Paj Lug Muaj Nqes

1 Cov lus no yog Daviv tus tub Xalau-moos uas yog cov Ixayees tus vajntxwv li paj lug,

2 ua kom tau tswvyim thiab paub kevcai ua neej, thiab to taub tej lus txawj ntse,

3 khaws tej lus qhuab qhia uas qhia kev thoob tsib to nrog, thiab kev txiav txim ncaj, thiab kev ua ncaj, thiab qhov uas ua ncaj nruab nrab,

4 muab txojkev thoob tsib to nrog rau tus uas tsis paub qabhau, muab kev txawj ntse thiab kev paub txhij paub txhua rau tus hluas.

5 Tus txawj ntse tau hnov thiab tsav kev paub rau nws, thiab tus uas thoob tsib to nrog yuav tau peevxwm ua haujlwm,

6 kom thiaj nkag siab paj lug piv lus, thiab nkag siab cov txawj ntse tej lus, thiab tej txhiaj txhais.

7 Qhov uas hwm thiab paub ntshai ()-Yahweh yog lub hauv paus txawj ntse, tus ruam yeej saib tsis taus tswvyim thiab tej lus qhuab qhia.

​

Ntuas cov hluas

8 Kuv tub es, cia li mloog koj txiv tej lus qhuab qhia, thiab tsis txhob muab koj niam tej lus qhia tso tseg.  

9 Rau qhov tej lus ntawd yog lub mom paj ntoos zoo nkauj saum koj taubhau thiab yog tej saw nyiaj ntawm koj caj pas.

10 Kuv tub es, yog tej tibneeg muaj txim ntxias koj, tsis txhob yeem mus.

11 Yog lawv hais tias, nrog peb mus, cia peb mus zov kev tos tua tibneeg, cia peb mus zov kev tos tus uas tsis ua txhaum, muab ntaus ua si.

12 Cia peb muab nws nqos ciaj yam li tub tuag teb, thiab nqos kheej ib yam li lawv cov uas nqis rau hauv qhov tuag.

13 Peb yuav tau tej qhov txhia chaw tsim txiaj txhua yam, peb yuav muab tej uas peb txeeb tau los ntim puv nkaus hauv peb tej tsev.

14 Koj cia li nrog peb koom, peb sawvdaws yuav koom ib lub hnab nyiaj.

15 Kuv tub es, tsis txhob nrog lawv mus, yuav tau tswj koj txhais kotaw ntawm lawv txojkev.

16 Rau qhov lawv txhais kotaw khiav mus ua phem, thiab lawv maj nroos mus txov luag los ntshav.

17 Cuab vas rau noog pom yeej tsis tau qabhau.

18 Tiamsis cov tibneeg no nyas zov tos lawv tus kheej tej ntshav, thiab zov kev txov lawv txojsia.

19 Txhua tus uas ua nruj ua tsiv es tau nyiaj los yeej yuav zoo li no, tej nyiaj ntawd yuav rov txov lawv txojsia.

​

Tswvyim Nqua Hu

20 Tswvyim hu nrov nrov ntawm tej kev, nws tsa suab hu ntawm tshav puam. 21 Nws tuaj saum tej ntsa loog hu thiab piav ntawm rooj loog uas nkag rau hauv lub nroog hais tias,

22 nej cov uas tsis thoob tsib es, nej yuav nyiam txojkev tsis thoob tsib mus ntev li cas? Thiab cov uas thuam luag yuav zoo siab thuam mus ntev li cas? Thiab cov uas ruam yuav ntxub kev txawj ntse ntev li cas?

23 Yog nej tig pob ntseg mloog kuv tej lus qhuab ntuas, mas kuv yuav nchuav kuv tus ntsuj plig rau saum nej, kuv yuav muab kuv tej lus qhia rau nej.

24 Kuv twb hu, los nej tsis yeem mloog, kuv twb cev tes, los tsis muaj leejtwg quav ntsej.

25 Thiab nej tsis yeem txais yuav kuv tej lus taw qhia, thiab tsis yeem yuav kuv tej lus qhuab ntuas kiag li.

26 Vim li no, kuv yuav luag qhov uas nej raug kev puam tsuaj, thiab kuv yuav thuam luag rau thaum uas nej ntshai ras zom zaws.

27 Thiab thaum kev ntshai ras los raug nej zoo yam nkaus li cua daj cua dub, thiab kev puam tsuaj los raug nej yam li khaub zeeg cua, thiab thaum kev txom nyem kev nyuaj siab los raug nej.

28 Mas lawv yuav thov kuv los kuv yuav tsis teb. Lawv yuav siv zog nrhiav kuv tiamsis nrhiav tsis tau.

29 Vim lawv ntxub kev txawj ntse thiab tsis xaiv yuav qhov uas hwm thiab paub ntshai ()Yahweh.

30 Thiab lawv tsis yuav kuv tej lus taw qhia kiag li, thiab saib tsis taus kuv tej lus qhuab ntuas huvsi.

31 Vim li no, lawv yuav saws raws li tej uas lawv ua, thiab lawv tej tswvyim ua phem rau luag, yuav rov raug lawv pov khawv nkaus.

32 Cov tibneeg tsis thoob tsib raug tua, vim yog lawv tsis quav ntsej tej lus qhia, thiab cov tibneeg ruam raug puam tsuaj, vim yog lawv tsis txais yuav lub tswvyim.

33 Tiamsis tus uas mloog kuv, yuav nyob tso siab plhuav, thiab yuav nyob kaj siab lug, tsis txhawj tsis ntshai ib yam kev phem kiag li.