nws tsis pub cov tibneeg limhiam tau raws li uas lawv ntshaw.4 Txhais tes tub nkeeg yuav pluag, txhais tes nquag yuav ua rau nplua nuj. 5 Tus tub uas sau qoob loo rau lub caij ntuj qhua mas nws paub tab, tiamsis tus tub uas tsaug zog lub caij sau qoob yuav coj kev txaj muag los.

6 Tej koob hmoov yuav los rau saum cov tibneeg ncaj ncees taubhau, tiamsis cov tibneeg limhiam lub qhov ncauj npog txojkev ua nruj ua tsiv. 7 Qhov uas nco txog cov tibneeg ncaj ncees yog tau koob hmoov, tiamsis cov tibneeg limhiam lub suab lub npe yuav lwj tag. 8 Tus uas lub siab muaj tswvyim nws yuav muab tej lus nkaw saib hlob, tiamsis tus uas ruam ncauj ntau yuav raug kev puam tsuaj. 9 Tus uas ua lub siab dawb paug yuav nyob ruaj khov, tiamsis tus uas coj nkhaus sawvdaws yeej yuav paub. 10 Tus uas zij ncaug ntxi muag kuj ua kom muaj kev ntxhov, tiamsis tus uas muaj cuabkav ntuas ua kom nyob sib haum xeeb. 11 Cov uas ncaj ncees lub qhov ncauj yog lub qhov dej txhawv uas pub txojsia, tiamsis tus tibneeg limhiam lub qhov ncauj npog txojkev ua nruj ua tsiv. 12 Txojkev sib ntxub tshum kom muaj kev sib cav sib ceg, tiamsis txojkev hlub yuav tswj tau txhua yam kev txhaum. 13 Yuav tau tswvyim ntawm tus uas thoob tsib to nrog daim tawv ncauj, tiamsis rab nplawm yuav ntaus tus uas tsis thoob tsib nrob qaum. 14 Cov uas muaj tswvyim yuav khaws kev txawj ntse cia, tiamsis qhov uas tus ruam ntau ncauj coj kev puam tsuaj los ze. 15 Tus nplua nuj tej nyiaj txiag yog nws lub nroog ruaj khov, tiamsis tus pluag txojkev pluag yog nws txojkev puam tsuaj. 16 Cov tibneeg ncaj ncees tej nqe zog yuav coj mus tau txojsia, cov tibneeg limhiam tej nqe zog yuav coj mus saws lub txim. 17 Tus uas mloog lus qhuab qhia kuj nyob hauv txojkev uas tau txojsia, tiamsis tus uas tsis lees yuav tej lus qhuab ntuas yuav yuam kev.18 Tus uas zais nws tej kev ntxub rau hauv nruab siab, nws daim tawv ncauj dag, thiab tus uas iab hiam luag yog tus tibneeg ruam.19 Yog ntau ncauj yeej yuav muaj kev txhaum, tiamsis tus uas tswj nws daim tawv ncauj mas nws paub tab. 20 Tus uas ncaj ncees tus nplaig yog cov tseem nyiaj, tus tibneeg limhiam lub siab tsis muaj nuj nqes kiag li.

21 Tus uas ncaj ncees daim tawv ncauj yug tau tibneeg coob coob, tiamsis tus uas ruam tuag vim tsis thoob tsib. 22 (יחוח)Yahweh tej koob hmoov ua kom nplua nuj, nws tsis ntxiv kev nyuaj siab rau. 23 Qhov uas ua txhaum ua qias mas tus ruam saib yog kev lomzem xwb, qhov uas muaj tswvyim xyaum zoo mas ua rau tus uas thoob tsib to nrog zoo siab. 24 Yam uas tus tibneeg limhiam ntshai yeej yuav los raug nws, yam uas tus ncaj ncees ntshaw (יחוח)Yahweh yeej yuav pub. 25 Thaum cua daj cua dub ntsawj tuaj tus tibneeg limhiam ploj tag lawm, tiamsis tus uas ncaj ncees nyob ruaj khov mus ib txhis. 26 Tej kua qaub rhiab hniav li cas thiab tej pa taws ncho qhov muag li cas, ces tus tub nkeeg yuav zoo ib yam li ntawd rau tus uas txib nws. 27 Qhov uas hwm thiab paub ntshai (יחוח)Yahweh yuav txuas txojsia ntev mus, tiamsis tus tibneeg limhiam lub niaj lub xyoo yuav tsis ntev. 28 Qhov uas cov ncaj ncees vam yuav tiav rau txojkev zoo siab xyiv fab, tiamsis qhov uas cov tibneeg limhiam vam yuav ploj tag mus.

29 ((יחוח)Yahweh yog lub chaw ruaj khov rau tus uas siab ncaj, tiamsis nws yuav rhuav tshem cov uas ua phem. 30 Cov uas ncaj ncees yuav tsis raug muab rho pov tseg, tiamsis tus uas ua limhiam yuav tsis tau nyob hauv lub tebchaws.

31 Tus tibneeg ncaj ncees lub qhov ncauj nthuav tswvyim tawm los, tiamsis tus nplaig ntxeev ntxias yuav raug muab txiav pov tseg. 32 Tus tibneeg ncaj ncees daim tawv ncauj paub tej lus uas haum luag, tiamsis tus tibneeg limhiam lub qhov ncauj tsuas paub tej lus ntxeev ntxias xwb.