1 Cawv txiv hmab ua kom thuam luag, thiab cawv ua kom sib ntaus, leejtwg cia cawv coj nws mus yuam kev kuj tsis muaj tswvyim. 2 Qhov uas vajntxwv npau taws ceev kuj zoo yam nkaus li tsov ntxhuav lub suab nyooj, tus uas zes kom vajntxwv npau kuj yog sev tau nws txojsia. 3 Qhov uas zam dhau ntawm kev sib cav sib ceg kuj tau koob meej, tiamsis txhua tus tibneeg ruam yeej sib cav sib ceg. 4 Tus tub nkeeg tsis laij liag rau lub caij laij, mas txog lub caij hlais nws yuav mus nrhiav qoob tiamsis tsis tau abtsi li. 5 Tej uas tibneeg xav tseg cia hauv nruab siab mas zoo yam nkaus li dej tob, tiamsis tus uas thoob tsib to nrog thiaj ntaus tau los. 6 Muaj tibneeg coob khav txog lawv kev sib hlub, tiamsis leejtwg nrhiav tau ib tug ncaj uas tso siab tau? 7 Tus ncaj ncees uas taug txojkev ua ncaj ua ncees, mas nws cov tub yuav tau nyob kaj siab lug rau yav tom qab.

8 Vajntxwv uas nyob saum lub zwm txwv tu plaub nws yeej yuav tsoov txhua yam kev phem uas nws pom tawm mus.

9 Leejtwg yuav hais tau tias, kuv twb ua kuv lub siab dawb siab huv lawm, kuv twb dawb huv tsis muaj txim? 10 Lub thauj teev uas tsis haum txiaj thiab lub thoob luj uas tsis haum, mas (יחוח)Yahweh ntxub ob yam no kawg li.

11 Txawm yog tej menyuam yaus los qhov uas nws ua kuj qhia lub neej rau luag paub tias tej uas nws ua yog dawb huv thiab raug cai los tsis yog. 12 Lub qhov ntsej uas hnov lus thiab lub qhov muag uas pom kev puavleej yog (יחוח)Yahweh tsim. 13 Tsis txhob nyiam tsaug zog tsam ces koj pluag, cia li qheb koj lub qhov muag koj thiaj tau noj tsau. 14 Tus uas rho nyiaj yuav kuj hais tias, tsis zoo, tsis zoo, tiamsis thaum nws coj dhau lawm nws kuj khav. 15 Kub thiab qe zeb hlaws muaj nqes mas muaj ntau kawg li, tiamsis daim tawv ncauj uas hais lus txawj ntse kuj yog lub qe zeb hlaws uas tsim txiaj tshaj plaws. 16 Cia li txais lub tsho ntawm tus uas muab qhwv lwm tus li nuj nqes, thiab cia li khaws tej tiv thawj uas nws muab qhwv lwm tus. 17 Tej zaub mov uas dag tau los mas noj qab kawg li, tiamsis tom qab tsig zeb yuav puv nkaus lub qhov ncauj.

18 Tej hom phiaj haujlwm yuav tsum yog sablaj dav thiaj tiav, mus ntaus zib yuav tsum muaj cov txawj ntse qhia. 19 Tus uas cuav zos taug xaiv kuj yog thws lub qe rau luag, yog li ntawd tsis txhob nrog tus ntau ncauj ua ke.

20 Yog leejtwg cem foom nws niam lossis nws txiv, nws lub teeb yuav tuag nto tsaus ntuj nti. 21 Tej qub txeeg qub teg uas tau sai thaum ntxov, mas thaum kawg kuj ploj tsis tau hmoov. 22 Tsis txhob hais tias, kuv yuav pauj qhov uas luag ua phem, cia tos (יחוח)Yahweh mas nws yuav pab koj. 23 Lub thauj teev uas tsis haum txiaj mas (יחוח)Yahweh ntxub kawg li, rab teev uas ntxo kuj phem.

24 Neeg txhais kotaw yog (יחוח)Yahweh coj, mas tibneeg yuav nkag siab tau tibneeg txojkev li cas? 25 Yog leejtwg lam hais ua dog ua dig tias, no yog yam dawb huv rau (יחוח)Yahweh, kuj yog nws rov cuab mag nws, vim yog thaum xav tau txhua, twb cog lus tag lawm. 26 Tus vajntxwv uas muaj tswvyim tsoov cov tibneeg limhiam thiab tsuj pes ntiag lawv yam li tsheb tsuj qoob. 27 Lub siab uas paub qhov phem qhov zoo yog (יחוח)Yahweh lub teeb ci thoob plaws rau hauv tibneeg lub siab lub ntsws.

28 Txojkev hlub thiab txojkev ua ncaj, tuav tau vajntxwv cia, thiab txojkev ncaj ncees txhawb nqa nws lub zwm txwv.

29 Cov tub hluas lub koob meej yog qhov uas nws muaj zog, tiamsis cov laus lub moo zoo yog qhov uas lawv nyob dawb hau paug. 30 Qhov uas muab nplawm kom to kuj yog txhuam tej kev phem tseg, qhov uas muab ntaus kuj yog ntxuav lub siab lub ntsws kom huv.