Nrhiav Tswvyim Tau Koob Hmoov

1 Kuv tub es, yog koj khaws kuv tej lus cia thiab muab kuv tej lus cob qhia ceev rau hauv koj lub siab.  

2 Thiab yog koj tig ntsej ncuv mloog lub tswvyim, thiab tig lub siab los nrhiav kev tau taub.

3 Yog koj hu nrhiav kev txawj ntse thiab tsa ncauj thov kev nkag siab.

4 Yog koj nrhiav tswvyim ib yam li nrhiav tej nyiaj, thiab nrhiav ib yam li nrhiav tej pob zeb muaj nqis uas muab zais cia lawm.

5 Yog koj ua li no, koj yuav tau taub qhov uas hwm thiab paub ntshai ()Yahweh, thiab txawj paub txog ()Yahweh.

6 Rau qhov ()Yahweh yog tus uas pub tswvyim, tej kev txawj ntse thiab tej kev nkag siab, yog tawm hauv ()Yahweh qhov ncauj los.

7 Nws ceev lub tswvyim cia rau cov uas siab ncaj, nws yog daim hlau tiv thaiv cov uas ua tibneej ncaj ncees.

8 Nws ceev txojkev ua ncaj ua ncees thiab nws tsom kwm nws cov tibneeg ncaj ncees.

9 Mas koj yuav paub txojkev ncaj ncees thiab kev txiav txim ncaj, thiab ua ncaj nruab nrab, thiab paub ua qhov zoo rau txhua fab.

10 Tswvyim yuav nkag rau hauv koj lub siab, thiab kev txawj ntse yuav ua kom koj tus ntsuj plig xyiv fab.

11 Kev txawj ntse yuav tsom kwm koj, thiab kev tau taub yuav tiv thaiv koj.

12 Thiab yuav pab koj dim txojkev ua phem, thiab dim cov tibneeg ntxeev xaiv.

13 Lawv tso txojkev ncaj ncees tseg, taug txojkev tsaus ntuj.

14 Lawv yeej zoo siab ua phem thiab nyiam tej kev phem ntxeev ntxias.

15 Yog cov uas taug txojkev nkhaus, lawv yog tibneeg siab nkhaus xwb.

16 Koj yuav dim ntawm tus pojniam plhu tuab, yog tus nkauj cuav zej cuav zos uas hais lus qab zib qab ntse.

17 Nws muab nws tus txiv uas thaum hluas nkauj nws yuav tso pov tseg, thiab tsis nco txog tej lus uas nws cog tseg rau ()Yahweh lawm.

18 Nws lub tsev yuav coj mus txog txojkev tuag, nws tej txujci yuav coj mus rau hauv tub tuag teb.

19 Cov uas mus cuag nws, tsis muaj ib tug rov qab los li, tsis muaj ib tug uas yuav rov los taug tau txojkev uas ciaj sia.

20 Yog li ntawd, koj yuav tau taug cov tibneeg zoo txojkev, thiab coj raws li cov tibneeg ncaj ncees tus cwjpwm.

21 Rau qhov cov uas siab ncaj, yuav tau nyob hauv lub tebchaws, thiab cov uas ua siab dawb paug, yuav tau nyob ruaj rau hauv.

22 Tiamsis cov tibneeg limhiam, yuav raug muab txiav tu hauv lub tebchaws, thiab cov tibneeg ntxeev ntxias yuav raug muab dob kiag cag.