Qhia Kom Txawj Mloog Lus

1 Kuv tub es, tsis txhob tsis nco qab kuv tej lus qhia, koj lub siab yij meem nco ntsoov kuv tej lus nkaw. 2 Rau qhov tej no yuav pub koj nyob ntev niaj ntau xyoo, thiab pub koj vam meej nyob kaj siab lug. 3 Koj tsis txhob muab txojkev hlub thiab txojkev ua ncaj tso tseg. Cia li muab khi rau ntawm koj caj dab thiab muab sau cia rau hauv koj lub siab. 4 Luag thiaj li saib taus koj thiab koj yuav tau koob meej zoo ntawm (יחוח)Yahweh thiab tibneeg. 5 Koj cia li tso siab plhuav rau (יחוח)Yahweh kawg siab kawg ntsws, koj tsis txhob vam khom koj li kev txawj ntse. 6 Cia li lees yuav nws rau txhua txojkev uas koj mus, mas nws yuav pub koj taug txojkev ncaj. 7 Tsis txhob xav hais tias koj txawj ntse. Cia li hwm thiab paub ntshai (יחוח)Yahweh, thiab tig hlo ntawm txojkev phem. 8 Qhov uas koj ua li no, yuav ua rau koj lub cev nyob zoo thiab ua koj tej pob txha sib qas las.

9 Cia li hwm (יחוח)Yahweh thiab muab koj tej qhov txhia chaw xyeem rau nws, thiab muab thawj phaum qoob loo txhua yam pub rau nws, 10 mas koj lub txhab yuav puv nkaus, thiab kua txiv hmab yuav puv koj lub rhawv phwj yos. 11 Kuv tub es, tsis txhob saib tsis taus (יחוח)Yahweh tej lus qhuab qhia, thiab tsis txhob dhuav nws tej lus ntuas, 12 rau qhov (יחוח)Yahweh qhuab ntuas tus uas nws hlub, ib yam li leej txiv qhuab ntuas tus tub uas nws zoo siab rau. 13 Tus uas nrhiav tau tswvyim thiab txawj nkag siab mas kaj siab lug, 14 rau qhov tswvyim muaj nqes dua nyiaj txiag thiab muaj tshaj thawj dua kub.

15 Tswvyim tsim txiaj dua npauj nyiaj npauj kub, thiab txhua yam uas koj ntshaw tsis muaj ib yam zoo cuag li tswvyim. 16 Tswvyim sab tes xis tuav txojsia ntev, sab tes laug tuav kev muaj txiag thiab koob meej. 17 Tswvyim txojkev yog txoj uas tshav ntuj nrig, thiab nws txhua txojkev yog kev sib haum xeeb.

18 Tswvyim yog tsob ntoo uas pub txojsia rau cov uas tuav rawv nws, cov uas tuav rawv tswvyim cia ruaj, luag yuav hu tias kaj siab lug. 19(יחוח)Yahweh siv tswvyim tsim ntiaj-teb, thiab siv kev nkag siab nthuav lub ntuj.

20 Nws siv nws kev txawj ntse ua kom dej txhawv hauv nruab tiv txwv los, thiab ua kom huab tso dej lwg los. 21 Kuv tub es, koj cia li ceev lub tswvyim thiab kev txawj ntse, tsis txhob cia ob yam no khiav dhau ntawm koj lub qhov muag mus. 22 Ob yam no yuav ua txojsia rau koj thiab yuav yog tej saw kub ntawm koj caj dab. 23 Ces koj yuav ua koj lub neej tso siab plhuav thiab tsis dawm tes dawm taw. 24 Yog koj zaum, los koj tsis ntshai abtsi, thaum koj pw los yuav tsaug zog zoo siab tus yees. 25 Koj tsis txhob ntshai tej uas ua rau koj ceeb uas tshwm plaws los tamsid, thiab tsis txhob ntshai tej kev puam tsuaj uas tej tibneeg limhiam raug, 26 rau qhov (יחוח)Yahweh yuav yog koj lub chaw vam khom, nws yuav tiv thaiv tsis kheev koj txhais kotaw mag rooj hlua. 27 Koj cia li ua zoo rau cov uas tsim nyog tau qhov zoo rau txhua lub sijhawm uas koj ua tau. 28 Yog kwvtij zej zog cheem tsum ib yam abtsi uas koj muaj, mas tsis txhob hais tias, koj rov qab mus tagkis rov tuaj es kuv li muab. 29 Tsis txhob ntaus tswvyim ua phem rau tej kwvtij zej zog uas nyob ze koj thiab tso siab rau koj. 30 Yog luag tsis tau ua phem rau koj mas tsis txhob lam nrog luag sib cav sib ceg. 31 Tsis txhob khib tug tibneeg ua limhiam ntais ntuj, thiab tsis xaiv taug nws tej kev txoj twg kiag li, 32 rau qhov (יחוח)Yahweh ntxub tus tibneeg siab nkhaus, tiamsis nws nrog tus uas ua ncaj ncees sib raug zoo. 33 Lo lus uas (יחוח)Yahweh foom tsis zoo yuav poob rau saum tej tibneeg limhiam lub tsev, tiamsis nws yuav foom koob hmoov rau tej tibneeg ncaj ncees lub chaw nyob. 34 Nws yuav luag tej tibneeg uas luag lwm tus, tiamsis nws yuav hlub tej uas txo hwjchim. 35 Tus tibneeg txawj ntse yuav tau koob meej, tiamsis tus tibneeg ruam yuav poob ntsej muag.