1 Tus uas pheej raug qhuab ntuas los tseem tawv ncauj cov nyom tsis mloog, mas ib pliag ntshis xwb yuav raug kev puas ntsoog kho tsis tau. 2 Thaum cov ncaj ncees tau hwjchim tej pejxeem xyiv fab, tiamsis thaum cov tibneeg limhiam tau kav, tej pejxeem kuj ntsaj laws. 3 Tus uas nyiam tswvyim kuj ua rau leej txiv zoo siab, tiamsis tus uas pheej ntiav poj muag cev kuj yog muab nws tej nyiaj txiag nchuav pov tseg xwb. 4 Tus vajntxwv uas kav ncaj coj lub tebchaws nyob ruaj, tus uas quab yuam sau nyiaj txiag kuj ua rau lub tebchaws puam tsuaj. 5 Tus uas ncauj qab zib nplaig qab ntse rau kwvtij zej zog kuj yog nws cuab hlua rov mag nws kotaw. 6 Tus tibneeg phem nws mag nws li kev txhaum txoj hlua, tiamsis tus ncaj ncees hu nkauj xyiv fab hlo. 7 Tus ncaj ncees paub tus pluag txojcai, tiamsis tus limhiam tsis nkag siab tej no. 8 Cov uas pheej thuam lwm tus ua rau lub nroog kub hnyiab, tiamsis cov uas txawj ntse tswj kom tej kev npau taws ploj mus. 9 Yog tus ntse nrog tus ruam sib cav sib ceg, tus ruam tsuas muaj uas npau taws thiab luag xwb, thiab tsis muaj kev tus li. 10 Cov uas noj nyoog kuj ntxub tus uas dawb huv, thiab nrhiav ntshi txov cov ncaj ncees txojsia. 11 Tus uas ruam yeej ua nws kev chim tshwm tag nrho los, tiamsis tus txawj ntse tswj tau nws txojkev npau cia twjywm. 12 Yog tus thawj ntseeg tej lus dag, mas nws cov tub teg tub taws yuav limhiam tag huvsi. 13 Tus uas pluag thiab tus uas quab yuam qhov uas sib thooj yog qhov uas (יחוח)Yahweh pub qhov kaj rau nkawv qhov muag ib yam nkaus.

14 Yog vajntxwv tu plaub ncaj rau cov pluag, mas nws lub zwm txwv yuav nyob ruaj khov ib txhis. 15 Rab nplawm thiab lo lus qhuab ntuas pub tswvyim, tiamsis tus menyuam uas muab tso ywj siab coj kev txaj muag rau leej niam. 16 Thaum cov tibneeg limhiam tau hwjchim tuav haujlwm, muaj tej kev fav xeeb loj zuj zus, tiamsis cov ncaj ncees yuav pom ntsoov lawv raug kev puam tsuaj.

17 Cia li nplawm qhuab qhia koj tus tub nws thiaj ua rau koj nyob siab tus yees thiab ua rau koj zoo siab. 18 Qhovtwg tsis muaj kev qhia (יחוח)Yahweh tej lus, mas tej pejxeem kuj tseg tsis tswj lub siab, tiamsis tus uas tuav rawv txoj kevcai mas tau nyob kaj siab lug.

19 Yog tsuas xuas ncauj hais xwb mas cob qhia tsis tau tus tub qhe, txawm yog nws nkag siab los nws kuj tsis quav ntsej. 20 Koj pom tus ncauj sai los tsis pom? Tseem muaj vam tus uas ruam heev dua li tus ntawd. 21 Tus uas hlub nws tus tub qhe heev txij thaum yau los, mas thaum kawg yuav pom tias tus tub qhe yuav tau nws tej qub txeeg qub teg. 22 Tus uas npau taws pheej tshum kom muaj lus sib cav sib ceg, thiab tus uas chim taus kuj ua hauv paus fav xeeb loj. 23 Kev khav theeb yuav ua rau tus khav theeb poob qes, tiamsis tus uas txo hwjchim yuav tau koob meej. 24 Tus uas nrog tub sab koom tes kuj yog nws ntxub nws txojsia, nws tau hnov tej lus twv tsawm los nws tsis hais abtsi li. 25 Qhov uas ntshai tibneeg yuav ua rooj hlua rov cuab yus, tiamsis tus uas tso siab rau (יחוח)Yahweh kuj nyob tso siab plhuav. 26 Tibneeg coob nrhiav kev ua kom tus thawj coj hlub lawv, tiamsis (יחוח)Yahweh yog tus uas txiav txim ncaj rau tibneeg. 27 Tus tsis ncaj mas cov ncaj ncees kuj ntxub kawg li, tiamsis tus ua ncaj mas cov limhiam kuj ntxub kawg li.