1 Cov tibneeg limhiam cia li khiav, twb tsis muaj leejtwg caum, tiamsis cov ncaj ncees muaj lub siab tuab ib yam li tsov ntxhuav. 2 Thaum muaj kev fav xeeb rau hauv lub tebchaws mas muaj ntau leej sawv kav, tiamsis muaj tus uas thoob tsib thiab txawj ntse mas lub tebchaws yuav nyob ruaj nreeg ntev. 3 Tus tibneeg pluag uas quab yuam cov pluag zoo yam nkaus li pluav nag uas hlob kawg ua rau qoob loo piam tag. 4 Cov uas muab txoj kevcai tso tseg yeej qhuas cov tibneeg limhiam, tiamsis cov uas tuav rawv txoj kevcai kuj tawm tsam lawv. 5 Cov tibneeg phem tsis to taub txojkev ua ncaj, tiamsis cov uas nrhiav (יחוח)Yahweh mas to taub huvsi.

6 Tus tibneeg pluag uas taug txojkev ncaj ncees kuj zoo dua tus tibneeg nplua nuj uas ua nkhib nkhaus. 7 Tus uas tuav rawv txoj kevcai yog tus tub uas ntse, tiamsis tus uas nrog tus tibneeg tsis tsheej haj ua phoojywg ua rau leej txiv poob ntsej muag. 8 Tus uas sau paj nyiag ntau thiab nrhiav nyiaj los tsav rau nws txhab nyiaj, tsuas yog nws khaws cia rau lwm tus tau hlub tej pluag xwb. 9 Yog leejtwg tsis quav ntsej txoj kevcai, mas nws tej lus thov yog yam uas ((יחוח)Yahweh ntxub xwb. 10 Tus uas coj tus ncaj ncees yuam kev taug txojkev phem, nws yuav poob rau hauv nws lub qhov taub. Tiamsis tus uas tsis tau ua txhaum yuav tau tej qub txeeg qub teg uas zoo. 11 Tus uas nplua nuj nws pom tias nws txawj ntse, tiamsis tus pluag uas thoob tsib to nrog yeej paub tus nplua nuj zoo li cas.

12 Thaum tus ncaj ncees kov yeej, muaj kev zoo siab xyiv fab ntau heev, tiamsis thaum tus tibneeg limhiam tau hwjchim tej tibneeg kuj mus tsiv nraim. 13 Tus uas npog nws tej kev txhaum cia yuav tsis vam meej, tiamsis tus uas lees lub txim thiab tso tej kev txhaum tseg yuav tau kev khuvleej. 14 Tus uas hwm thiab paub ntshai (יחוח)Yahweh tsis tu li yuav tau nyob kaj siab lug, tiamsis tus uas ua lub siab tawv yuav poob rau hauv vij sub vij sw. 15 Tus thawj coj limhiam uas kav tej tibneeg pluag kuj zoo yam nkaus li tus tsov ntxhuav nyooj laws lossis yam li tus dais uas dhia los tom. 16 Tus thawj coj uas tsis thoob tsib to nrog kuj quab yuam nyaum heev, tiamsis tus uas ntxub tej uas tau ntawm kev ua tsis ncaj nws lub niaj lub xyoo yuav ntev mus. 17 Leejtwg tua lwm tus es muaj vij sub vij sw lawm mas cia nws khiav mus tag sim neej tsis txhob kheev leejtwg pab nws. 18 Tus uas ua lub neej ncaj yuav tau kev cawm dim, tiamsis tus uas ua nkhib nkhaus yuav poob qhov taub. 19 Tus uas laij liag yuav muaj mov noj ntau, tiamsis tus uas ua tej haujlwm tsis muaj qabhau yuav pluag heev. 20 Tus uas ua ncaj yuav tau hmoov zoo ntau, tiamsis tus uas maj nplua nuj yuav tsis dim kev teem txim. 21 Qhov uas saib dej ua ntu saib tibneeg ua plhu mas tsis zoo, tiamsis tau ib pluag mov xwb ces yeej yuav ua tsis ncaj. 22 Tus uas qia dub maj nroos nrhiav nyiaj txiag, tiamsis nws tsis paub tias kev txom nyem yuav los raug nws. 23 Tus uas qhuab ntuas luag mas luag yuav rov hlub nws heev dua tus uas lub qhov ncauj qab zib nplaig qab ntse. 24 Tus uas nyiag nws niam nws txiv tej qhov txhia chaw los tseem hais tias, tsis txhaum, kuj yog nws nrog tus uas ua kev puam tsuaj ua phoojywg. 25 Tus uas siab hlob tshum kom muaj kev sib cav sib ceg, tiamsis tus uas tso siab rau (יחוח)Yahweh yuav vam meej.

26 Tus uas tso siab rau tej uas nws xav kuj yog ruam, tiamsis tus uas ua raws li tswvyim yuav tau kev cawm dim. 27 Tus uas pub rau tej pluag nws yuav tsis tu pluas, tiamsis tus uas qe muag nti tsis hlub tej pluag yuav raug foom tsis zoo heev kawg. 28 Thaum cov tibneeg limhiam tau hwjchim tej tibneeg kuj mus tsiv nraim, tiamsis thaum lawv puam tsuaj tag lawm, cov uas ncaj ncees yuav huaj vam coob tuaj.